ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް) ގެ މައްސަލަ ހައްލުކުރުމަށް ދުނިޔޭގެ ވޮލީބޯޅައިގެ މައި ޖަމުޢިއްޔާ (އެފްއައިވީބީ) އާއި އޭޝިއަން ވޮލީބޯލް ކޮންފެޑެރޭޝަން (އޭވީސީ) އިސްވެ އޮވެ، އުފައްދާފައިވާ "އެޑްހޮކް ކޮމިޝަން" އިން ވީއޭއެމުގެ މައްސަލަ ނިންމައި، އައު އިންތިޚާބަކަށް ދިޔުމަށް ގައިޑްލައިނެއް އެކުލަވާލައިފިއެވެ.
ވީއޭއެމުގެ އެންމެފަހުގެ އިންތިޚާބީ ރައީސް މުޙައްމަދު ލަތީފަށްވެސް އެޑްރެސްކޮށް އަންގާފައިވާ އެންގުމުގައި ވަނީ މައްސަލަ ބޮޑުވެފައިވާ ވީއޭއެމުގެ އިންތިޚާބުގައި ވޯޓުލެވޭނީ 2015 ވަނަ އަހަރުން ފެށިގެން 2018 ވަނަ އަހަރާ ދެމެދުގެ ތެރެއިން، މަދުވެގެން ތިން އަހަރު ކޮންމެވެސް އެއް މުބާރާތެއްގައި ވާދަކޮށްފައިވާ ކުލަބުތަކަށް ކަމަށެވެ.
ތިން އަހަރުގައި ގަވާއިދުން އެއް މުބާރާތެއް ކުޅެފައިވަނީ ޖުމްލަ ނުވަ ކުލަބެއް ކަމަށާއި، އެހެންކަމުން އައު އިންތިޚާބުގައި ވޯޓުލުމުގެ ހައްގު ލިބިގެންދާނީ އެ ނުވަ ކުލަބަށް ކަމަށްވެސް ވަނީ އަންގާފައެވެ. އެ ކުލަބުތަކުގެ ތެރޭގައި ހިމެނެނީ ދިވެހި ސިފައިންގެ ކުލަބު، ޕޮލިސް ކުލަބު، އައްޑޫ ސްޕޯޓްސް ކުލަބު، ސްޕޯޓްސް ކުލަބު ހޯކްސް، ގުޑީސް ސްޕޯޓްސް ކުލަބު، މޯލްޑިވިއަން ސްޕޯޓްސް އެންޑް ރެކްރިއޭޝަން، ޔޫތު ނިއު ޖަނަރޭޝަން އަދި ކުލަބު ހާފް ލައިން ލިންކޭޖެވެ.
އެފްއައިވީބީގެ ނިންމުމާއެކު ވީއޭއެމުގެ އިންތިޚާބު ބޭއްވުމަށް ދެ ކޮންގްރެސް އެއް ބޭއްވިގެންދާނެއެވެ. އޭގެ ތެރޭއިން އިންތިޚާބީ ކޮންގްރެސްއަށް ތައްޔާރުވުމުގެ ގޮތުން ބާއްވާ ކޮންގްރެސް މި ހިނގާ މާޗު މަހުގެ 24 ވަނަ ދުވަހު ބޭއްވުމަށް އެފްއައިވީބީން ވަނީ އަންގާފައެވެ. އެ ކޮންގްރެސްގައި ވީއޭއެމުގެ އިންތިޚާބުގައި ވޯޓުލެވޭނެ ކުލަބުތައް ފައިނަލް ކުރުމާއި، އިންތިޚާބާ ގުޅޭ އެެންމެހާ ކަންކަން ނިންމަން ޖެހޭނެއެވެ.
ކުރިއަށް އޮތް ވީއޭއެމުގެ އިންތިޚާބުގައި ވާދަނުކުރައްވަން ލަތީފް ނިންމާފައިވާއިރު، މި އަހަރުގެ ފެބްރުއަރީ މަހުގެ 22 ވަނަ ދުވަހު ލަތީފުގެ ދައުރު ވަނީ ހަމަވެފައެވެ.
ކޮމެންޓު ފޮނުވާ