އިސްރާއީލުން ގާޒާއަށް ދެމުންދާ އުދުވާނީ ހަމަލާތައް ހުއްޓުމެއްނެތި ކުރިޔަށްދާތާ 10 ދުވަސް ފާއިތުވެގެން ގޮސްފައިވާއިރު، ގާޒާއަށް ކުރިމަތި ވެފައިވާ ސިއްޙީ ކާރިސާ މެނޭޖު ކުރުމަށް، އެމެޖެންސީ އެހީގެ ގޮތުގައި 7 މިލިއަން އެމެރިކާ ޑޮލަރު ބޭނުންވާ ކަމަށް ދުނިޔޭގެ ސިއްޙަތު ޖަމިއްޔާއިން ބުނެފިއެވެ.
ދުނިޔޭގެ ސިއްޙަތު ޖަމިއްޔާއިން ބުނެފައިވަނީ، މި އެހީތެރިކަން ކުރިޔަށް އޮތް 6 މަސް ދުވަހުގެ ތެރޭގައި ބޭނުންވާނެ ކަމަށެވެ.
"މި ފައިސާއަކީ، އެމަޖެންސީކޮށް ގާޒާއަށް ފޯރުކޮށްދޭން ޖެހޭ ސިއްޙީ އެހީތެރިކަން ފޯރު ކޮށްދިނުމަށްޓަކާ ކުރިޔަށް އޮތް 6 މަސްދުވަހަށް ބޭނުންވާނެ ފައިސާގެ އެހީތެރިކަން،" މިހާރު ގާޒާއަށް އިސްރާއީލުން ދެމުންދާ ހަމަލާތަކާއި ގުޅިގެން ގާޒާއަށް ބޭނުންވާ އެމަޖެންސީ އެހީތެރިކަމާ ގުޅޭގޮތުން ދުނިޔޭގެ ސިއްޙަތު ޖަމިއްޔާއިން ނެރުނު ބަޔާނެއްގައި ބުނެފައި ވެއެވެ.
ސިއްހަތު ޖަމިއްޔާގެ އޮފިޝަލުންވަނީ، އިންސާނީ އެހީތެރިކަން ފޯރުކޮށް ދިނުމަށް ފުރުސަތު ދިނުމުގެ ގޮތުން އިސްރާއީލުން ގާޒާއަށް ދެމުންދާ ހަމަލާތައް ހުއްޓާލުމަށްވެށް ގޮވާލާފައެވެ. އަދި ބުނެފައިވަނީ، ގާޒާގެ ސިއްހީ ނިޒާމު އޮތީ، މުޅިން ފެެއިލް ވުމުގެ މަގުމަތީގައި ކަމުގައެވެ.
"ބަލިމީހުންނާއި އަދި އިންސާނީ އެހީތެރިކަން ފޯރުކޮށްދޭ ފަރާތްތައް ވަދެ ނިކުމެވާ ދޮރުތައް ބަންދުކޮށް، އަދި އިސްރާއީލުން ދަމަހައްޓަމުންދާ ހަރުކަށި ދަތިކުރުންތަކުގެ ސަބަބުން، ގާޒާގެ އާންމު ސިއްޙީ ނިޒާމަށް ކުރިމަތިވެފައިވާ ކާރިސާގެ ހާލަތުދަނީ ދުވަހެއް ދުވަހަކަށް ދަށްވަމުން،" ދުނިޔޭގެ ސިއްޙަތު ޖަމިއްޔާގެ ފަރާތުން ބޭއްވި މީޑިއާ ބްރީފިންއެއްގައި ރީޖަނަލް ޑައިރެކްޓަރ އަހުމަދު އަލް މަންދަރި ވިދާޅުވެފައި ވެއެވެ.
ޑަބްލިއުއެޗްއޯއިން ގާޒާ އަދި ވެސްޓް ބޭންކަށް ކަޑައަޅާފައި ހުންނަވާ އެންމެ އިސް ފަރާތް ކަމުގައިވާ ޕީޕަރކޯން ވިދާޅުވެފައިވާ ގޮތުގައި، ގާޒާއަށް ސަޕްލައި ކުރުމަށް ހަމަޖެހިފައިވާ ސިނޮފާމް ކޮރޯނާ ވައިރަސް ވެކްސިންގެ 10،000 ޑޯޒާއި އަދި ބަލި މީހުން ގާޒާއިން ބޭރަށް ގެންދިއުމަށް ބޭނުންވާ ޓީމުތަކަށް ގާޒާއަށް ވަނުމުގެ ފުރުސަތު ދިންހާ އަވަހަކަށް ގާޒާއަށް ވަނުމަށް ޔޫއެންގެ ވަފުދު އޮތީ މިހާރުވެސް ތައްޔާރަށެވެ.
"ދެފަރާތުގެ ދެމެދުގައި ސުލްހައިގެ އެއްބަސްވުމަކާ ހަމައަށް ދެވެންދެންވެސް، އިންސާނީ އެހީތެރިކަން ފޯރުކޮށްދިނުމުގެ ފުރުސަތު ދިނުމުގެ ގޮތުން ހަމަލާ ބަދަލުކުރުމަށް މަޑު ޖެހުމެއް ގެންނަން ދެފަރާތުންވެސް އެބަ ޖެހޭ،" ޕީޕަރކޯން ވިދާޅުވެފައިވެއެވެ.
ފަލަސްތީނުގެ ރެފިއުޖީންނަށް އެހީތެރިވެދިނުމަށް ޚާއްސަ ކުރެވިފައިވާ ޔޫއެން އޭޖެންސީއިން މީގެ ކުރިން ބުނެފައިވަނީ، އިސްރާއީލުން މިހާރު ގާޒާއަށް ދެމުންދާ ހަލާތަކުގެ ސަބަބުން، އެމަޖެންސީކޮށް ބޭނުންވާ އިންސާނީ އެހީތެރިކަން ފޯރުކޮށް ދިނުމަށް، ގާޒާއަށް މިވަގުތުވެސް 38 މިލިއަން އެމެރިކާ ޑޮލަރު ބޭނުން ވެއެވެ.
އިސްރާއީލާއި ހަމާސް ޖަމާއަތާ ދެމެދު، މިމަހުގެ 10 ވަނަ ދުވަހު ހަމަލާ ބަދަލުކުރުންތައް ފެށުނުފަހުން، ފަލަސްތީނުގެ 256 މީހުން ޝަހީދުވެފައިވާ ކަމަށް ގާޒާގެ ހެލްތު މިނިސްޓްރީން ވަނީ ބުނެފައެވެ. މީގެ ތެރޭގައި 65 ކުޑަކުދިންނާއި 39 އަންހެނުންވެސް ހިމެނެއެވެ. އަދި ފަލަސްތީނުގެ 1700 މީހުންނަށް ވަނީ އަނިޔާވެފައެވެ.
