ދިރާގު ދިވެހި ޕްރިމިއަރ ލީގުގައި ކްލަބް އީގަލްސް އާއި ދެކޮޅަށް ނުކުންނައިރު، ކްލަބް ގްރީން ސްޓްރީޓްސްއަށް އަނިޔާގެ މައްސަލަތައް ކުރިމަތިވެފައިވާކަމަށް އެޓީމުގެ ކޯޗު އަލީ ނިސްތާރު ބުނެފިއެވެ.
އީގަލްސްއާއި ދެކޮޅަށް ނުކުތުމުގެ ކުރިން ރަސްމީ ފުޓްބޯޅަ ދަނޑުގައި ބޭއްވި ޕްރި މެޗު ޕްރެސްކޮންފަރެންސްގައި ވާހަކަ ދައްކަމުން ގްރީންގެ ކޯޗު ޢަލީ ނިސްތާރު ބުނީ، މުހިއްމު މެޗަކާއި ކުރިމަތިލާއިރު ޓީމުގެ މުހިއްމު ކުޅުންތެރިންތަކެއް ތިބީ އަނިޔާގައި ކަމަށެވެ. އެގޮތުން ގްރީންއަށް ކުޅުމެން އަންނަ މިސްރުގެ ކުޅުންތެރިޔާ ހަލީލް ޖަމާލްވެސް އޭނާއަށް ވެފައިވާ އަނިޔާއަށް ފަރުވާ ހޯދަމުން އަންނަކަމަށް ނިސްތާރު ބުންޏެވެ. ނިސްތާރު ބުނީ ހަލީލްގެ އިތުރުން އަދިވެސް އިތުރު ކުޅުންތެރިން ތިބީ މުޅިން ފިޓްކޮށް ނޫން ކަމަށާއި މިވަގުތު އެ ކުޅުންތެރިންގެ ނަންތައް މީޑިއާއަށް ހާމަކުރަން ބޭނުން ނުވާކަމަށެވެ.
ނިސްތާރު ބުނީ އެޓީމުގެ މުހިއްމު ކުޅުންތެރިންނަށް އަނިޔާގެ މައްސަލަތަކާއި ކުރިމަތިލާން ޖެހުނީ ލީގުގައި އެންމެ ފަހުން ޓީސީ ސްޕޯޓްސް ކްލަބާއި ދެކޮޅަށް ކުޅުނު މެޗަށް ފަހުކަމަށެވެ. ޕްރެސްގައި ވާހަކަ ދައްކަމުން ނިސްތާރު ވަނީ އެންމެ ފަހުން ލީގުގައި ޓީސީ އާއި ދެކޮޅަށް ކުޅުނު މެޗު ރަގްބީ މެޗެއްގެ ގޮތުގައި ސިފަކޮށްފައެވެ.
"މީގެ ކުރިން އަޅުގަނޑުމެން ކުޅުނު ރަގްބީ މެޗަށްފަހު ވަރަށް އިންޖަރީސް ގިނަ. އެހެންވީމަ އިންޝާﷲ ދެން ރަނގަޅުވާނެކަމަށް މި ބަލަނީ. ދެން ވަރަށް ކީ ޕްލެޔަރެއް ހަލީލް. ހަލީލް މިހާރު އެދަނީ ޓްރީޓްމަންޓް ނަގަމުން. ދެން އަދިވެސް ބައެއް ޕްލެޔަރުން އެބަތިބި. މިވަގުތު އަޅުގަނޑު ބޭނުމެއް ނޫން އެއާ ބެހޭގޮތުން މާ ބޮޑު ތަފްސީލަކަށް ދާކަށް."
މެޗުގެ ކުރިން ބޭއްވި ޕްރެސްގައި ވާހަކަ ދައްކަމުން ނިސްތާރު ބުންޏެވެ.
ކްލަބް ގްރީން ސްޓްރީޓްސް އާއި ދެކޮޅަށް ނުކުންނަ ކްލަބް އީގަލްސް އާއި ގުޅޭޭގޮތުން ވާހަކަ ދައްކަމުން ނިސްތާރު ބުނީ، ލީގުގެ ހަތްވަނައިގައި އެޓީމު އޮތްނަމަވެސް، މި މެޗަށް ނުކުންނައިރު އީގަލްސް އޮތީ ވަރަށް ފޯމުގައި ކަމަށެވެ. އަދި ކުރިޔަށް އޮތް ދެ މެޗު އީގަލްސް އިން ކާމިޔާބުކޮށްފިކަމަށްވާނަމަ ގަދަ ހަތަރަކަށް އެރުމުގެ ފުރުޞަތު އޮތުމުން މި މެޗުގައި އެންމެ ތަންކޮޅެެއްވެސް އެޓީމުން ދޫނުކުރާނެކަން އިނގޭކަމަށް ނިސްތާރު ބުންނެވެ.
ދިރާގު ދިވެހި ޕްރިމިއަރ ލީގުގައި މިހާތަނަށް ކުޅުނު 12 މެޗުން ހޯދި 18 ޕޮއިންޓާއެކު ގްރީން ސްޓްރީޓްސް އޮތީ ތާވަލްގެ 3 ވަނައިގައެވެ. އަދި 10 މެޗު ކުޅެގެން ލިބުނު 12 ޕޮއިންޓާއެކު ކްލަބް އީގަލްސް އޮތީ ލީގުގެ 7 ވަނައިގައެވެ.
ދިވެހި ޕްރިމިއަރ ލީގުގައި ކްލަބް ގްރީން ސްޓްރީޓްސް އާއި ކްލަބް އީގަލްސް ބައްދަލުކުރާ މެޗު ފަށާނީ މިރޭ 10:00 ގައެވެ.
