ފީފާ ވާރލްޑް ކަޕަށް ކޮލިފައިވުމަށް ޔޫރަޕް ސަރަހައްދުގެ ކޮލިފައިންގ ގްރޫޕް އޭ ގައި ޕޯޗުގަލް އާއި އަޒަރުބައިޖާން ބައްދަލުކުރިމެޗް ޕޯޗުގަލް ކާމިޔާބުކޮށްފިއެވެ.
ޕޯޗުގަލްގައި ކުޅުނު މިމެޗް އެޤައުމުން ކާމިޔާބުކުރީ1-0 ލަނޑުންނެވެ. މިމެޗްގައި ޕޯޗުގަލްއަށް ކާމިޔާބު ކުރެވުނު ހަމައެކަނި ލަނޑަކީ އަޒަރުބައިޖާންގެ ކީޕަރ ޝަހްރުދީން މަހައްމަދަލިޔޭވް އަތުންޖަހާ ފޮނުވާލި ބޯޅައެއް އެޓީމްގެ މަކްސިމް މެޑްވެޑެވް ގައިގާ ޖެހިފައި ބައިކޮޅަށް ވަން ލަނޑެކެވެ. މިމެޗްގައި ޕޯޗުގަލްގެ ކެޕްޓަން އަދި ތަޖްރިބާކާރު ފޯވަޑް ކްރިސްޓިއާނޯ ރޮނާލްޑޯއަށްވެސް މާކާމިޔާބު ރެއަކަށް ނުވިއެވެ.
ރޮނާލްޑޯ ފޮނުވާލި އެއް ހަމަލާ މަހައްމަދަލިޔޭވް ދިފާއު ކުރިއިރު ދެން ފޮނުވާލި ދެ ހަމަލާއެއް ދިޔައީ ގޯލަށް އަމާޒުނުވެ ބޭރަށެވެ. މީގެއިތުރުން ބްރޫނޯ ފެނާންޑޭޒް އާއި ޖޯއޮ ފީލިކްސް ފޮނުވާލީ ދެހަމަލާއެއްވެސް ވަނީ އަޒަރުބައިޖާންގެ ކީޕަރ ހުޝިޔާރުކަމާއެކު ދިފާއުކޮށްފައެވެ.
މިމެޗްގައި އަޒަރުބައިޖާނަށް ޕޯޗުގަލްގެ ގޯލަށް އަމާޒުކޮށް އެންމެ ހަމަލާއެއްވެސް ފޮނުވާލެވޭގޮތެއް ނުވިއެެވެ.
ކޮމެންޓު ފޮނުވާ