ހުޅުމާލޭގައިި ޢިމާރަތްކުރަމުން އަންނަ ފުލުހުންގެ ފްލެޓްތަކުގެ މަސައްކަތް މިހާރު ޕްލޭނިން މިނިސްޓްރީއާއި ހަވާލުކޮށްފައިވާކަމަށް ހޯމް މިނިސްޓަރ ޢިމްރާން ޢަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ބިލެތްދޫ ދާއިރާގެ މެންބަރު އަޙްމަދު ޙަލީލް ދެންނެވި ސުވާލުތަކަށް ޖަވާބުދެއްވަމުން ހޯމް މިނިސްޓަރ އިމްރާން ޢަބްދުﷲ ވިދާޅުވީ ފުލުހުންގެ ފްލެޓްތައް ނުނިމި މިހާރު 7 އަހަރު ފާއިތުވެގެން ގޮސްފައިވާއިރު އެމަޝްރޫޢު ކުރިއަށް ގެންދިއުމަށް ވަރަށް ބޮޑެތި ދަތިތައް ކުރިމަތި ވެފައިވާކަމަށެވެ. އެހެންކަމުން އެމަޝްރޫޢުގެ އެގްރިމަންޓް މިހާރު ބާތިލު ކޮށްފައިވާކަމަށާއި، މިހާރު އެމަޝްރޫޢު ޕްލޭނިން މިނިސްޓްރީއާ ހަވާލުކޮށްގެން ކުރިއަށްދާކަމަށް މިނިސްޓަރ އިމްރާން ވިދާޅުވިއެވެ.
ޕޮލިހުންގެ ފްލެޓްގެ މައްސަލައަށް ތިވިދާޅުވިހެން މިހާރު 7 އަހަރުވަމުން ދާއިރުގަ އެމައްސަލާގައި ވަރަށް ގިނަ ދަތިތަކާއި އުނދަގޫތައް އެބަހުރިކަން ގަބޫލުކުރަން. ނަމަވެސް މިހާރު ސަރުކާރުން ވަނީ މިހާރުގެ ފުލުހުންނާއި މަޝްވަރާކުރެވި އެޕްރިޖެކްޓު ހުންގާ ފަރާތާއި ވެސް ވާހަކަދެކެވިގެން ކުރިން ހެދިފައިވާ އެގްރިމަންޓް ނިމުމަކށް ގެނެސް އަލަށް އެމޗްރޫޢު ޕްލޭނިން މިނިސްޓްރީއާއެކު ފަށާގެން ކުރިއަށް ގެންދިއުމަށް ވަނީ ނިންމާފަ. މިހާރު އެމަސައްކަތް އެގޮތަށް ކުރެވެމުން އެބަދޭ.
-ހޯމް މިނިސްޓަރ ޢިމްރާން ޢަބްދުﷲ
މިނިސްޓަރ ވިދާޅުވީ ފުލުހުންގެ ފްލެޓްތަކުގެ މައްސަލާގައި ކޮރަޕްޝަންގެ އެއްވެސް މައްސަލައެއް މިހާތަނަށް ފާހަގަކުރެވިފައި ނުވާކަމަށެވެ. ފުލުހުންނާއި ސިފައިންނަށް ހާއްސަކޮށްގެން ހުޅުމާލޭގައި އަޅަމުން އަންނަ ފްލެޓްތަކުގެ މަސައްކަތް އެންމެ ފަހުން ކުރަމުން އައިސްފައިވަނީ އައިލެންޑް އެކްސްޕާޓް ކުންފުނިންނެވެ. ފުލުހުންނަށް ޚާއްސަކޮށްގެން ހުޅުމާލޭގައި 300 ފްލެޓް އިމާރާތް ކުރަން ފެށީ 2014 ވަނައަހަރުއެވެ. ދެ އަހަރު ތެރޭގައި ނިންމާނެ ކަމަށް ބުނި އެ ފްލެޓްތައް ނުނިމި ދިގުލައިގެން ދިއުމުން އެތައ ބައެއްގެ ކަންބޮޑުވުން ވަނީ އެމަޝްރޫޢާއިމެދު ފާޅުކޮށްފައެވެ.
ކޮމެންޓު ފޮނުވާ