ޔުއެފާ ޔޫރޮޕާ ލީގުގެ ސެމީ ފައިނަލުގެ ފުރަތަމަ ލެގުގައި ބޮޑު ތަފާތަކުން ރޯމާ ބަލިކޮށް ފައިނަލާއި ފިޔަވަޅަކާއި ގާތަށް އިނގިރޭސިވިލާތުގެ މެންޗެސްޓަރ ޔުނައިޓެޑް ޖެހިލައިފިއެވެ.
ޔުނައިޓެޑްގެ އަމިއްލަ ދަނޑުގައި ކުޅުނު މި މެޗުގައި ރޯމާގެ މައްޗަށް ޔުނައިޓެޑް ކުރިހޯދީ 2-6 ގެ ނަތީޖާއަކުންނެވެ.
މި މެޗުގައި ފުރަތަމަ ލަނޑު ޖަހާ ލީޑު ނެގީ ޔުނައިޓެޑުންނެވެ. މި ލަނޑު މެޗުގެ 9 ވަނަ މިނެޓުގައި އެޓީމަށް ކާމިޔާބުކޮށްދިނީ ބްރޫނޯ ފެނާންޑޭޒްއެވެ. ނަމަވެސް އޭގެ 6 މިނެޓު ފަހުން ރޯމާއަށް ލިބުނު ޕެނަލްޓީއެއް ކާމިޔާބުކޮށް އެޓީމުން ވަނީ މެޗުގެ ނަތީޖާ ހަމަހަމަކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ، ލޮރެންޒޯ ޕެލެގްރީނީއެވެ. އަދި ފުރަތަމަ ހާފް ނިމުމުގެ ކުރިން ރޯމާއިން ވަނީ ދެވަނަ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ 33 ވަނަ މިނެޓުގައި އެޓީމަށް ކާމިޔާބުކޮށްދިނީ، އެޑިން ޖެކޯއެވެ.
މެޗުގެ ދެވަނަ ހާފް ފަށައިގެން މާ ގިނައިރުތަކެއް ނުވަނީސް ޔުނައިޓެޑްގެ އެޑިންސަން ކަވާނީ ވަނީ ލަނޑެއް ޖަހާ މެޗުގެ ނަތީޖާ ޔުނައިޓެޑަށް ހަމަހަމަކޮށްދީފައެވެ. އަދި 64 ވަނަ މިނެޓުގައި ކަވާނީ ވަނީ އިތުރު ލަނޑެއް ޖަހާ ދެވަނަ ފަހަރަށް މި މެޗުގައި ޔުނައިޓެޑަށް ލީޑު ނަގައިދީފައެވެ. ޔުނައިޓެޑުން މި މެޗުގައި ޖެހި 4 ވަނަ ލަނޑަކީ ކަވާނީއަށް އޭރިޔާ ތެރެއިން ކުރި ފައުލަކާއި ގުޅިގެން ލިބުނު ޕެނަލްޓީއަކުން ކާމިޔާބުކުރި ލަނޑެކެއެވެ. މި ލަނޑު މެޗުގެ 71 ވަނަ މިނެޓުގައި ކާމިޔާބުކޮށްދިނީ ފުރަތަމަ ލަނޑުވެސް ކާމިޔާބުކޮށްދިނީ ބްރޫނޯ ފެނާންޑޭސްއެވެ. ޔުނައިޓެޑުން މި މެޗުގައި ޖެހި 5 ވަނަ ލަނޑު 75 ވަނަ މިނެޓުގައި ކާމިޔާބުކޮށްދިނީ ޕައުލް ޕޮގްބާއެވެ. އަދި 6 ވަނަ ލަނޑު ކާމިޔާބުކޮށްދިނީ ދެވަނަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ގްރީންވުޑްއެވެ.
މިއީ 1964 ވަނަ އަހަރުގެ ފަހުން، ޔޫރަޕްގެ ބޮޑު ކްލަބު މުބާރާތެއްގެ ސެމީ ފައިނަލެއްގައި އެއް ޓީމަކުން ހަ ލަނޑު ޖެހި ފުރަތަމަ ފަހަރެވެ.
