ޔުއެފާ ޔޫރޮޕާ ލީގުގެ ކުއާޓާ ފައިނަލުގެ ދެވަނަ ލެގުގައި ސްޕެއިނުގެ ގްރަނާޑާ 0-2 އިން ބަލިކޮށް މުބާރާތުގެ ސެމީ ފައިނަލަށް އިނގިރޭސިވިލާތުގެ މެންޗެސްޓަރ ޔުނައިޓެޑް ދަތުރުކޮށްފިއެވެ.
މި މުބާރާތުގެ ކުއާޓާ ފައިނަލުގެ ފުރަތަމަ ލެގުގައި ގްރަނާޑާގެ ދަނޑުގައި ކުޅުނު މެޗުވެސް ޔުނައިޓެޑުން ކާމިޔާބުކުރީ 0-2 ގެ ނަތީޖާއަކުންނެވެ. އެހެންކަމުން ޔުނައިޓެޑް ސެމީ ފައިނަލުން ޖާގަ ހޯދާފައި މިވަނީ 0-4 ގެ އެގްރިގޭޓް ނަތީޖާއަކުންނެވެ.
ޔުނައިޓެޑްގެ އަމިއްލަ ދަނޑުގައި ކުޅުނު މި މެޗުގައި ފުރަތަމަ ލެގުގައި ދެއްކި ކާޑުތަކުގެ ސަބަބުން މެގުއާ އާއި ޝޯ އަދި މެކްޓޮމިނޭ ކުޅެފައެއް ނުވެއެވެ. ފުރަތަމަ ލެގުގެ މެޗުގައި ޔުނައިޓެޑްގެ ފަސް ކުޅުންތެރިއަކަށް ރީނދޫ ކާޑު ދައްކާފައިވާތީ ޔުއެފާއިން ވަނީ ޔުނައިޓެޑް ޖޫރިމަނާވެސް ކޮށްފައެވެ. ފަސް ރީނދޫ ކާޑު ދެއްކުމާ އެކު ޔުއެފާގެ ކޮންޓްރޯލް، އެތިކްސް އެންޑް ޑިސިޕްލިނަރީ ބޯޑުން ޔުނައިޓެޑް ޖޫރިމަނާ ކުރީ 7000 ޔޫރޯ އިންނެވެ.
ޔުނައިޓެޑާއި ގްރަނާޑާ ބައްދަލުކުރި މެޗު ފަށައިގެން މާގިނައިރުތަކެއް ނުވަނީސް ޔުނައިޓެޑުން ވަނީ ލަނޑެއް ޖަހާ ލީޑު ނަގާފައެވެ. މި ލަނޑު މެޗުގެ 6 ވަނަ މިނެޓުގައި ޕޮގްބާގެ އެހީތެރިކަމާއެކު އެޓީމަށް ކާމިޔާބުކޮށްދިނީ އެޑިންސަން ކަވާނީއެވެ. ޔުނައިޓެޑްގެ ދެވަނަ ލަނޑަކީ މެޗުގެ ފުރިހަމަ ވަގުތު ހަމަވެގެން ދެއްކި އިތުރު ވަގުތުގެ ތެރޭގައި ގްރަނާޑާ ކުޅުންތެެރިއެއް އަތުން ބައިކޮޅަށް ވަތް ލަނޑެކެވެ.
ޔުއެފާ ޔޫރޮޕާ ލީގުގެ ސެމީ ފައިނަލުގައި މެންޗެސްޓަރ ޔުނައިޓެޑް ވާދަކުރަން ޖެހޭނީ އަޔެކްސް ބަލިކޮށް ސެމީން ޖާގަ ހޯދި ރޯމާ އާ ދެކޮޅަށެވެ.
