ވެސްޓް ހޭމް ޔުނައިޓެޑަށް ކުޅެމުން އަންނަ އިންގްލެންޑުގެ މިޑްފީލްޑަރު ޖެސޭ ލިންގާޑަށް ޔޫރަޕުގެ ބޮޑެތި ކުލަބުތަކުން ފާރަލަމުން އަންނަ ކަމަށް ރިޕޯޓުތައް ބުނެފިއެވެ.
ވެސްޓް ހޭމަށް ބަދަލުވުމަށްފަހު ކެރިއަރުގައި އައު ތަޖުރިބާއެއް ކުރަން ކެތްމަދުވެފައިވާ ކަމަށް ލިންގާޑް ބުނިއިރު، އޭނާ އަންނަނީ އެ ޓީމުގައި ތަފާތު މޮޅު ކުޅުމެއް ދައްކަމުންނެވެ. އެގޮތުން މިހާތަނަށް ވެސްޓް ހޭމަށް ކުޅެދުން ނުވަ މެޗުގައި އޭނާ ވަނީ އަށް ލަނޑު ޖަހާފައެވެ. އަދި ވެސްޓް ހޭމުން އެންމެ ފަހުން ކުޅުނު ހަތަރު މެޗުގައިވެސް ލިންގާޑް ވަނީ ލަނޑު ޖަހާފައެވެ. އަދި މީގެ އިތުރުން މި ފަހަކަށް އައިސް ދައްކަމުން އަންނަ މޮޅު ކުޅުމާއެކު، އޭނާ ވަނީ އިންގްލެންޑުގެ ޤައުމީ ފުޓްބޯޅަ ޓީމުގެ ޖާގައެއްވެސް އަލުން ހޯދާފައެވެ.
ލިންގާޑަށް ޔޫރަޕުގެ ބޮޑެތި ކުލަބުތަކުން ފާރަލާން ފެށިއިރު، ޕީއެސްޖީ އާއި، ރެއާލް މެޑްރިޑް އަދި އިންޓަ މިލާނުން ލިންގާޑް ހޯދަން މަސައްކަތްކުރަމުން އަންނަ ކަމަށް މަޝްހޫރު ކުޅިވަރު ނޫސް "އީއެސްޕީއެން" އިން ވަނީ ރިޕޯޓުކޮށްފައެވެ. ލިންގާޑަށް ޔޫރަޕުގެ ބޮޑެތި ކުލަބުތަކުން ފާރަލަމުން އަންނައިރު، އޭނާގެ ލޯނު އެއްބަސްވުން ދާއިމީކުރުމަށް ވެސްޓް ހޭމުން އަންނަނީ މަސައްކަތްކުރަމުންނެވެ. މި ސީޒަން ނިމުމުން ލިންގާޑުގެ ލޯނު އެއްބަސްވުން ހަމަވާއިރު، އޭނާ ޔުނައިޓެޑާއެކު ހަދާފައިވާ އެއްބަސްވުމުގައި އަދި ބާކީ އެއް އަހަރު އެބައޮތެވެ.
ކޮމެންޓު ފޮނުވާ