ރެޑްވޭވުން ވިއްކާ އަލުއިއްވާއި ފިޔާ ކިލޯއެއް 10 ރުފިޔާއަށް އަގުހެޔޮކޮށްފި އެވެ.
ރެޑްވޭވް ކުންފުނިން ބުނީ ކޮންމެ އަހަރަކުވެސް ރޯދަ މަހު ތަކެތީގެ އަގު އިންތިހާއަށް ބޮޑުވެ އާންމުންގެ ގިނަ ކަންބޮޑުވުންތަކެއް އުފެދޭ ކަމަށާއި ހާއްސަކޮށް ފިޔާ، ބިސް އަދި އަލުވީގެ އަގު އަބަދުވެސް ބޮޑުވެގެންދާކަން ފާހަގަކޮށްލެވޭ ކަމަށެވެ.
އަދި ރެޑްވޭވްގެ އަމާޒަކީ އެކުންފުނިން އާންމުންނަށް މިތަކެތި ހެޔޮއަގެއްގައި ފޯރުކޮށްދިނުން ކަމަށާއި އަގަށް މިގެނެވުނު ހެޔޮ ބަދަލަކީ ރޯދަމަހާ ދިމާކޮށް ގެނެވުނު ބަދަލެއް ކަމަށްވެސް އެކުންފުނިން ބުނެއެވެ.
އަލުއިއްވާއި ފިޔާ ކިލޯއެއް 10 ރުފިޔާއަށް މިއަދު އަގުހެޔޮކޮށްފައި ވާއިރު މީގެކުރިން ބިހެއް 1.5 ރުފިޔާއަށް ރެޑްވޭވުން ވަނީ އަގުހެޔޮކޮށްފަ އެވެ.
އަދި ކޮންޓްރޯލްކުރަން ޖެހިއްޖެ ހާލަތެއްގައި ކޮންޓްރޯލްކޮށްގެން ނަމަވެސް ކަސްޓަމަރުންނަށް ރޯދަމަސް ނިމެންދެން ފިޔާ، ބިސް އަދި އަލުވި ފޯރުކޮށްދިނުމަކީ އެ ކުންފުނީގެ އަމާޒު ކަމަށްވެސް ރެޑްވޭވުން ބުނެއެވެ.
