ފަލަސްތީނުގެ ގާޒާއަށް އަމާޒުކޮށް އިސްރާއީލުން ރޭ ދީފައިވާ ވަރުގަދަ ހަމަލާތަކުގައި، 40 މިނިޓް ތެރޭގައި، ގާޒާގެ 150 އަމާޒަކަށް 450 މިސައިލް ހަމަލާ ދީފައިވާ ކަމަށް އިސްރާއީލްގެ އަސްކަރައްިޔާގެ ތަރުޖަމާން އަވިޗޭ އަޑްރައީ ހުކުރުދުވަހު ބުނެފިއެވެ. އޭނާ މިކަން ހާމަ ކޮށްފައިވަނީ ހުކުރުދުވަހު ކުރި ޓުވީޓެއްގައެވެ.
ފަލަސްތީނުގެ ހަގުރާމަވެރިންނަށް އަމާޒުކޮށް ދެމުންދާކަމަށް އިސްރާއީލުން ބުނަމުންދާ ހަމަލާތަކުގައި، ފަލަސްތީނުގެ ގާޒާ ސިޓީގެ އިމާރާތްތަކާއި ކާރުތައް ގޮއްވާލާ، އަދި މިހަމަލާތަކުގައި އެތައް ބަޔަކު ދަނީ ޝަހީދު ވަމުންނެވެ.
ފަލަސްތީނުގެ ހެލްތު މިނިސްޓްރީން ބުނެފައިވާ ގޮތުގައި، މި މޭމަހުގެ 14 ވަނަ ދުވަހުން ފެށިގެން އިސްރާއީލުގެ އަސްކަރިއްޔާއިން ގާޒާ ސިޓީއަށް ދެމުންދާ ވައިގެ ހަމަލާތަކުގައި މިހާތަނަށް 119 މީހަކު ޝަހީދު ވެފައިވާއިރު، މީގެ ތެރޭގައި 31 ކުޑަކުދިންނާ 19 އަންހެނަކުވެސް ހިމެނެއެވެ. އަދި މި ހަމަލާތަކުގައި މިހާތަނަށް 830 މީހަކު ޒަޚަމް ވެފައި ވާކަމަށްވެސް ފަލަސްތީނުގެ ހެލްތު މިނިސްޓްރީން ހާމަކޮށްފައި ވެއެވެ.
"މިހާރު ދެމުންދާ ހަމަލާތަކަކީ، ބިމު އަޑީގައި ހަމާސްއިން، ގާޒާގެ އުތުރު އިރުމަތީ ހިސާބުތަކުގައި ގާއިމް ކޮށްފައިވާ މެޓްރޯ ސިސްޓަމް ހަލާކު ކޮށްލުމަށް އަމާޒުކޮށް ދެވެމުންދާ ހަމަލާތަކެއް،" އިސްރާއީލުގެ އަސްކަރިއްޔާގެ ތަރުޖަމާން އަޑްރާއީ ބުނެފައި ވެއެވެ.
އޭނާ އިތުރަށް ބުނެފައިވާ ގޮތުގައި، ރޭގަޑުގެ ވަގުތުތަކުގައި ދެމުންދާ މި ހަމަލާތަކުގައި، 160 ފައިޓަރ ޖެޓަކާއި އަދި 6 އެއަރ ބޭސްއެއް ދަނީ ބޭނުން ކުރެވެމުންނެވެ.
Watch: An Israeli airstrike downs a 14-story tower in #Gaza City, where 83 Palestinians, including 17 children, have died as of May 13, according to the Ministry of Health.https://t.co/yymRfxS1cU pic.twitter.com/NUmrEd0LwV
— Al Arabiya English (@AlArabiya_Eng) May 13, 2021
ގާޒާއިން މުޖާހިދުންވެސް ވަނީ ގިނަ އަދަދެއްގެ މިސައިލްތަލެއް އިސްރާއީލުގެ ސިޓީތަކާ ދިމާލަށް އުދުއްސާލާފައެވެ. އެހެންނަމަވެސް، މީގެތެރެއިން ގިނަ މިސައިލްތައްވަނީ، އަމާޒަށް ވާސިލް ވުމުގެ ކުރިން، އިސްރާއީލުން ގާއިމް ކޮށްފައިވާ، ދިފާއީ ސިސްޓަމް "އަޔަން ޑޯމް"އިން ވައްޓާލާފައެވެ.
ފާއިތުވެދިޔަ ހަފްތާތަކުގައި އިސްރާއީލާ ފަލަސްތީނާ ދެމެދު އުފެދިފައިވާ ހަމަނުޖެހުންތައް އިތުރު ވެފައިވަނީ، އިރުމަތީ ޖެރޫސެލަމްގެ ޝެއިޚް ޖައްރާއިން ގަދަކަމުން ފަލަސްތީނު ރައްޔިތުން ބޭރު ކުރުމަށް އިސްރާއީލުން މަސައްކަތް ކުރުމާއި ގުޅިގެންނެވެ. އިރުމަތީ ޖެރޫސެލަމް ހިމެނޭގޮތުން އެއީ އިސްރާއީލުގެ ވެރިރަށް ކަމަށް އެގައުމުން ނިންމާފައިވި ނަމަވެސ،ް ބައިނަލް އަގުވާމީގޮތުން ކަޑައަޅާފައިވަނީ، އެއީ އިސްރާއީލުން ހިފާފައިވާ ސަރަހައްދެއްގެ ގޮތުގައެވެ.
ފަލަސްތީނުގެ ހެލްތު މިނިސްޓްރީން ބުނެފައިވަނީ، މި ހަމަލާތަކުގައި މަރުވެފައިވާ އެތައް ބަޔަކު، ނުރައްކާތެރި ގޭހެއްގެ ސަބަބުން މަރުވެފައިވާކަމަށް ޝައްކު ކުރެވޭތީ އެކަން ފަލަސްތީނުގެ ހެލްތު މިނިސްޓްރީން މިހާރުދަނީ ތަހުގީގު ކުރަމުންނެވެ. މިގޮތުން މިހާރު ސާމްޕަލްތައް ނެގިފައިވާ ކަމަށާއި އަދި ފަހުގެ ނަތީޖާއަކާ ހަމައަށް ދެވިފައި ނުވާކަމަށް ފަލަސްތީނުގެ ހެލްތު މިނިސްޓްރީން ބުނެފައި ވެއެވެ.
