އިނގިރޭސިލީގުގައި އާސެނަލްއާ ވާދަކޮށް 1-0 ލަނޑުން ހޯދުނު މޮޅަކީ މިއީ ސިޓީގެ އަސްލުފެންވަރެއް ނޫންކަމަށް ކޯޗު ޕެޕް ގާޑިޔޯލާ ބުނެފިއެވެ.
މެޗަށްފަހު ވާހަކަދައްކަމުން ސިޓީގެ ކޯޗު ގާޑިޔޯލާ ބުނީ މިއަށްވުރެން ރަނގަޅަށް މެންޗެސްޓަރ ސިޓީއަށް ކުޅެވެން ވާނެކަމަށެވެ. މިއީ އުނދަގުލުން ހޯދުނު މޮޅެއްކަމަށް މެންޗެސްޓަރ ސިޓީގެ ކޯޗު ޕެޕް ގާޑިޔޯލާ ބުނެފައިވެއެވެ. އޭނާ ބުނީ ސިޓީގެ އެންމެ މޮޅުކުޅުން އެޓީމަށް ނުދެއްކެނީ ސަބަބުތަކެއް އޮވެގެންކަމަށާއި އުންމީދަކީ ވަރަށް އަވަހަށް ސިޓީގެ މޮޅުކުޅުން ފެންނާނެކަމަށެވެ.
ވަރަށް ގިނަ ސަބަބުތަކާ ހުރެ އަދި މިދެއްކެނީ ސިޓީގެ އެންމެ މޮޅު ކުޅުމެއް ނޫން، އެކަމަކު ނަތީޖާ މެދު ހިތްހަމަޖެހޭ.
– ގާޑިޔޯލާ
ގާޑިޔޯލާ ބުނީ މިދަނޑިވަޅުގައި ސިޓީއަށް ލިބުނީ ވަރަށް މުހިންމު މޮޅެއްކަމަށާއި މިއީ ސިޓީން ހޯދި ވަރަށް މުހިންމު ތިންޕޮއިންޓް ކަމަށެވެ. މެޗުގައި ޓީމުގެ ފަހަތުން މޮޅުކުޅުމެއް ދެއްކިކަމަށް ގާޑިޔޯލާ ވަނީ ފާހަގަކޮއްފައެވެ. މި މޮޅާއެކު މެންޗެސްޓަރ ސިޓީ ވަނީ ތާވަލުގެ 9 ވަނައަށް ކުރިޔަށް ޖެހިލާފައެވެ.
އެންމެފަހުން ސިޓީ އާސެނަލާ ދެކޮޅަށް ލީގުގައި ކުޅުނު 10 މެޗުވެސް ސިޓީ ވަނީ ކާމިޔާބުކޮށްފައެވެ. ސިޓީ އެންމެފަހުން އާސެނަލް އަތުން ބަލިވީ 2015 ވަނަ އަހަރު ޑިސެންބަރު މަހު 2-1 ލަނޑުންނެވެ.
