ކޯވިޑް19އާއި ގުޅޭގޮތުން ފޭސްބުކުން އެކުލަވާލާފައިވާ މަޢުލޫމާތު ފެތުރުމުގެ އުސޫލުތަކާ ޚިލާފުވެގެން، ވެނެޒުއޭލާގެ ރައީސް މަޑޫރޯގެ ފޭސްބުކް އެކައުން ބްލޮކް ކޮށްފައިވާކަމަށް، ފޭސްބުކުގެ ތަރުޖަމާން ވިދާޅު ވެއްޖެއެވެ.

މަޑޫރޯ މީގެކުރިން ވަނީ، ބުއިމަށް ބޭނުންކުރާ ބޭހެއް ކަމުގައިވާ، ކާރވަޓިވިރްއަކީ ކޯވިޑް19އާއި ދެކޮޅަށް ބޭނުން ކުރެވިދާނެ، މުޢުޖިޒާތެއްފަދަ ބޭހެއް ކަމުގައި އޭނާ ވިދާޅުވާ ވީޑިއޯއެއް އޭނާގެ ފޭސްކުއަށް އަޕްލޯޑް ކުރައްވާފައެވެ. މިގޮތަށް ވިދާޅުވިއިރު، މި ބޭހުން ކޯވިޑް19 އަށް ފަރުވާ ދޭކަމުގެ ސިއްޙީ އެއްވެސް ހެއްކެއް އޭނާ ދައްކަވާފައި ނުވެއެވެ.

"ދުނިޔޭގެ ސިއްޙަތު ޖައްމިއްޔާއިން އަންގާފައިވާ ގޮތުގައި، މިހާތަނަށް ކޯވިޑް19އިން ރައްކާތެރި ކޮށްދޭ އެއްވެސް ބޭހެއް ނެތް،" ފޭސްބުކްގެ ތަރުޖަމާން ރޮއިޓާސް ނިއުސް އޭޖެންސީއަށް މައުލޫމާތު ދެމުން ހޮނިހިރު ދުވަހު ވިދާޅުވެފައި ވެއެވެ.

"ނުރަގަޅު މައުލޫމާތު ފެތުރުމާއި ދެކޮޅަށް އަހަރުމެން އެކުލަވާލާފައިވާ އުސޫލުތަކާއި ޚިލާފުވެފައި ވުމުގެ ސަބަބުން، 30 ދުވަހަށް މި ފޭސްބުކް އެކައުން ބޭނުން ނުކުރެވޭ ގޮތަށް މިހާރުވަނީ ސަސްޕެންޑް ކޮށްފައި، އެހެންނަމަވެސް، ފޭސްބުކް ޕޭޖުގައި ހުރި މައުލޫމާތު ބެލުންތެރިންނަށް ކިޔާލެވޭނެ،" ފޭސްބުުކުއިން ބުނެފައި ވެއެވެ.

ފޭސްބުކުގެ ތަރުޖަމާނު އޭއެފްޕީ ނިއުސް އޭޖެންސީއަށް މައުލޫމާތު ދެމުން ވިދާޅުވެފައިވަނީ، ކޯވިޑް19 އާއި ގުޅިގެން ފަތުރާފައިވާ ހަގީގަތާއި ޚިލާފު މައުލޫމާތު އެކުލެވޭ މިވީޑިއޯ މިހާރުވަނީ ޕޭޖްއިން ނައްތާލެވިފައެވެ.

މި ވީޑިއޯގައި މަޑޫރޯ ވިދާޅުވެފައިވަނީ، ކާރވަޓިވިރް ނަމަކަށް ކިޔާ މި ދިޔައި ބޭހުގެ އެންމެ ތިއްކެއް ދޫމަތީގައި ޖެއްސުމުން، އެއްވެސް ސައިޑް އިފެކްޓަކާ ނުލާ، މުޢުޖިޒާތެއް ފަދައިން ކޯވިޑް19 ރަގަޅުވެގެން ދާކަމަށެވެ.

އަދި މި ބޭހާ ގުޅިގެން އޭނާ ދައްކަވާފައިވާ ވާހަކަތަކަށް ފޭސްބުކުން ފާޑުކިއުމާ ގުޅިގެން، މީގެކުރިން މަޑޫރޯވަނީ، ފޭސްބުކަށް ބަހުގެ ހަލަމާތަކެއްވެސް ދީފައެވެ.

"އެމީހުން އެ ބުނަނީ ކާރވަޓިވިރްއާއި ގުޅިގެން ދުނިޔޭގެ ސިއްޙަތު ޖަމިއްޔާއިން އެއްޗެއް ބުނުމުގެ ކުރިން އަހަރެންނަށް މިބޭހުގެ ވާހަކަ އެއް ނުދެއްކޭނެ ކަމަށް،" މިއަހަރުގެ ފެބްރުއަރީމަހު މަޑޫރޯ ވިދާޅުވެފައި ވެއެވެ. "ކާކު ވެނެޒުއޭލާގެ ވެރިއަކީ؟ ފޭސްބުކްގެ ވެރިފަރާތްތަ؟ ކާކު މުޅި ދުނިޔޭގެ ވެރިއަކީ؟ ފޭސްބުކުގެ ވެރިފަރާތްތަ؟"

މަޑޫރޯގެ ފޭސްބުކް އެކައުންޓް ސަސްޕެންޑް ކުރުމާއި ގުޅިގެން، ވެނެޒުއޭލާގެ އިންފޯމެޝަން މިނިސްޓްރީން އަދި އެއްވެސް ކޮމެންޓެއް ކޮށްފައެއް ނުވެއެވެ.

ޖޯން ހޮޕްކިންސް ޔުނިވަރސިޓީން އާންމު ކޮށްފައިވާ މައުލޫމާތުތަކަށް ބަލާއިރު، ވެނެޒުއޭލާގައި ކޯވިޑް19އަށް ޕޮޒިޓިވް ވެފައިވާ 154،000 މީހުން ތިބިއިރު، މިބަލީގައި މިހާތަނަށް 1،500 މީހުންވަނީ އެގައުމުގައި މަރުވެފައެވެ. ވެނެޒުއޭލާއަކީ 30 މިލިއަން މީހުންގެ އާބާދީއެއް އޮންނަ ގައުމެކެވެ.