ސަރުކާރުގެ ސްޓްރެޓީޖިކް އެކްޝަން ޕްލޭނުގެ ތަފްސީލް މާފަންނު މެދު ދާއިރާގެ މެމްބަރު އިބްރާހީމް ރަޝީދު، ބޮންޑޭއަށް ނޭނގުމުގެ ޒިންމާ މިނިސްޓްރީން އުފުލަން ނުޖެހޭނެ ކަމަށް ވިދާޅުވެ މިނިސްޓަރ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ މުޙައްމަދު މަލީހް ޖަމާލު ބޮންޑޭއަށް ފާޑު ވިދާޅުވެއްޖެއެވެ.
އެސްއޭޕީގެ ސްކްރީން ޝޮޓަކާއި އެކު މިނިސްޓަރ މަލީހު ކުރެއްވި ޓްވީޓެއްގައި ވިދާޅުވި، އެކްޝަން ޕްލޭންގެ ދަށުން މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއާ މަތިކޮށްފައިވާ ކަންކަން ތުނޑުން ތުނޑަށް ކުރިއަށްދާކަމަށެވެ. މިނިސްޓަރ މިހެން ވިދާޅުވެފައި މިވަނީ، ރާއްޖޭގައި އިންޓަނެޓު އަގުހެޔޮކުރުމަށްޓަކައި ގާއިމްކުރަން ޖެހޭ އިންފްރާސްޓްރަކްޗާ މަސައްކަތްތައް ކުރުން ލަސްވާތީ މިނިސްޓަރގެ އިސްތިއުފާއަށް، މަޖިލީހުގެ މިއަދުގެ ޖަލްސާގައި މެމްބަރު އިބްރާހީމް ރަޝީދު ގޮވާލައްވާފައި ވާތީއެވެ.
SAP ga Ministry aai mathikoffavaa kankan thundun thundah kuriyah ebadhey. SAP ge thafseel Bonda ah neygumuge zinmaa Ministryn nagan nujehey. Majlis sitee akah javaabu nudhee noannaane. Majlihun vaki kameh kuran angaafa nuvey. Vaanuvaa neygeynama isthiufaa dheyn jehenee Bondaa. https://t.co/tE6NGwCe9p pic.twitter.com/y0zBQ4Tll1
— Mohamed Maleeh Jamal (@maleehjamal) October 20, 2020
އައިލެންޑް އޭވިއޭޝަނާ ބެހޭ ގޮތުން މަޖިލީހުގެ އެސްއޯއީ ކޮމިޓީން އެކުލަވައިލި ރިޕޯޓްގެ ބަހުސްގައި ވާހަކަ ދައްކަވަމުން ބޮންޑޭ ވިދާޅުވީ، ވުޒާރާތަކާއި ދައުލަތުގެ ކުންފުނިތަކުގެ ކަންތައްތަކުގެ ވާހަކަ މަޖިލީހުގައި ދައްކަނީ ކަންތައްތައް ރަނގަޅު ކުރަން ކަމަށެވެ. އަދި މަލީހުގެ މިނިސްޓްރީއަށް ކަންތައްތަކެއް ކުރަން އަންގައި މަޖިލީހުން މިދިޔަ ޖޫން މަހު ގަރާރެއް ފާސްކޮށްފައި ވާ ކަމަށާއި އެ ގަރާރުގައިވާ ކަންތައްތައް މިނިސްޓްރީން ކޮށްފައި ނުވާ ކަމަށް ވެސް އޭނާ ވިދާޅުވި އެވެ. އެގޮތުން އިންޓަނެޓުގެ އަގުހެޔޮކުރުމަށް ކުރެވިދާނެ ކަންތައްތައް ހިމެނޭ ޓެކްނިކަލް ރިޕޯޓެއް މަޖިލީހަށް ހުށައަޅަން ވެސް އެ ގަރާރުގައި މިނިސްޓްރީއަށް ލަފާ ދީފައި ވާކަމަށްވެސް ބޮންޑޭ ވިދާޅުވިއެވެ. އަދި ޕޭމަންޓް ގޭޓްވޭއެއް ގާއިމް ކުރުމަށް ބޭނުންވާ ވަސީލަތްތައް ގާއިމްކުރަން ބޭނުންވާ މައުލޫމާތު ފޮނުވަން އެދުނީމާވެސް ނުފޮނުވާ އޮތްކަމަށް ބޮންޑޭ ވިދާޅުވިއެވެ.
"އިސްތިއުފާ ދެއްވުން މާރަނގަޅުވާނެ ނޫންތޯ؟ އަޅުގަނޑު ގޮވައިލަން އިސްތިއުފާ ދީފައި ގެއަށް ވަޑައިގަންނަވަން"
– މެމްބަރު އިބްރާހީމް ރަޝީދު
މިކަމަށް ރައްދުދެއްވާ މިނިސްޓަރ މަލީހު ވިދާޅުވީ މަޖިލީހުގެ ސިޓީއަކަށް ޖަވާބުނުދީ ނޯންނާނެ ކަމަށެވެ. އަދި މަޖިލީހުން ވަކި ކަމެއް ކުރަން އަނގާފައި ވެސް ނުވާކަމަށް މިނިސްޓަރ މަލީހު ވިދާޅުވިއެވެ.
" މަޖިލިސް ސިޓީ އަކަށް ޖަވާބު ނުދީ ނޯންނާނެ. މަޖިލީހުން ވަކި ކަމެއް ކުރަން އަނގާފަ ނުވޭ. ވާނުވާ ނޭނގޭނަމަ އިސްތިއުފާ ދޭން ޖެހޭނީ ބޮންޑާ"
– މިނިސްޓަރ މަލީހު
ސަރުކާރުން އެކުލަވާލާފައިވާ ސްޓްރެޓީޖިކް އެކްޝަން ޕްލޭން، އެސްއޭޕީގައި ވާގޮތުން އަތްފޯރާ އަގެއްގައި ފެންވަރު ރަނގަޅު އިންޓަނެޓް ޚިދުމަތް ލިބޭކަން ކަށަވަރު ކުރުމަށް ކުރަން ޖެހޭ މަސައްކަތްތައް މިއަހަރާއި އަންނަ އަހަރު ކުރިއަށް ގެންދިއުމަށް މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީއަށް ވަނީ މަތިކޮށްފައެވެ. އެގޮތުން އިންޓަނެޓްގެ އަގު ހެޔޮކުރުމަށް ހިދުމަތް ދޭ ފަރާތްތަކުގެ މެދުގައި ވާދަވެރިކަން އުފެދޭ ފަދަ ފިޔަވަޅުތަކެއް އެޅުމަށް ވަނީ ނިންމާފައެވެ. އިންޓަނެޓްގެ އަގުތަށް ދައްކުރުމަށް މިނިސްޓްރީގެ ފަރާތުން ކުރަންޖެހޭ ހުރިހާކަމެއް ނިންމާފައި ވާކަމަށް މިނިސްޓަރ މަލީހް މީގެ ކުރިން ވަނީ ވިދާޅުވެފައެވެ. އަދި އެކަން ތަންފީޒު ކުރުމުގެ އެންމެ ފަހުގެ ބާރު އޮތީ ރައީސް އޮފީހަށް ކަމަށް މިނިސްޓަރ އޭރު ވިދާޅުވިއެވެ.
ކޮމެންޓު ފޮނުވާ