ފާއިތުވެދާ 2 އަހަރުތެރޭ އިޒްރާއީލުގައި ބާއްވާ ދެވަނަ އާންމު އިންތިޚާބަށް މަދު ދުވަސްކޮޅަށް ވެފައިވަނިކޮށް، އެގައުމުގެ މަގުތަކުގައި މިހާރުގެ ބޮޑުވަޒީރު ނަތަންޔާހޫއާއި ދެކޮޅަށް އެތައް ހާސް ބަޔަކު މުޒާހަރާ ކޮށްފިއެވެ.
ނަތަންޔާހޫގެ މައްޗަށް ކުރެވެމުންދާ ކޮރަޕްޝަންގެ ތުހުމަތުތަކާ އަދި ކޯވިޑް ކާރިސާގެ ސަބަބުން އިސްރާއީލުގައި އާންމުކުރި ހަރުކަށި ލޮކްޑައުންތަކުގެ ސަބަބުން އިގްތިސާދަށް ކުރަމުންދާ ނޭދެވޭ އަސަރުތަކުގެ ސަބަބުން ފާއިތުވެދިޔަ އަހަރުގެ ޖުލައިމަހުން ފެށިގެން ނަތަންޔާހޫގެ އިސްތިއުފާއަށް ގޮވާ އެތައްބަޔަކުން ދަނީ މުޒާހަރާ ކުރަމުންނެވެ.
އިސްރާއީލުގެ ޑެއިލީ ހާރެޒް ނޫހުން ރިޕޯޓު ކޮށްފައިވާ ގޮތުގައި، ޖެރޫސެލަމްގައި ހުންނަ ބޮޑުވަޒީރުގެ ރަސްމީ ގެކޮޅު ކައިރިއަށް މުޒާހަރާ ކުރުމަށް 20،000 އަށްވުރެ ގިނަ މީހުން ޖަމާވެފައި ވެއެވެ. މިއީ ފާއިތުވެދިޔަ މަސްތަކުގައި އިސްރާއީލުގައި ބޭއްވިގެން ދިޔަ އެންމެ ބޮޑު އެއް މުޒާހަރާއެވެ.
މު މުޒާހަރާގައި، އިސްރާއީލުގެ ދިދަތައް ހިފައިގެން ތިބި ބައިވެރިން، "ބިބި ގެއަށް ދޭ" މި ޝީއާރުގެ ބޭނުންކޮށްގެން ނަތަންޔާހޫގެ އިސްތިއުފާއަށް ގޮވާފައެވެ. ބިބި އަކީ، އިސްރާއީލުގެ ބޮޑުވަޒީރަށް މުޚާތަބު ކުރުމުގައި އިސްރާއީލުގައި ބޭނުން ކުރެވޭ ވަނަމެކެވެ. އަދި މި މުޒާހަރާގައި، ސަރުކާރަށާއި ފުލުހުންނަށް އިތުބާރު ނެތްކަމަށާއި، އަދި އިސްރާއީލުގެ ލީޑަރޝިޕް ބަދަލު ކުރުމަށް އިންގިލާބެއް ގެންނަޖެހިފައިވާ ކަމުގެ އެތަކެއް މެސެޖެއް ފާޅުކޮށް މުޒާހަރާގެ ބައިވެރިންވަނީ ޝުއޫރު ފާޅު ކޮށްފައެވެ.
"އަހަރެމެން މިއައީ ޑިކްޓޭޓަރއަކާއި ދެކޮޅަށް މުޒާހަރާ ކުރުމަށް،" އިސްރާއިލުގެ ވެރިރަށް ޓެލްއަވިވަށް ނިސްބަތްވާ 60 އަަހަރުގެ ލޯޔަރެއް ކަމުގައިވާ އަނަޓް ގައުރެއްލެ، ނަތަންޔާހޫއަށް ނިސްބަތްކޮށް ބުނެފައި ވެއެވެ. "މިހާރު އިސްރާއީލުގައި ހިގަމުންދަނީ ވިސްނާލަންވެސް ދަތި ކަންކަން. ވެރިކަމުގައި ހުރި މީހަކު ރައްޔިތުންގެ މުދަލުން ވައްކަން ކުރަމުން ދިއުމަކީ ގަބޫލު ކުރެވޭނެ ކަމެއް ނޫން،" އޭއެފްޕީ ނޫހާއި ވާހަކަ ދައްކަމުން އޭނާ ބުނެފައި ވެއެވެ.
'އޭނާ ބެލްފޯރ ދޫކޮށް ދަންދެން އަހަރެމެން މި މުޒާހަރާތައް ހުއްޓައެއް ނުލާނަން،" ޖެރޫސެލަމްގައި ބޮޑުވަޒީގެ ގެކޮޅު ހުންނަ މަގަށް ނިސްބަތްކޮށް އޭނާ ބުނެފައި ވެއެވެ.
އަންނަ އަންގާރަ ދުވަހު ބޭއްވުމަށް ހަމަޖެހިފައިވާ އާންމު އިންތިޚާބަށްފަހު، 12 އަހަރުގެ ދިގު މުއްދަތަކަށް އިސްރާއީލުގެ ބޮޑުވަޒީރުކަން ކުރަމުންދާ ނަތަންޔާހޫ މިހާރު ކުރަމުންދަނީ، އިތުރު ދައުރަކަށް ވެރިކަމުގައި ދެމިހުރެވޭނެ ކަމަށެވެ.
އުމުރުން 71 އަހަރުގެ ނަތަންޔާހޫއަކީ، ވެރިކަމުގައި ހުންނަވަނިކޮށް ކޮރަޕްޝަންގެ ތުހުމަތު ކުރެވި އަދި ދައުވާކުރެވިފައިވާ ހަމައެކަނި ބޮޑުވަޒީރެވެ. ފާއިތުވެދިޔަ އަހަރު އޭނާ މައްޗަށް ވަނީ 3 މައްސަލައެއްގައި ކޮރަޕްޝަންގެ ދައުވާ ކުރެވިފައެވެ.
ނަތަންޔާހޫގެ މައްޗަށް ތުހުމަތު ކުރެވިގައިވަނީ، ބައެއް ފަރާތްތަކުން ނުހައްގުން ހަދިޔާތައް ބަލައިގަތުމާއި، އަދި މަގާމުގެ ނުފޫޒުގެ ބޭނުން ކޮށްގެއް، އަމިއްލައަށް ޕްރޮމޯޓުވުމުގެ ބަދަލުގައި، ބައެއް މީޑިއާތަކަށް ނާޖާއިޒު މަންފާތަށް ހޯދާ ދިނުމަށް މަސައްކަތް ކުރުމުގެ ތުހުމަތު ތަކެވެ.
ނަތަންޔާހޫ ވަނީ މިހުރިހާ ތުހުމަތުތަކަށް އިންކާރު ކުރައްވާފައެވެ. އަދި އޭނާ ވިދާޅުވެފައިވަނީ، މިއީ އޭނާއާއި ދެކޮޅަށް ކުރިޔަށްދާ ސިޔާސީ ޗަރުކޭސްތަކެއް ކަމުގައެވެ. މި ކޮރަޕްޝަންގެ ތުހުމަތުތައް އޭނާގެ މައްޗަށް ސާބިތު ކުރެވިއްޖެނަމަ، އިސްރާއީލުގެ ބޮޑުވަޒީރުކަމުން އިސްތިއުފާ ދޭން އޭނާއަށް މަޖުބޫރު ވެގެން ދާނެއެވެ.
