ދިރާގު ދިވެހި ޕްރިމިއަރ ލީގުގެ ގަދަ ހަޔެއްގެ ތެރޭގައި ހިމެނުމަށް ކްލަބް ގްރީން ސްޓްރީޓްސް ބަލިކުރުން މުހިއްމުކަމަށް ކްލަބް އީގަލްސްގެ ކޯޗު މުހައްމަދު ޝާޒްލީ ބުނެފިއެވެ.
ޕްރިމިއަރ ލީގުގައި ގްރީން ސްޓްރީޓްސް އާއި ދެކޮޅަށް ނުކުތުމުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ޝާޒްލީ ބުނީ، އީގަލްސްގެ ކޯޗު ކަމާއި ހަވާލުވެގެން ޓާގެޓަކަށް ހެދީ ގަދަ ހަޔެއްގެ ތެރެއަށް ވަނުމަށްކަމަށެވެ. މިފަހަރުގެ ސީޒަންގެ ކުރީކޮޅު އީގަލްސްގެ ނަތީޖާތައް ދިޔައީ އެހާ ރަނގަޅަށް ނޫންކަން ޝާޒްލީ ވަނީ ޕްރެސްގައި ފާހަގަކޮށްފައެވެ. ޝާޒްލީ ބުނީ ޓާގެޓަށް ވާސިލްވުމަށްޓަކައި ގްރީން ސްޓްރީޓްސް ބަލިކުރުން ވަރަށް މުހިއްމު ކަމަށާއި، މި މެޗަށް އީގަލްސް އޮތީ ފުރިހަމައަށް ތައްޔާރުވެފައި ކަމަށެވެ.
ޝާޒްލީ ބުނީ އޭއެފްސީ ކަޕުގެ ޕްރިލިމިނަރީ ސްޓޭޖުގައި ބޫޓާންގެ ތިމްޕޫ ސިޓީ ބަލިކުރުމަށްފަހު މި މެޗަށް ނުކުންނަން ޖެހުމަކީ އެޓީމަށް ލިބޭ އެޑްވާންޓޭޖެކޭވެސް ބުނެވިދާނެކަމަށެވެ. އަދި އެ މެޗު ކާމިޔާބުުކުރެވިފައި އޮތުމަކީވެސް އީގަލްސްއަށް ލިބޭ އިތުރު ހިތްވަރެއްގެ ގޮތުގައި ޝާޒްލީ ފާހަގަކުރިއެވެ.
އީގަލްސް އާއި މި އަހަރު ހަވާލުވީއިރުގައި ދެން ފުރަތަމަ ރައުންޑުގައި އެހާ ރަނގަޅަކަށް ނޫން ކަންނޭންގެ އީގަލްސް ދިޔައިކީ. ދެން ހަވާލުވީއިރުގައި އެންމެ ބޮޑު އަމާޒަކަށް މިއިނީ ގަދަ 6 އެއްގެ ތެރެއަށް ވަނުން. އަދިވެސް އެއީ އީގަލްސްއަށް އޮތް އެންމެ މުހިއްމު ކަންތައް. އެކަމަށް މި މެޗުވެސް ވަރަށް މުހިއްމު. މެޗުގެ ކުރިން ވާހަކަ ދައްކަމުން ޝާޒްލީ ބުންޏެވެ.
ކްލަބް ގްރީން ސްޓްރީޓްސް އާއި ގުޅޭ ގޮތުން ވާހަކަ ދައްކަމުން ޝާޒްލީ ބުނީ، އެޓީމަކީ މިފަހަރުގެ ސީޒަން ފަށައިގެން އައިރުވެސް އެންމެ ރަނގަޅަށް އޮތް އެއް ޓީމުކަމަށެވެ. އަދި ލީގު ތާވަލަށް ބަލާއިރުވެސް އެޓީމު އޮތީ ރަނގަޅު ހިސާބެއްގައިކަން ކޯޗު ފާހަގަކުރިއެވެ.
ދިރާގު ދިވެހި ޕްރިމިއަރ ލީގުގައި މިހާތަނަށް ކުޅުނު 12 މެޗުން ހޯދި 18 ޕޮއިންޓާއެކު ގްރީން ސްޓްރީޓްސް އޮތީ ތާވަލްގެ 3 ވަނައިގައެވެ. އަދި 10 މެޗު ކުޅެގެން ލިބުނު 12 ޕޮއިންޓާއެކު ކްލަބް އީގަލްސް އޮތީ ލީގުގެ 7 ވަނައިގައެވެ.
ދިވެހި ޕްރިމިއަރ ލީގުގައި ކްލަބް ގްރީން ސްޓްރީޓްސް އާއި ކްލަބް އީގަލްސް ބައްދަލުކުރާ މެޗު ފަށާނީ މިރޭ 10:00 ގައެވެ.
