ދިވެހިރާއްޖޭގެ ކަނޑުތަކާއި، ކަނޑުގެ ގުދުރަތީ ވަސީލަތްތަކާއި ގުޅޭ ދިރާސާތައް ވަކި އުސޫލެއްގެ ދަށުން ކުރިއަށްގެންދިއުމަށްޓަކައި ޚާއްޞަ ޤަވާއިދެއް އެކުލަވާލައިފިއެވެ.
މިއީ "ދިވެހިރާއްޖޭގެ މަސްވެރިކަމުގެ ޤާނޫނު"ގެ ދަށުން މިނިސްޓްރީއޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން އެކުލަވާލާފައިވާ ޤަވާއިދެކެވެ.
"ދިވެހިރާއްޖޭގެ ކަނޑުގެ ސަރަޙައްދުގެ ތެރޭގައި ކަނޑާއި ކަނޑުގެ ޤުދުރަތީ ވަސީލަތްތަކުގެ ދިރާސާ ކުރުމާއި ބެހޭ ޤަވާއިދު" މިހާރު ވަނީ ގެޒެޓްގައި ޝާއިޢުކޮށް އަމަލުކުރަން ފަށާފައެވެ. މިއީ ދިވެހިރާއްޖޭގެ ކަނޑުގެ ސަރަޙައްދުގައި ކުރާ ކަނޑާއި ކަނޑުގެ ދިރުންތަކުގެ ދިރާސާތަކާއި، މަސްވެރިކަމަކާއި ގުޅުންހުރި ދިރާސާތަކަކީ ދިވެހިރާއްޖޭގެ ޤާނޫނުތަކާއި، ޤަވާއިދުތަކުގެ ތަރަހައިގެ ތެރެއިން ކުރިއަށްގެންދާ ދިރާސާތަކަށް ހެދުމުގެ މަޤްޞަދުގައި އެކުލަވާލާފައިވާ ޤަވާއިދެކެވެ.
މި ޤަވާއިދު އިސްތިސްނާވާ 5 ހާލަތެއްވެސް މި ޤަވާއިދުގައި ބަޔާންކޮށްފައިވެއެވެ. އޭގެ ތެރޭގައި ފިޝަރީޒް މިނިސްޓްރީއިން ކުރިއަށްގެންދާ ދިރާސާތަކާއި، އެ މިނިސްޓްރީއާއި ގުޅިގެން ހިންގާ ދިރާސާތަކާއި، ސަރުކާރުގެ އެހެން މުޢައްސަސާއަކުން ބޭނުންވެގެން ކުރާ ދިރާސާތައްވެސް ހިމެނެއެވެ.
މި ޤަވާއިދުގައިވާގޮތުން ރާއްޖޭގެ ކަނޑުގެ ސަރަޙައްދުގައި ދިރާސާއެއް ކުރަން ބޭނުންވާނަމަ، ފިޝަރީޒް މިނިސްޓްރީގެ ޕޯޓަލް މެދުވެރިކޮށް ހުއްދަ ހޯދަން ޖެހޭނެއެވެ. މި ޤަވާއިދުގެ ދަށުން ދިރާސާތައް ކުރިއަށް ގެންދިއުމަށްް ހުއްދަ ދޫކުރުމަށް ހަމަޖެހިފައިވަނީ އެއް އަހަރުގެ މުއްދަތައް ނަމަވެސް، ދިރާސާ އިތުރަށް ކުރިއަށްގެންދަން ބޭނުންވާ ޙާލަތްތަކުގައި މުއްދަތު އިތުރުކުރެވޭނެ ގޮތްތަކެއްވެސް މި ޤަވާއިދުގައި ހިމަނާފައިވެއެވެ. އަދި މި ޤަވާއިދުގެ ދަށުން ހުއްދަ ހޯދައިގެން ކުރާ ދިރާސާތަކުގައި އެއްކުރާ މަޢުލޫމާތު ނުވަތަ ހޯދުންތަކުގެ މައްޗައް އެކުލަވާލާ ރިޕޯޓް މިިނިސްޓްރީއަށް ދޭންޖެހޭނެ ކަމަށްވެސް މި ޤަވާއިދުގައި ބަޔާންކޮށްފައިވެއެވެ.
މި ޤަވާއިދުގެ ދަށުން ދޫކުރާ ހުއްދައިގައި ބަޔާންކޮށްފައިވާ ގޮތާ ޚިލާފަށް އަމަލުކުރުމާއި ހުއްދަ ނުހޯދައި ދިރާސާ ކުރުމަކީ ކުށެކެވެ. އަދި ހުއްދައިގައި ބަޔާންކުރާ އަދަދަށްވުރެ އިތުރަށް ސާމްޕަލް ނެގުމަކީވެސް މަނާކަމެކެވެ. މީގެ އިތުރުން ދިރާސާގެ މަސައްކަތް ކުރިއަށްގެންދިއުމުގެތެރޭގައި ސަޤާފީ ތަރިކަކަމަށް ބެލޭވޭ އެއްޗެއް ފެނިއްޖެނަމަ، ސަރުކާރުގެ ކަމާބެހޭ ވުޒާރާއަކަށް އެކަން އަންގަންވެސް ޖެހޭނެއެވެ. މި ޤަވައިދާ ޚިލާފަށް ކަމެއްކޮށްފިނަމަ އެއީ ކުށެއްކަމުގައި ބަލައި އެފަރާތެއް މި ޤަވާއިދުގެ ދަށުން ޖޫރިމަނާކުރެވޭނެއެވެ.
އެގޮތުން ހުއްދައެއް ނެތި ދިރާސާކުރުން ނުވަތަ ތަހުލީލު ކޮށްފިނަމަ، 5000 ރުފިޔާއިން ޖޫރިނަމާކުރާނެކަމަށް މި ޤަވާއިދުގައި ބަޔާންކޮށްފައިވާއިރު ދިރާސާކުރުމަށްދޭ ހުއްދައިގެ ޝަރުތަކާއި ޚިލާފުވެއްޖެނަމަ 2000 ރުފިޔާއިން ޖޫރިނާކުރާނެއެވެ.
