ތިންވަނަ ޑިވިޝަން ފުޓްބޯޅަ މުބާރާތް މިމަހުގެ 18 ވަނަ ދުވަހު ފަށަން ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފިއެވެ.
އެންމެ ފުރަތަމަ މި މުބާރާތް ފެށުމަށް އެފްއޭއެމުން ތާވަލުކުރީ ފެބްރުއަރީ އެއްވަނަ ދުވަހުއެވެ. އެކަމަކު ފަހުން މި މުބާރާތް ފަށަން ފެބްރުއަރީ މަހުގެ ހަތަރުވަނަ ދުވަހަށް ތާވަލުކުރިއިރު، އަދި އޭގެ ފަހު ވަނީ ފެބްރުއަރީ މަހުގެ 10 ވަނަ ދުވަހު މުބާރާތް ފަށަންވެސް ތާވަލްކޮށްފައެވެ.
މި އަހަރުގެ ތިންވަނަ ޑިވިޝަން ފުޓްބޯޅަ މުބާރާތުގެ ކުޅުން އަންނަ އާދީއްތަ ދުވަހު ފަށާއިރު މި މުބާރާތުގައި ވާދަކުރާނީ 15 ޓީމެވެ. އެންމެ ފުރަތަމަ މުބާރާތުގައި ބައިވެރިވާން ހުޅުވާލި ފުރުސަތުގައި 22 ޓީމަކުން މުބާރާތުގައި ބައިވެރިވާން ފޯމު ހުށަހެޅި ނަމަވެސް، ގިނަ ޓީމުތަކެއްގެ ލިޔެކިޔުންތައް ހަމަކުރުމުގައި ދަތިތަކެއް ހުރުމުން ދެ ފަހަރެއްގެ މަތިން އެފްއޭއެމުން މުއްދަތު އިތުރުކޮށްދިނެވެ. އެ މުއްދަތުގައި 16 ޓީމަކުން ލިޔެކިއުންތައް ހުށަހެޅި ނަމަވެސް، އަމިއްލަ ސަބަބުތަކާ ހުރެ އެއް ޓީމުން ވަނީ މުބާރާތާ ވަކިވާން ނިންމާފައެވެ.
އެހެންކަމުން މި މުބާރާތް ކުރިއަށް ގެންދިޔުމަށް އެފްއޭއެމުން ނިންމާފައިވަނީ ހަތަރު ގްރޫޕަކަށް ބަހާލައިގެންނެވެ. އެގޮތުން ފުރަތަމަ ތިން ގްރޫޕުގެ ތެރެއިން ކޮންމެ ގްރޫޕެއްގައި ހަތަރު ޓީމު ހިމެނޭއިރު، ފަހު ގްރޫޕުގައި ހިމެނެނީ ތިން ޓީމެވެ. އަދި ގްރޫޕް ސްޓޭޖް މެޗުތަކަށްފަހު ކުއާޓާފައިނަލަށް ކޮންމެ ގްރޫޕަކުންވެސް އެންމެ މޮޅު ދެ ޓީމު ދަތުރުކުރާއިރު، ފައިނަލް މެޗު ކުޅުމަށް އެފްއޭއެމުން ތާވަލުކޮށްފައިވަނީ މާޗު މަހުގެ ނުވަވަނަ ދުވަހުއެވެ.
މި އަހަރު ތިންވަނަ ޑިވިޝަން ފުޓްބޯޅަ މުބާރާތް ބާއްވާއިރު، މިދިޔަ ދެ އަހަރުވެސް މި މުބާރާތް ބާއްވާފައެއް ނުވެއެވެ. އެންމެ ފަހުން މި މުބާރާތް 2018 ވަނަ އަހަރު ބޭއްވިއިރު، އެ ފަހަރު ޗެމްޕިއަންކަން ހޯދީ ރޮކް ސްޓްރީޓްސް ސްޕޯޓްސް ކުލަބެވެ.
