ރައީސުލްޖުމްހޫރިއްޔާގެ އޮފީހުގެ އިސް މަޤާމްތަކުގައި ތިއްބެވި ބޭފުޅުންނަށް މުސާރައާއި އިނާޔަތުގެ ގޮތުގައި މަހެއްގެ މައްޗަށް 1.68 މިލިއަން ރުފިޔާ ޚަރަދުވާކަން ހާމަވެއްޖެއެވެ.
މައުލޫމާތު ހޯދައި ލިބިގަތުމުގެ ހައްޤުގެ ބޭނުންކޮށްގެން މި މަޢުލޫމާތު ހޯދައި އާންމުކޮށްފައިވަނީ، ސިޔާސީ މަޤާމުތަކުގައި ތިއްބަވާ ބޭފުޅުންގެ މުސާރައާއި އިނާޔަތުގެ މަޢުލޫމާތު، ހޯދުމަށްފަހު ސޯޝަލް މީޑިއާގައި އާންމުކުރަމުންދާ އާންމު ފަރުދެއްކަމަށްވާ އައިމަން ލަތީފެވެ.
މި މަޢުލޫމާތަށް ބަލާއިރު ރައީސުލްޖުމްހޫރިއްޔާ އާއި ރައީސުލްޖުމްހޫރިއްޔާގެ ނާއިބާއި މިނިސްޓަރުންނާއި ސްޓޭޓް މިނިސްޓަރުންނާއި ޑެޕިއުޓީ މިނިސްޓަރު ފެންވަރުގެ ބޭފުޅުންގެ މުސާރައަށް މަހެއްގެ މައްޗަށް 1.69 މިލިއަން ރުފިޔާ ޚަރަދުވެއެވެ. މިއީ އަހަރެއްގެ މައްޗަށް ބަލާނަމަ 20.24 މިލިއަން ރުފިޔާއެވެ.
ރައީސުލްޖުމްހޫރިއްޔާއަށް މުސާރައިގެ ގޮތުގައި ލިބިވަޑައިގަންނަވަނީ ޤާނޫނުން ކަނޑައަޅާފައިވާ 100،000 ރުފިޔާއެވެ. އަދި ނާއިބް ރައީސަށް ލިބިވަޑައިގަންނަވަނީ 75،000 ރުފިޔާއެވެ.
މީގެ އިތުރުން ރައީސް އޮފީހުގައި މިނިސްޓަރު ފެންވަރުގައި މަސައްކަތްކުރައްވާ 7 ބޭފުޅަކު ތިއްބެވިއިރު އެއިން ކޮންމެ ބޭފުޅަކަށް މަހަކު 66،000 ރުފިޔާ ލިބިވަޑައިގަންނަވައެވެ. އެހެންކަމުން އެ 7 ބޭފުޅުންގެ މުސާރައަށް މަހަކު 462،00 ރުފިޔާ ޚަރަދުވެއެވެ.
މީގެ އިތުރުން ސްޓޭޓް މިނިސްޓަރު ފެންވަރުގެ 10 ބޭފުޅުން ތިއްބަވާއިރު އެއިން ކޮންމެ ބޭފުޅަކަށް މުސާރައިގެ ގޮތުގައު މަހަކު 48،500 ރުފިޔާ ޚަރަދު ކުރެއެވެ. އަދި ރައީސް އޮފީހުގެ ޗީފް ކޮމިއުނިކޭޝަން ސްޓްރެޓަޖިސްޓް އިބްރާހިމް ހޫދަށް މަހެއްގެ މައްޗަށް މުސާރައިގެ ގޮތުގައި 55،000 ރުފިޔާ ލިބެއެވެ. އެހެންކަމުން މި ބޭފުޅުންގެ މުސާރައިގެ ގޮތުގައި މަހަކު 491،000 ރުފިޔާ ޚަރަދު ކުރެއެވެ.
މި ބޭފުޅުންގެ އިތުރުން ޑެޕިއުޓީ މިނިސްޓަރު ފެންވަރުގައިވެސް 13 ބޭފުޅަކު ތިއްބަވައެވެ. އެއިން ކޮންމެ ބޭފުޅަކަށް މަހަކު 43،000 ރުފިޔާ ޚަރަދުވާއިރު އެއީ މަހެއްގެ މައްޗަށް ބަލާނަމަ 559،000 ރުފިޔާއެވެ.
