ކެބިނެޓަށް ބަދަލު ގެނައުމާއިމެދު ކޯލިޝަންގެ ބައިވެރިންނާއި ރައީސުލްޖުމްހޫރިއްޔާ ގެންދަވަނީ މަޝްވަރާކުރައްވަމުން ކަމުގައި ރައީސުލްޖުމްހޫރިއްޔާގެ ތަރުޖަމާން މުހައްމަދު މަބްރޫކް އަޒީޒް ވިދާޅުވެއްޖެއެވެ.
ކެބިނެޓަށް ބަދަލު ގެނައުމާއި ގުޅޭގޮތުން ދެކެވޭ ވާހަތަކާއި ގުޅިގެން މިރޭ ރައީސް އޮފީހުގައި ބޭއްވި ނޫސްވެރިންގެ ބައްދަލުވުުމުގައި ވާހަކަ ދައްކަވަމުން މަބްރޫކް ވަނީ ނޫސްވެރިންނަށް ސުވާލަށް ހުޅުވާލުމުގެ ކުރިން މިކަމާއި ގުޅިގެން ތަފްސީލެއް ދެއްވާފައެވެ. މަބްރޫކް ވިދާޅުވީ ނިމިދިޔަ ކައުންސިލް އިންތިޚާބާއި ގުޅިގެން ސަރުކާރުގެ ހިންގުމަށް ބަދަލު ގެނައުމަށް ރައީސުލްޖުމްހޫރިއްޔާ ނިންމަވައި، އެކަމުގެ މަޝްވަރާތައް ކޯލިޝަންގެ ބައިވެރިންނާއި ކުރައްވަމުންދާ ކަމަށެވެ.
އަދި މިހާރުވެސް ކޯލިޝަންގެ ބައިވެރިންނާއި ހިންގުމުގެ ދާއިރާއާއި ގުޅޭގޮތުންނާއި އަދި ހުރި މައްސަލަތަކާއި ގުޅޭގޮތުން ފުޅާ ދާއިރާއެއްގައޮ މަޝްވަރާ ކުރަމުންދާކަމަށް މަބްރޫކް ވިދާޅުވިއެވެ.
އެނގިފައިވާގޮތުން ފިޝަރީޒް މިނިސްޓަރުކަމުން ޒަހާ ވަކިކުރައްވާ އެ މަޤާމަށް އެންވަޔަރަމަންޓް މިނިސްޓަރ ޑރ.ޙުސައިން ރަޝީދު އައްޔަންކުރެއްވުމަށް ވަނީ ނިންމަވާފައެވެ. އަދި އެންވަޔަރަމަންޓް މިނިސްޓަރަކަށް ރައީސް އޮފީހުގެ ޕޮލިސީ އޮފީސް އައިމިނަތު ޝައުނާ އައްޔަންކުރައްވަން އުޅުއްވަކަމަށްވެސް އެނގިފައިވެއެވެ. އަދި އެމްއާރުއެމްގެ ސްލޮތެއްގައި ހަޔަ އެޑިއުކޭޝަންގެ މަޤާމުން ޑރ.އިބްރާހީމް ޙަސަން ދުރުކުރައްވާ އެ މަޤާމަށް އައްޔަންކުރައްވަނީ ކޮން ބޭފުޅެއްކަމެއް ނޭނގެއެވެ. އަދި މަލީހު ދުރުކުރައްވާފައިވާ ޓެކްނޮލޮޖީ މިނިސްޓްރީއަށްވެސް އައްޔަންކުރައްވަނީ ކޮން ބޭފުޅެއްކަމެއް ސާފެއް ނުވެއެވެ.
ވަޒީރުންގެ މަޖިލީހަށް ބަދަލުތަކެއް ގެންނަވާނެކަމުގެ އިޝާރާތެއް ރައީސް ވަނީ އެންމެ ފަހުން ބޭއްވެވި ނޫސްވެރިންގެ ބައްދަލުވުމުގައިވެސް ދެއްވާފައެވެ. އެގޮތުން މިހާރު އެ މަސައްކަތް ރައީސް ވަނީ ފައްޓަވާފައެވެ. ރައީސް ވަނީ އެކަން ސަރުކާރު ކޯލިޝަންގައި ހިމެނޭ ސިޔާސީ ޕާޓީތަކުގެ ލީޑަރުންނަށްވެސް ސިޓީއަކުން މިހާރު އެކަން އަންގަވާފައެވެ. ރައީސްގެ އެ ސިޓީގައި ވަނީ ވަޒީރުންނަށް ވަޒީރުކަމުގެ މަސްޢޫލިއްޔަތު އަދާނުކުރެއްވޭކަމަށް ބަޔާންކޮށްފައެވެ.
އަދި އެކަމުގެ ސަބަބުން ރައްޔިތުންގެ ކަންބޮޑުވުންތަކާއި ޝަކުވާތައް ގިނަވެފައިވާކަން ރައީސް ފާހަގަކުރައްވާފައިވެއެވެ. އެހެންކަމުން އެވަޒީރުން ވަޒީރުކަމުން ވަކިކުރައްވަން ނިންމަވާފައިވާކަމަށް ރައީސް ވިދާޅުވެފައިވެއެވެ. ނަމަވެސް މަޤާމުން ވަކިކުރައްވަނީ ކޮން ވަޒީރުންނެއްކަމެއް ވިދާޅުވެއް ނުވެއެވެ. ރައީސްގެ މިސިޓިއާއި ގުޅިގެން ސިޔާސީ ޕާޓީތަކުގެ ލީޑަރުންވެސް ރައީސްއަށް ޖަވާބުދެއްވާފައިވެެއެވެ. އަދި އެކަމުގެ ކަންބޮޑުވުން އެމްޑީޕީން ފިޔަވާ އެހެން ސިޔާސީ ޕާޓީތަކުގެ ލީޑަރުން ފާޅުކުރައްވާފައިވެއެވެ.
ބައެއް ވަޒީރުން މަޤާމުން ދުރުކުރެއްވުމަށް ރައީސް ނިންމަވާފައިވާއިރު، އެނގިފައިވާގޮތުގައި އޭގެތެރޭގައި ރައީސް މައުމޫންގެ އެމްއާރުއެމްއަށް ނިސްބަތްވެވަޑައިގަންނަވާ ދެ ވަޒީރުން ހިމެނެއެވެ. ނަމަވެސް އެކަމާއި ގުޅޭގޮތުން ސަރުކާރުންވެސް އަދި އެމްއާރުއެމް އިންވެސް ވަކި އެއްޗެއް ހާމަކޮށްފައެއްނުވެއެވެ.
ސަރުކާރުގެ ދައުރު ދެބައިވެގެން ދިޔައިރު، ސަރުކާރުގެ ސްޕީޑް ލަސްކަމަށާއި، ނަތީޖާ ނުނެރެވޭކަމަސް ބުނެ ސަރުކާރަށް ބޮޑެތި ފާޑުކިއުންތަކެއް ވަނީ އަމާޒުވެފައެވެ. މިހާތަނަށް އާއިރުވެސް ސަރުކާރުގެ ކެބިނެޓަށް ބޮޑެތި ބަދަލުތަކެއް ވަނީ އައިސްފައެވެ. އެގޮތުން ބައެއް ވަޒީރުން ޕްރެޝަރާހެދި ވަނީ ފެޔަށްޖެހިވަޑައިގެންފައެވެ. އަދި އިތުބާރު ނެތްކަމުގެ ވޯޓުވެސް ނަގާފައިވެއެވެ.
އެގޮތުން ޖެންޑަރ މިނިސްޓަރ ޝިދާތާ ޝަރީފްއާއި، ހެލްތު މިނިސްޓަރ ޢަބްދުﷲ އަމީންއާއި، ހައުސިން މިނިސްޓަރ އާތިފާ ޝަކޫރު ވަނީ އަމިއްލަފުޅަށް އިސްތިއުފާދެއްވާފައެވެ.
މީގެ އިތުރުން ޖިންސީ ފުރައްސާރައިގެ ތުހުމަތު ކޮށްފައިވަނިކޮށް އިސްތިއުފާދެއްވުމަށް ރައީސް އެންގެވުމުން އިސްތިއުފާނުދެއްވުމުން ޓޫރިޒަމް މިނިސްޓަރުކަމުން ޢަލީ ވަޙީދު ވަކިކުރައްވާފައިވެއެވެ. އަދި ޓެކްނޮލޮޖީ މިނިސްޓަރުގެ އިތުބާރުނެކަމަށް މަޖިލީހުން ފާސްކޮށް މަޤާމުން ދުރުކުރައްވާފައިވެއެވެ.
ކޮމެންޓު ފޮނުވާ