އޭއެފްސީ ކަޕްގެ ކޮލިފައިން ދެ ވަނަ ބުުރުގައި ބަންގްލަދޭޝްގެ ޑާކާ އަބަހާނީން ރާއްޖޭގެ އީގަލްސްއާ ދެކޮޅަށް ކުޅެން އޮތް މެޗު ނޭޕާލުގައި ކުޅެން އަބަހާނީން އޭއެފްސީ އަށް ހުށަހަޅާފައިވާ ކަމަށް ބަންގްލަދޭޝްގެ މީޑިއާ ރިޕޯޓްތައް ބުނެފިއެވެ.
އީގަލްސް އާއި އަބަހާނީގެ މެޗު ފުރަތަމަ ޝެޑިއުލްކޮށްފައި އޮތީ އަންނަ ބުދަ ދުވަހު ކުޅޭ ގޮތަށެވެ. އެކަމަކު ބަންގްލަދޭޝްގައި ކޮވިޑްގެ ކޭސްތައް ގިނަވެ، އެ ގައުމު ލޮކްޑައުންއެއްގައި އޮތުމުން އެ ގައުމުގައި މެޗު ކުޅެވޭނެ ގޮތެއް ނުވުމުން އޭއެފްސީ އަށް ޖެހުނީ ބަދަލުތަކެއް ގެންނާށެވެ. ބަންގްލަދޭޝްގެ ފުޓްބޯޅަ ފެޑެރޭޝަނާއި އެ ގައުމުގެ ހެލްތު މިނިސްޓްރީން ވަނީ ހާއްސަ ހުއްދައެއްގެ ދަށުން އޭއެފްސީ ކަޕްގެ މެޗު ކުޅެވޭނެ ކަމަށް މީގެ ކުރިން ބުނެފައެވެ. އެނގިފައިވާ ގޮތުގައި ފަހުން އެ ގައުމުގެ ހެލްތު މިނިސްޓްރީން މާ ބޮޑު އެއްބާރުލުމެއް ނުދޭތީ މެޗު ބޭއްވޭ ގޮތެއްނުވީއެވެ.
ހާލަތަށް ބަލައި އޭއެފްސީން ވަނީ އަބަހާނީ އާއި އީގަލްސް ކުޅޭ މެޗު މި މަހު 21 ވަނަ ދުވަހަށް ފަސްކޮށްފަ އެވެ. އަދި އެ މެޗު މި މަހު 21 ވަނަ ދުވަހު ކުޅޭނެ ނިއުޓްރަލް ދަނޑެއް ހޯދުމަށް އަބަހާނީ އަށް ފުރުސަތެއް ދިނެވެ. ނިއުޓްރަލް ދަނޑެއް ހޯދަން ދިން މުހުލަތު ވަނީ ރޭގެ ނިޔަލަށް ހަމަވެފައެވެ.
އަބަހާނީން ފުރަތަމަ މަސައްކަތްކުރީ މެޗު އިންޑިއާގައި ކުޅޭށެވެ. އެކަމަކު އެކަން ކުރެވޭގޮތެއް ނުވުމުން ނޭޕާލުގައި މެޗު ކުޅެން ހުށަހެޅީ އެވެ. ނޭޕާލްގައި ކުޅެން ހުށަހެޅިކަން އަބަހާނީގެ ޓީމު މެނޭޖަރު ސަތުޔަޖީތު ދާސް ރޫޕޫ ވަނީ ބަންގްލަދޭޝް މީޑިއާ އަށް ކަށަވަރުކޮށްދީފަ އެވެ. މެޗު ކުޅޭނެ ދަނޑަކާ ބެހޭގޮތުން އޭއެފްސީން ގޮތެއް ނިންމުމަށް ފަހު ވަރަށް އަވަހަށް އިއުލާނުކުރާނެ އެވެ. އަބަހާނީ ހުށަހަޅާ ގޮތައް މެޗު ކުޅެވޭ ގޮތް ނުވެއްޖެނަމަ ދެން މެޗު އޮންނީ މާލޭގެއެވެ.
ކޮމެންޓު ފޮނުވާ