އިނގިރޭސި ޕްރިމިއާ ލީގުގައި އަމިއްލަ ދަނޑުގައި ވެސްޓް ބްރޮމްވިޗް އެލްބިއަން އަތުން 5-2 އިން ބަލިވެ, ޗެލްސީގެ ކޯޗުކަމާ ހަވާލުވެ ތޯމަސް ޓުޗެލް ދަމަހައްޓަމުން އައި ބަލިނުވުމުގެ ރެކޯޑަށް ނިމުން އައިސްފި އެވެ.
މެޗުގައި ޗެލްސީން ލީޑުނެގީ މެޗުގެ 27 ވަނަ މިނިޓްގައި ކްރިސްޓިއަން ޕުލިސިޗް ޖެހި ގޯލުންނެވެ. އެކަމަކު ޗެލްސީ އަށް މައްސަލަ ދިމާވީ އޭގެ ދެ މިނިޓް ފަހުން އެ ޓީމުގެ ތަޖުރިބާކާރު ޑިފެންޑަރު ތިއާގޯ ސިލްވާ އަށް ދެ ވަނަ ރީނދޫ ކާޑާ އެކު ރަތް ކާޑު ދެއްކުމުންނެވެ. ލީގުގެ 19 ވަނައިގައި އޮތް ވެސްޓް ބްރޮމް އިން ވަނީ ފުރަތަމަ ހާފުގެ އިތުރު ވަގުތުގައި ދެ ގޯލު ޖަހައި މެޗުގެ ނަތީޖާ އަނބުރާލައިފަ އެވެ. ދެ ގޯލު ވެސް ޖެހީ މަތައިސް ޕެރޭރާ އެވެ. ދެ ވަނަ ހާފްގެ ކުޅުން ފެށިގެން މެޗުގެ 63 ވަނަ މިނިޓްގައި ކަލުމް ރޮބިންސަންގެ ގޯލުން ވެސްޓް ބްރޮމް ތިން ގޯލުގެ ލީޑެއް ނެގި އެވެ.
ފަސް މިނިޓް ފަހުން ވެސްޓް ބްރޮމް ވަނީ ހަތަރު ވަނަ ގޯލެއް ޖަހައިފަ އެވެ. މި ގޯލު ޖެހީ އެމްބާއޭ ޑިއާގްނޭ އެވެ. ޗެލްސީގެ މޭސަން މައުންޓް ވަނީ ގޯލެއް ޖަހައި ޗެލްސީ އަށް އުއްމީދެއް ހޯދައިދީފަ އެވެ. އެކަމަކު އެ ހިސާބުން ވެސް އިތުރު ހިތްވަރެއްލައިގެން ޗެލްސީ އަށް ކުރިއަށް ނުދެވުމުގެ ނަތީޖާއަކަށްވީ މެޗުގެ އިތުރު ވަގުތުގައި ރޮބިންސަން ވެސްޓް ބްރޮމް އަށް އިތުރު ގޯލެއް ޖަހައިދިނުމެވެ.
މި ނަތީޖާއާ އެކު ޗެލްސީ ލީގުގެ ހަތަރު ވަނައިގައި އޮތީ 30 މެޗުން 51 ޕޮއިންޓް ހޯދައިގެންނެވެ. އެކަމަކު މި ހަފްތާގައި މެޗުތަކުގެ ނަތީޖާ ނުކުންނަ ގޮތަކުން ޗެލްސީ އަށް ހަތަރު ވަނަ ގެއްލުމުގެ ފުރުސަތު ބޮޑެވެ. މި މޮޅާ އެކު ވެސްޓް ބްރޮމް ލީގުގެ 19 ވަނައިގައި އޮތީ 30 މެޗުން 21 ޕޮއިންޓް ހޯދައިގެންނެވެ.
ކޮމެންޓު ފޮނުވާ