ކަލާޒް ޗެނަލްގެ މަގުބޫލު ރިއަލިޓީ ޝޯވ "ބިގް ބޮސް" ގެ 14 ވަނަ ސީޒަން ރޭ ފަށައިފިއެވެ.
މި ފަހަރުގެ ސީޒަންގައި ވާދަކުރުމަށް ހޮވާލި ސެލެބްރިޓީންގެތެރޭގައި މަޝްހޫރު ލަވަކިޔުންތެރިޔާ ކުމާރު ސާނޫގެ ދަރިފުޅު ޖާން ކުމާރު ސާނޫ އާއި ޓީވީ އިންޑަސްޓްރީގައި މަޝްހޫރު ދެމަފިރިން ކަމަށްވާ ރުބީނާ ދިލައިކާއި އަބިނަވް ޝުކްލާގެ އިތުރުން އެކްޓަރ އިޖާޒް ޚާނާއި ސައުތު އިންޑިއަން އެކްޓްރެސް ނިއްކީ ޓަމްބޯލީ ހިމެނެއެވެ.
މީގެ އިތުރުން ޓީވީ އެކްޓްރެސް ޖޭސްމިން، ޓީވީއެކްޓަރ އަދި މޮޑެލް ނިޝާންތު ސިންގް މަލްކަނީ، މޮޑެލް ޝެހެޒާދް ޑެއޯލް، ޕަންޖާބީ މޮޑެލް އެކްޓްރެސް އަދި ލަވަކިއުންތެރިޔާ ސާރާ ގުރްޕަލް، ޓީވީ އެކްޓްރެސް ޕަވިތުރަ ޕޫނައި އަދި ލަވަކިއުންތެރިޔާ ރާހުލް ވައިދްޔާ ހިމަނަގެން ޖުމްލަ 11 ބައިވެރިން ޝޯވ އަށް ވަނީ ހޮވާފައެވެ.
ނަމަވެސް މީގެތެރެއިން ބިގްބޮސްގެ "ގެއަށް" ފުރަތަމަ ވަދެވުނީ 7 ބައިވެރިއަކަށެވެ. ޖާން ކުމާރު ސާނޫ، ރުބީނާ، ނިޝާންތު އަދި ސާރާ އަށް ބިގްބޮސްގެ ގެއަށް ނުވަދެވުނީ " ތޫފާނީ ސީނިއަރސް" އެ ހަތަރު ބައިވެރިން ރިޖެކްޓް ކުރުމުންނެވެ. ތޫފާނީ ސީނިއަރސް އަކީ މީގެކުރިނަ ބިގްބޮސްގެ ސީޒަން ތަކުގައި ބައިވެރިވެ ރަނގަޅު ނަތީޖާތަކެއް ހޯދާފައިވާ ބިގްބޮސް ޝޯވގެ ތިން ތަޖުރިބާ ކާރުންނޭވެސް ބުނެވިދާނެ އެވެ.
އެގޮތުން ސިދްހަރތު ޝުކްލާ ( ސީޒަން 13ގެ ވިނާ) ގައުހަރް ޚާން ( ސީޒަން 7ގެ ވިނާ) އަދި ހީނާ ޚާން ( ސީޒަން 11ގެ ސެކަންޑް ރަނަރއަޕް) މި ސީޒަންގައި ތޫފާނީ ސީނިއަރސްގެ ގޮތުގައި މުހިންމު ދައުރެއް އަދާކުރާނެއެވެ. އޭގެތެރޭގައި ބިގްބޮސްގެ "ގެއަށް" ވަދެވޭނެ ބައިވެރިން ކަނޑައެޅުމުގެ އިތުރުން މި ބައިވެރިން "ގެއަށް" ހޭނުމަށް 15 ދުވަސް ވަންދެން ބައިވެރިންނާއިއެކު "ގޭގައި" ތޫފާނީ ސީނިއަރސް މަޑުކުރާނެއެވެ.
ބޮލީވުޑްގެ ސުޕަރ ސްޓަރ ސަލްމާން ޚާން ހުށަހަޅައިދޭ މި ޝޯވއަށް، ރިއަލިޓީ ޝޯވ ތަކަށް ލޯބިކުރާ ގިނަބަޔަކު ދިގު އިންތިޒާރެއްވަނީ ކޮށްފައެވެ. ހަމަ މިއާއެކު ކޯވިޑް-19ގެ ސަބަބުން ފިލްމު ސިނަމާތަށް ބަންދުކޮށްފައި ހުރުމުން މިފަހަރުގެ ސީޒަން ބަލާމީހުން އިންތިހާއަށް ގިނަވާނެކަމަށް ޝޯވގެ ހޯސްޓް ސަލްމާން އަންދާޒާ ކުރެއެވެ. މިއީ ސަލްމާން މި ޝޯވ ހުށަހަޅައިދޭ 11 ވަނަ އަހަރެވެ.
ކޯވިޑް-19ގެ ސަބަބުން އޯޑިއަންސް ނުލާ ޝޯވގެ ޕްރިމިއަރ ރޭ ބޭއްވި ނަމަވެސް ޝޯވ ލޯޗްކުރީ ވަރަށް ފޯރި ގަދަކޮށެވެ. އެގޮތުން ބިގްބޮސްގެ މީގެ ކުރީގެ ސީޒަންތަކުގެ ބައެއް ބައިވެރިން ހުށަހެޅުންތައް ހުށަހަޅައިދީފައިވެއެވެ. އަދި ދާދި ފަހުން މަރުވި އިންޑިއާގެ ލެޖެންޑަރީ ލަވަކިއުންތެރިޔާ އެސް.ޕީ ބާލަސުބްރަމާނިއަމަށް ހާއްސަ ޓްރިބިއުޓެއް ޝޯވގެ ހޮސްޓް ސަލްމާން ޚާން ވަނީ ދީފައެވެ. އެސް.ޕީ.ބީ އަކީ ސަލްމާންގެ ރަންޒަމާނުގެ ގިނަ ފިލްމުތަކަކަށް ލަވަކިޔައިދީފައިވާ ލަވަކިއުން ތެރިއެކެވެ.
ބިގްބޮސް ސީޒަން 14 ކުރިއަށްގެންދަނީ "އަބް ސީން ޕަލްޓޭގާ" މި ތީމުގެ ދަށުންނެވެ. އެއީ ކޯވިޑްގެ މި ހާލަތާއި ވެސް ގުޅުވައިގެންނެވެ. އެހެންކަމުން ބިގްބޮސްގެ "ގެ" ވެސް މިފަހަރު އެހެން ސީޒަންތަކާ ވަރަށް ބޮޑަށް ތަފާތެވެ. ޝޯގެ ބައިވެރިން ބިގްބޮސްގެ "ގެއަށް" ވަދެފައި ވަނީވެސް 14 ދުވަހުގެ ކަރަންޓީން ފުރިހަމަ ކޮށްފައެވެ.
މުމްބާއީއަށް ކުރި ވިއްސާރައިގެ ސަބަބުން ބިގް ބޮސްގެ މިސީޒަން ފަށާފައި މިވަނީ ކުރިން ކަނޑައަޅާފައި އޮތް ތާރީޚަށް ވުރެ 1 މަސް ފަހުންނެވެ.
