އެވަޓަން އިން ފުރުސަތު ނަގާލައިފި

އިނގިރޭސި ޕްރިމިއަރ ލީގުގައި ބްރައިޓަން އެންޑް ހޯވް އެލްބިއަން އާއި އެވަޓަން ބައްދަލުކުރިމެޗް އެއްވަރުވެއްޖެއެެވެ.

ބްރައިޓަންގެ ދަނޑުގައި ކުޅުނު މިމެޗްގައި ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ކުރެވިފައެއް ނުވެއެެވެ. ދެޓީމްގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ އުފައްދާފައިވަނީ ބްރައިޓަންއެވެ. ނަމަވެސް އެހެން މެޗްތަކެކޭ އެއްގޮތަށް މިމެޗްގައިވެސް އެޓީމަށް ލިބުނު ފުރުސަތުތަކުގެ ބޭނުން ހިފޭގޮތެއް ނުވިއެވެ. މިމެޗްގައި ބްރައިޓަންއަށް ލިބުނު އެންމެ ހުސް ފުރުސަތު ލިބިގެން ގޮސްފައިވަނީ ނީލް މައުޕޭއަށެވެ.

މިމެޗްގައި އަނިޔާގެ ސަބަބުން އެވަޓަންގެ ހުނަރުވެރި ފޯވަޑް ޑޮމިނިކް ކަލްވަރޓް ލުވިން ކުޅެފައެވެ ނުވެއެެވެ. އަދި އެވަޓަންއަށް ބްރައިޓަންގެ ގޯލަށް ހަމަލާއެއް އެންމެ ފުރަތަމަ ފޮނުވާލެވޭވަރުވީވެސް މެޗްގެ 71 ވަނަ މިނެޓްގައެވެ. މިމެޗްގައި ޗެމްޕިއަންސް ލީގުގެ ޖާގައަކަށް ވާދަކުރަމުންދާ އެވަޓަންގެ ފަރާތުން ފެނިގެންދިޔައީ ވަރަށް އާދައިގެ ކުޅުމެކެވެ.

މިމެޗް އެއްވަރުވުމުން މިއަންނަ ސީޒަންގައިވެސް އިންގްލިޝް ޕްރިމިއަރ ލީގުގައި ބްރައިޓަންއަށް ވާދަކުރުމުގެ ފުރުސަތު ލިބޭނެކަން މިހާރުވަނީ ގާތްގަނޑަކަށް ޔަގީން ވެފައެެވެ. މިމެޗުން މޮޅުވި ނަމަ އެކަން ޔަގީން ވީހެވެ. ނަމަވެސް މިމެޗުން ލިބުނު އެއް ޕޮއިންޓާއެކު ބްރައިޓަން މިހާރުވަނީ ތާވަލްގެ 15 ވަނައަށް ކުރިއަށް ޖެހިލާފައެވެ.

އެޓީމަށް މިހާރު ލިބިފައިވަނީ 31 މެޗުން 33 ޕޮއިންޓެވެ. އަދި 18 ވަނައިގާ އުޅޭ ފުލަމް އާއި ދެމެދުގައިވާ ފަރަގު މިހާރު ވަނީ 7 ޕޮއިންޓަށް ލިތުރުވެފައެެވެ. ބްރައިޓަން އާއި ހިލާފަށް އެވަޓަން އަށް މިމެޗް އެއްވަރު ވުމުން މިއަންނަ ސީޒަންގައި ޗެމްޕިއަންސް ލީގުގެ ޖާގައެއް ހޯދުމަށް ކުރަމުންދާ މަސައްކަތަށް މިވަނީ ހުރަސްތަކެއް ދިމާވެފައެވެ.