އިއްޔެ 33 އަހަރު ފުރުން ފާހަގަކުރި އަނުޝްކާ ޝަރްމާ ބޮލީވުޑަށް ތައާރަފްވީ ޝާހްރުކް ޚާނާއެކު އޭނާ ކުޅުނު، 2008 ވަނަ އަހަރުގެ ފިލްމު "ރަބްނޭ ބަނާދީ ޖޯޑީ" އިންނެވެ. އޭގެ ފަހުގައި ކާމިޔާބުއެތަކެއް ފިލްމުތަކެއް ބޮލީވުޑަށް އޭނާ ވަނީ ދޫކޮށްފައެވެ. އޭގެތެރޭގައި "ޖަބްތަކް ހެ ޖާން"، "ބޭންޑް ބަޖާ ބާރާތު"، "ބަދްމާޝް ކޮމްޕެނީ"، "ޕީކޭ"، "އެންއެޗް 10″، "ސުލްތާން" ފަދަ އެތައް ފިލްމެއް ހިމެނެއެވެ.
މީގެ އިތުރުން ބޮލީވުޑްގައި އަނުޝްކާ އިތުރަށް އެޅި ފިޔަވަޅާއެކު އަމިއްލަ ޕްރޮޑަކްޝަން ކުންފުންޏެއް އުފައްދައި، އެ ކުންފުނީގެ ދަށުންވެސް ކާމިޔާބު އެތަކެއް މަސައްކަތްތަކެއް މިހާތަނަށް ވަނީ ކޮށްފަ އެވެ.
މީގެ އިތުރުން އަނުޝްކާ އަކީ މިވަގުތު އިންޑިއާގެ ކްރިކެޓްގެ ފަސްޓް ލޭޑީއޭވެސް ބުނެވިދާނެއެވެ. އިންޑިއާގެ ގައުމީ ކްރިކެޓް ކެޕްޓަން ވިރާޓް ކޯލީއާ އަނުޝްކާ ކައިވެނިކުރީ 2017 ވަނަ އަހަރުގެ ޑިސެމްބަރު މަހުއެވެ. އެ ދެމަފިރިންނަށް މިއަހަރުގެ ކުރީކޮޅުވަނީ އަންހެން ދަރިއަކު ލިބިފައެވެ.
View this post on Instagram
އަނުޝްކާ ބޮލީވުޑްގައި މަޝްހޫރުކަން ހޯދުމުގެ ކުރިން މާގިނަމީހުން އޭނާ ނުދަނެއެވެ. އެހެންނަމަވެސް އޭނާއަކީ އެކްޓިންގ ކެރިއަރ ފެށުމުގެ ކުރިންވެސް މޮޑެލިން ދާއިރާގައި މަޝްހޫރު މޫނެކެވެ. ފެޝަން ޝޯވްތަކުގެ އިތުރުން ގިނަ އަދަދެއްގެ އިޝްތިހާރުތައް އޭނާ ކުޅެފައި ވެއެވެ. އޭގެ ތެރޭގައި ވިރާޓާއެކު ކުޅެފައިވާ މި ޝޭމްޕޫ އިޝްތިހާރުވެސް ހިމެނެއެވެ.
އަނުޝްކާ އާއި ވިރާޓަކީ އިންސްޓަގްރާމްގައި އެންމެ ނުފޫޒުގަދަ އިންޑިއާގެ ދެ ތަރިންނެވެ. އެގޮތުން މިދިޔަ އަހަރު ނިމުނު އިރު އިންސްޓަގަރާމްގައި އެންމެ ނުފޫޒުގަދަ މީހުންގެ ލިސްޓްގެ ފުރަތަމަ 25 ނަމުގެ ތެރޭގައި ހިމެނުނީ އިންޑިއާގެ އެންމެ ތިން މީހުނެވެ. އެއީ އަނުޝްކާ އާއި ވިރާޓްގެ އިތުރުން އިންޑިއާގެ ބޮޑުވަޒީރެވެ.
