ފީފާ ވާރލްޑް ކަޕަށް ކޮލިފައިވުމަށް ޔޫރަޕް ސަރަހައްދުގެ ކޮލިފައިންގ ގްރޫޕް ޖީ ގައި ތުރުކީ އާއި ނެދަލަންޑްސް ބައްދަލުކުރިމެޗް ތުރުކީ ކާމިޔާބުކޮށްފިއެެވެ.
ތުރުކީގަ ކުޅުނު މިމެޗް އެޤައުމުން ކާމިޔާބުކުރީ 4-2 ލަނޑުންނެވެ. ފޯރިގަދަ ކުޅުމެއް ފެނިގެންދިޔަ މިމެޗްގައި ގިނައިރު ބޯޅަ ގެންގުޅެ ގިނަ ހަމަލާ ނެދަލަންޑްސްއިން އުފެއްދި ނަމަވެސް މިމެޗްގައި ތުރުކީވިލާތް ފެނުނީ މާ ގޯލާ ރައްޓެހިކޮށެވެ. މިގޮތުން މެޗްގެ ފުރަތަމަ ލަނޑު މެޗްގެ 15 މިނެޓްގައި ބުރާކް ޔިލްމާޒް ޖަހާދިން ލަނޑުން ތުރުކީވިލާތް މިމެޗްގައި ލީޑު ނެގިއެވެ. އަދި މެޗްގެ 34 ވަނަ މިނެޓްގައި ލިބުނު ޕެނަލްޓީއަކުން ޔިލްމާޒްވަނީ އެޤައުމުގެ ލީޑު ފުޅާކޮށްދީފައެެވެ. އަދި ދެވަނަ ހާފްގެ ކުޅުން ފެށުނު ތަނާ ތުރުކީގެ ހަކާން ޗަރަނަގްލޫވަނީ އެޤައުމަށް ތިންވަނަ ލަނޑު ޖަހާދީފައެވެ.
މިމެޗްގައި ނެދަލަންޑްސްއިން ޖެހި ފުރަތަމަ ލަނޑު މެޗްގެ 75 ވަނަ މިނެޓްގައި ޖަހާދިނީ ޑެވީ ކްލާސެންއެވެ. އަދި އޭގެ އެއްމިނެޓްފަހުން ލޫކް ޑެ ޖޮންގ ލަނޑެއް ޖަހާ މިމެޗްގައި ނެދަލަންޑްސްއަށް ހިތްވަރު އާކޮށްދިން ނަމަވެސް ރޭގެ މެޗްގައި ތުރުކީވިލާތަށް މޮޅު ކުޅުމެއް ދައްކަމުންދިޔަ ޔިލްމާޒް 81 ވަނަ މިނެޓްގައި ކާމިޔާބުކުރި ހެޓްރިކާއެކު އެއުންމީދުތައް ފަނޑުވެގެންދިޔައެވެ. މިމެޗްގެ އިތުރު ވަގުތުގައި ނެދަލަންޑްސްއަށް ޕެނަލްޓީއެއްވެސް ލިބުނެވެ. ނަމަވެސް މެމްފިސް ޑެޕާއީ ފޮނުވާލި ޕެނަލްޓީ ކާމިޔާބުވާގޮތެް ނުވިއެެވެ.
ތުރުކީ މިވަގުތު އޮތީ ކުޅުނު ފުރަތަމަ މެޗުން ލިބުނު 3 ޕޮއިންޓާއެކު ގްރޫޕްް ޖީގެ ދެވަނައިގައެވެ. އެއްވަނައިގާ އެއްލަނޑުގެ ތަފާތުން އުޅެނީ ރޭ ޖިބްރޯލްޓަރ އާއި ބައްދަލުކޮށް ފަސޭހަކަމާއެކު މޮޅުވި ނޯވޭއެވެ.
ކޮމެންޓު ފޮނުވާ