ބާސެލޯނާގައި ފަހަކަށް އައިސް އޮސްމާން ޑެމްބެލޭ ދައްކަމުން އަންނަ ކުޅުމުގެ ސަބަބުން ދެ އަހަރު ފަހުން ފްރާންސް ގައުމީ ފުޓްބޯޅަ ޓީމުން އޭނާ އަށް ފުރުސަތު ދީފިއެވެ.
ކުރިން ބޮރޫޝިއާ ޑޯޓްމަންޑަށް ކުޅުނު ޑެމްބެލޭ އެންމެ ފުރަތަމަ ފްރާންސް ޓީމަށް މެޗެއް ކުޅެދިނީ 2016 ވަނަ އަހަރުގެ ސެޕްޓެމްބަރު މަހުއެވެ. ރަޝިއާގައި 2018 ވަނަ އަހަރު ބޭއްވި ފީފާ ވޯލްޑް ކަޕް ކާމިޔާބުކުރި ފްރާންސް ޓީމުގައި ހިމެނޭ ޑެމްބެލޭ އެންމެ ފަހުން ފްރާންސަށް މެޗެއް ކުޅެދިނީ އެ އަހަރު ޑިސެމްބަރު މަހުގަ އެވެ. އުމުރުން 23 އަހަރުގެ ޑެމްބެލޭ އަށް އަލުން ފްރާންސް ޓީމުން ފުރުސަތު ދިނީ އަނިޔާއެއް ނުވެ ފަހަކަށް އައިސް ބާސެލޯނާގެ މެޗުތަކުގައި މޮޅު ކުޅުމެއް ދައްކާފައިވާތީ އެވެ.
ވޯލްޑް ކަޕް ކޮލިފައިންގައި އަންނަ ހަފްތާގައި ފްރާންސް ކުޅޭ މެޗުތަކަށް ނެގި ސްކޮޑުން ޑެމްބެލޭގެ އިތުރުން ވަނީ އަނިޔާއިން ރަނގަޅުވެ ދާދި ފަހުން ޕްރެކްޓިހުގައި ބައިވެރިވާން ފެށި މެންޗެސްޓާ ޔުނައިޓެޑްގެ ޕައުލް ޕޮގްބާ އާއި ޓޮޓެންހަމް ހޮޓްސްޕާސްގައި މޮޅު ކުޅުމެއް ދައްކަަމުން އަންނަ ޓަންގީ އެންޑޮމްބެލޭ ވަނީ ފުރުސަތު ހޯދައިފަ އެވެ. އެންޑޮމްބެލޭ އެންމެ ފަހުން ފްރާންސް ޓީމަށް މެޗެއް ކުޅެދިނީ 2019 ވަނަ އަހަރުގެ ޖޫން މަހު އެވެ. އެއީ އޭނާ ޓޮޓެންހަމަށް ބަދަލުވުމުގެ ކުރިންނެވެ.
ކޮލިފައިންގައި ފްރާންސް ކުޅޭ ފުރަތަމަ މެޗުގައި އަންނަ ބުދަ ދުވަހުގެރޭ ބައްދަލުކުރާނީ ޔޫކްރޭންއާ އެވެ. އޭގެ ފަހުން ކަޒަކްސްތާނާ ދެކޮޅަށް މެޗެއް ކުޅުމަށް ފަހު ދެން ނުކުންނާނި ބޮސްނިއާއާ ދެކޮޅަށެވެ. ކަޒަކްސްތާނާ ދެކޮޅަށް މާޗް 28 ގައި ކުޅުމަށް ފަހު ބޮސްނިއާއާ ބައްދަލުކުރާނީ އޭގެ ތިން ދުވަސް ފަހުންނެވެ.
ކޮމެންޓު ފޮނުވާ