ކޯވިޑް19ގެ ނުރައްކާ އަދިވެސް ކުޑަވެގެން ގޮސްފައި ނުވާތީއާއި، އަދި މި ހާލަތުގައި، އާއިލާގެ ވީހާވެސް ގިނަ ބަޔަކަށް ޖަނާޒާގައި ބައިވެރިވުމުގެ ފުރުސަތު ދިނުމުގެ ގޮތުން، އިގިރޭސި ރާނީގެ ފިރިކަލުން، ޕްރިންސް ފިލިޕްގެ ޖަނާޒާއަށް ވަޑައި ނުގެންނެވުމަށް އިގިރޭސި ބޮޑު ވަޒީރު ބޮރިސް ޖޯންސަން ނިންމަވައިފިއެވެ.
ވިންޑްސަރގެ، އެސްޓީ ޖޯޖްސް ޗަޕެލް ގައި ބޭއްވުމަށް ހަމަޖެހިފައިވާ ޕްރިންސް ފިލިޕްގެ ޖަނާޒާއަށް ހާޒިރުވުމަށް ހަމަޖެހިފައިވަނީ، އޭނާގެ ދަރިންނާއި، ކާފަ ދަރިންގެ އިތުރުން އާއިލާގެ އެހެން މެމްބަރުން ހިމެނޭގޮތުން 30 ވަރަކަށް މީހުންނެވެ.
އާންމު ރައްޔިތުންވެސް ޖަނާޒާގެ އެއްވެސް ކަމެއްގައި ބައިވެރި ނުވުމަށް، ކަމާ ގުޅުހުންހުރި އިދާރާތަކުންވަނީ އިލްތިމާސް ކޮށްފައެވެ.
ޕްރިންސް އޮފް ވޭލްސް، ޗާރލްސް ވަނީ، ހޮނިހިރު ދުވަހު އޭނާގެ ބައްޕައަށް އެންމެ ފަހުގެ އަލްވަދާއު ވިދާޅުވެފައެވެ. އަދި ވިދާޅުވެފައި ވަނީ، ބައްޕަގެ ހަނދާންތަކާ ދުވަހަކުވެސް ދުރަށް ނުދެވޭނެ ކަމަށެވެ.
ގްލޯސެސްޓަރޝަޔަރގައި ހުންނަ އޭނާގެ ގެ، ހައިގްރޫވްގައި ހުންނަވާ ވާހަކަ ދައްކަވަމުން ޕްރިންސް ޗާލްސް ވިދާޅުވެފައިވަނީ، "ބައްޕައަކީ ހުރިހާ ގޮތަކުންވެސް ޚާއްސަ މީހެއް" ކަމުގައެވެ.
"މި ހިތާމަ އެތަކެއް ދުވަސް ވަންދެން އަހަރެމެންގެ އާއިލާ ތެރޭގައި ދިގުދެމިގެން ދާނެ،" ޕްރިންސް ޗާލްސް ވިދާޅުވެފައި ވެއެވެ.
ޕްރިންސް ފިލިޕް އަވަހާރަ ވެފައިވަނީ، ވިންޑްސަރ ކާސަލްގައި، ހުކުރުދުވަހު، އުމުރު ފުޅުން 99 އަހަރުގައެވެ. މިއަދު ހަވީރުގެ ވަގުތެއްގައި، ޕްރިންސް ފިލިޕްގެ ހަދާން އާކުރުމުގެ ހަފްލާއެއް، ސެންޓަބަރީ ކެތެޑްރަލްގައި ބޭއްވުމަށް ވަނީ ހަމަޖެހިފައެވެ.
އިގިރޭސިވިލާތުގެ ޝާހީ ގަޑުވަރުު، ބަކިންހަމް ޕެލަސްއިން އިން ހާމަ ކޮށްފައިވާ ގޮތުގައި، ޕްރިންސް ފިލިޕްގެ ޖަނާޒާ ބޭއްވުމަށް ހަމަޖެހިފައިވަނީ، އޭނާގެ ވަސިއްޔަތާއި އެއްގޮތަށް، އަދި ކޯވިޑް ފިޔަވަޅުތަކާއި އެއްގޮތަށް، ވީހާވެސް މަދު އަދަދެއްގެ އާއިލީ މެމްބަރުން ހާޒިރުވާ ގޮތަށެވެ.
ބުނެވޭ ގޮތުގައި، ޕްރިންސް ފިލިޕްއަކީ، އޭނާ އަވަހާރަ ވުމަށްފަހު، ރަސްމީ އިއްޒަތުގައި ބޮޑު ޖަނާޒާއެއް ބޭއްވުމަށް އެއްވެސް އިރަކު ބޭންފުޅުވީ ބޭފުޅެއް ނޫނެެވެ.
ވަގުތުން ދުރަށް ދެއްކުމަށް ހަޖެހިފައިވާ މި ޖަނާޒާއަކީ، ޝާހީ އާއިލާގެ މެމްބަރަކު އަވަހާރަވުމުން އާންމުކޮށް ބައްވާޒާތުގެ ޝާހީ ޖަނާޒާއެއްގެ ބަދަލުގައި، ރަމްޒީ އިހުތިފާލެއްގެ ގޮތަށް ބޭއްވުމަށް ހަމަޖެހިފައިވާ ޖަނާޒާއެކެވެ.
