މިޔަރު މަސްވެރިކަން ކުރުމަށް ހުއްދަ ދިނުމާއި ގުޅޭގޮތުން މަޝްވަރާކުރަމުންދާ ކަމަށް ފިޝަރީޒް މިނިސްޓަރ ޒަހާ ވަޙީދު ވިދާޅުވެއްޖެ އެވެ.
ރައްޔިތުން މަޖިލީހުގެ އިޤްތިސާދީ ކޮމިޓީގައި މެމްބަރަކު ކުރެއްވި ސުވާލަކަށް ޖަވާބުދެއްވަމުން މިނިސްޓަރ ޒަހާ ވިދާޅުވީ މިޔަރުގެ މަސްވެރިކަމަކީވެސް އެއިން އިޤްތިޞާދަށް ފައިދާކުރާނެ ކަމެއް ކަމަށެވެ.
އަދި ދުނިޔޭގައި މިޔަރު ހިމާޔަތްކޮށްފައިވަނީ މަދު ޤައުމުތަކެއްގައި ކަން ފާހަގަކުރައްވަމުން މިނިސްޓަރ ވިދާޅުވީ ޕަލާއޯ ފަދަ ގައުމުތަކުގައި މިޔަރު ހިމާޔަތްކޮށްފައި ވީނަމަވެސް އެއީ މަސްވެރިކަން ކުރާ ގައުމެއްވެސް ނޫން ކަމަށެވެ.
މިޔަރުގެ މަސްވެރިކަމަށް ހުއްދަދޭން ވިސްނަނީ މެނޭޖް ފިޝަރީއެއްގެ ގޮތަށް ކަމަށާއި މެނޭޖް ފިޝަރީއަކީ ވަކި މުއްދަތަކަށް ހުޅުވާލާފައި، އާބާދީއަށް ގެއްލުން ނުވާ ގޮތަށް އޭގެ މަންފާ ހޯދުމުގެ މަސްވެރިކަމެއް ކަމަށްވެސް ޒަހާ ވަނީ ވިދާޅުވެފައެވެ.
މިޔަރު މަސްވެރިކަން ކުރުމަށް ހުއްދަ ދިނުމަށް މަޝްވަރާކުރަމުންދާ ކަމަށް މިނިސްޓަރ ވިދާޅުވި ނަމަވެސް މަޝްވަރާ ކުރަމުންދަނީ ކޮންބަޔަކާ ކަމެއް މިނިސްޓަރ ހާމައެއް ނުކުރައްވައެވެ.
ރާއްޖޭގައި މިޔަރުގެ މަސްވެރިކަން ފަށާފައި ވަނީ 1970ގެ އަހަރުތަކުގެ ތެރޭގައެވެ. އަދި މިޔަރު ހިމާޔަތްކޮށް މިޔަރުގެ މަސްވެރިކަން މަނާކޮށްފައި ވަނީ 2010 ވަނަ އަހަރުއެވެ.
މިޔަރަކީ ރާއްޖޭގައި ބޭނުމާއި ހިފުން މަނާ ބާވަތެއްގެ ގޮތުގައި ކަނޑައެޅިފަހުން ރާއްޖޭގައި މިޔަރު އިތުރުވެ އެހެނިހެން މަސްވެރިކަމަށް މިޔަރުގެ އުނދަގޫ ފޯރަމުންދާކަމުގެ ޝަކުވާ މަސްވެރިން ގެންދަނީ ކުރަމުންނެވެ.
