ސްޕެނިޝް ކަޕުގެ ޗެމްޕިއަންކަން ބާސެލޯނާ ހޯދައިފި

އެތުލެޓިކް ބިލްބާއޯ ބަލިކޮށް ސްޕެނިޝް ކަޕުގެ ޗެމްޕިއަންކަން ބާސެލޯނާއިން ހޯދައިފިއެވެ.

ރޭ ކުޅުނު ފައިނަލް މެޗުން ބާސެލޯނާ މޮޅުވީ 4-0 ގެ ނަތީޖާއަކުންނެވެ. މިއީ މި މުބާރާތުގެ އެންމެ ކާމިޔާބު ޓީމު ކަމަށްވާ ބާސާއިން، އެ ޓީމުގެ ތާރީޚުގައި ސްޕެނިޝް ކަޕް އުފުލާލި 31 ވަނަ ފަހަރެވެ.

ރޭގެ މެޗުގައި ބާސާ އިން ހަތަރު ލަނޑު ވެސް ޖެހީ ދެ ވަނަ ހާފުގައެވެ. ފުރަތަމަ ލަނޑު 60 ވަނަ މިނެޓްގައި އެންޓޮއިން ގްރިޒްމަން ކާމިޔާބު ކުރީ، ފުރޭންކް ޑި ޔޯންގް ތަނަވަސް ކޮށްދިން ފުރުސަތަކުންނެވެ. އޭގެ ތިން މިނެޓް ފަހު ޑިޔޯން ވަނީ ބާސާގެ ދެ ވަނަ ލަނޑު ކާމިޔާބު ކޮށްފައެވެ. މެސީގެ ލަނޑުތައް ކާމިޔަބު ކުރީ 68 އަދި 72 ވަނަ މިނެޓުގައެވެ.

މި މޮޅާއެކު ބާސާއިން ސްޕެނިޝް ކަޕް އުފުލާލިއިރު، މިއީ މިދިޔަ އަހަރުގެ އޯގަސްޓް މަހުގެ ތެރޭގައި ބާސާގެ ކޯޗުގެ މަޤާމާ ހަވާލުވި ރޮނާލްޑް ކޫމަންގެ ފުރަތަމަ ކާމިޔާބީއެކެވެ. އަދި މިއީ ބާސާގެ ކެޕްޓަން ލިއޮނެލް މެސީ މި މުބާރާތް ކާމިޔާބުކުރި ހަތްވަނަ ފަހަރެވެ.