ޔުވެންޓަސް އެއްވަރު ވެއްޖެ

އިޓާލިއަން ލީގުގައި ޓޮރީނޯއާ އެންމެ ފަހުގެ ޗެމްޕިއަން ޔުވެންޓަސް އެއްވަރުވެއްޖެއެވެ.

ޓޮރީނޯ އާއި ޔުވެންޓަސް ބައްދަލުކުރި މެޗު އެއްވަރުވީ 2-2 ލަނޑުންނެވެ. ޓޮރީނޯގެ ދަނޑުގައި ކުޅުނު މި މެޗުގައި އެންމެ ފުރަތަމަ ލަނޑު ޖަހާ ލީޑު ނަގާފައިވަނީ ޔުވެންޓަސްއިންނެވެ. އެގޮތުން މެޗުގެ 13 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ފެޑެރިކޯ ކިއޭސާއެވެ. އެކަމަކު މެޗުގެ 27 ވަނަ މިނެޓުގައި އެންޓޯނިއޯ ސަނާބްރިއާ ވަނީ ލަނޑެއް ޖަހައި، ޓޮރީނޯއަށް ނަތީޖާ އެއްވަރުކޮށްދީފައެވެ.

މެޗުގައި ޓޮރީނޯއިން ފަހަތުން އަރައި ލީޑު ނަގާފައިވަނީ ދެވަނަ ހާފު ފަށައިގެން ފުރަތަމަ މިނެޓުގައެވެ. މި ލަނޑުވެސް އެ ޓީމަށް ކާމިޔާބުކޮށްދިނީ ސަނާބްރިއާއެވެ. އެކަމަކު މެޗު ނިމެން 11 މިނެޓަށް ވެފައި ވަނިކޮށް އިތުބާރު ފޯވާޑް ކްރިސްޓިއާނޯ ރޮނާލްޑޯ ވަނީ ލަނޑެއް ޖަހައި، މި މެޗުން ޔުވެންޓަސް ބަލިވިޔަ ނުދީ ސަލާމަތްކޮށްދީފައެވެ.

މި ނަތީޖާ އެކު ޔުވެންޓަސް އޮތީ ތާވަލުގެ ހަތަރުވަނައިގައި 28 މެޗުން 56 ޕޮއިންޓާއެކުއެވެ.