އިންޑިއާ ސަރުކާރާއެކީ ދިވެހި ސަރުކާރުން ސޮއިކޮށްފައިވާ، އެމްއެންޑީއެފްގެ ކޯސްޑްގާޑްގެ ބަނދަރަކާއި ސަރވިސް ޑޮކްޔާޑެއް ތަރައްޤީކުރުމުގެ އެއްބަސްވުމާއި ގުޅޭގޮތުން ކުރެވެމުންދާ ސިޔާސީ ބަހުސްތަކުގެ އަމާޒު ނުވަތަ ފޯކަސް މިއަދު އެންމެ ބޮޑަށް ހުއްޓިފައި ވާތަން މިހާރު ފެންނަމުން ދަނީ، ދިވެރި ރާއްޖޭގެ ގައުމީ ދިފާއީ ބާރާ ދިމާލުގައެވެ.

މިމައްސަލާގައި ގައުމީ ދިފާއީ ބާރަށް ބައެއް ފަރާތްތަކުން އަމާޒު ކޮށްފައިވާ ފާޑުކިއުންތަކަށް، ދިވެހި އަސްކަރިއްޔާގެ މުޅި ލީޑަރޝިޕުން ޕްރެސް ކޮންފަރެންސެއް ބާއްވާ، ޖަވާބު ދީފައިވަނިކޮށް، ސިޔާސީ ބައެއް ފަރާތްތަކުން ވަނީ، ދިފާއީ ބާރުގެ ބައެއް އިސް ބޭފުޅުންގެ މައްޗަށް ކޮރަޕްޝަންގެ ތުހުމަތުކޮށް އޭސީސީއަށް މައްސަލަ ހުށަހަޅުއްވާފައެވެ.

އެހެންނަމަވެސް، މިމައްސަލަ ދިރާސާ ކުރުމަށްފަހު އޭސީސީން ނިންމާފައިވަނީ، މިމައްސަލާގައި ކޮރަޕްޝަނަށް ކޮށްފައިވާ ތުހުމަތެއް އެކުލެވިފައި ނުވާތީ މިމައްސަލަ ނުބެލުމަށެވެ. އަދި މައްސަލަ ނުބަލަން އޭސީސީން ނިންމުމުގެ ކުޑައިރު ކޮޅެއްގެ ތެރޭގައި އެމްޑީއެފްއިން ނެރުނު ބަޔާނެއްގައި ވަނީ، ދިފާޢީ ބާރަށް އަމާޒުކޮށް އިތުބާރާއި އިޙްތިރާމާއި ޤަދަރު ނަގާލުމަށް ފުރުޞަތު އެއްވެސް ބަޔަކަށް ނުދޭނެ ކަމަށްވެސް ބުނެފައެވެ.

މާލެއަތޮޅުގެ އުތުރު ތިލަފަޅުގައި އެމްއެންޑީއެފްގެ ކޯސްޑްގާޑްގެ ބަނދަރަކާއި ސަރވިސް ޑޮކްޔާޑެއް ތަރައްޤީކުރުމުގެ އެއްބަސްވުމާއި ގުޅޭ މައްސަލަ ހޫނުވެފައި މިވަނީ، ކުރީގެ ހޯމް މިނިސްޓަރު އުމަރު ނަސީރު މި އެއްބަސްވުން ކަމަށް އޭނާ ބުނާ ލިޔުމެއް ލީކު ކޮށްލި ހިސާބުންނެވެ. އަދި، ސަރުކާރުގެ ކަމާ ގުޅޭ ހުރިހާ އިދާރާއަކުންވެސް މިއީ ސައްހަ ނޫން ލިޔުމެއްކަމަށް ބުނަމުން ދާއިރު، އެއްބަސްވުމުގެ އަސްލު ދިވެހި ރައްޔިތުންނަށް ހާމަކޮށް ދިނުމަށް ގިނަބަޔަކު ސަނީ ސަރުކާރަށް އިލްތިމާސް ކުރަމުންނެވެ.

އަސްކަރިއްޔާއިން ޖަވާބުދާރީ ވުން!

ގައުމުތަކުން އަބަދުވެސް ބޭރުގެ ދައުލަތްތަކާ އެކީ އެއްބަސްވުންތައް ވާނެއެވެ. މިގޮތުން ވެވޭ އެއްބަސްވުންތައް، ބައިނަލް އަގުވާމީ ނަޒަރަކުން ބަލާއިރު، ގިނަފަހަރަށް ރަމްޒު ކޮށްދެނީ ދޭދޭ ގައުމުތަކުގެ މެދުގައި އޮންނަ އެކުވެރިކަމާއި ރަހުމަތްތެރި ކަމުގެ ގުޅުމެވެ. އަދި އެއްގައުމު އަނެއް ގައުމުން އެހީތެރިކަން ހޯދުމަށް، ވެވޭ މިފަދަ އެއްވަސްވުންތައް ވުމުގައި ހުރިހާ ދައުރެއް އަދާކޮށް، ނިންމުންތައް ނިންމަނީވެސް ގައުމުތަކުގެ ލީޑަރޝިޕްތަކުގައި ތިއްބަވާ ސިޔާސީ ބޭފުޅުންނެވެ. އެހެން ގޮތަކަށް ދަންނަވަނީނަމަ، އިންތިޚާބީ މަގާމްތަކުގައި ތިއްބަވާ ސިޔާސީ ބޭފުޅުންނެވެ.

ހަމައެފަދައިން، ދޭދޭ ގައުމުތަކުގެ ގުޅުންތަކާ ގުޅޭގޮތުން އުފެދޭ ކަންބޮޑުވުންތަކަށް ޖަވާބުދާރީވެ، ރައްދުދީ، އަދި މުގާބާލާ ކުރާނީވެސް ހަމަ ސިޔާސީ ފަރާތްތަކުންނެވެ. ސަބަބުތައް ބައިވަރެވެ. އެއީ ދައުރަކަށްފަހު ދައުރެއް ބަދަލުވަމުންދާއިރު، ބަދަލުވާ މީހުންގެ ގޮތުގައި މަގާމްތަކުގައި ދެމި ތިބޭނީވެސް ސިޔާސީ މީހުންކަމުގައި ވާތީއެވެ.

މިއިސޫލުން ބަލާއިރު، އުތުރު ތިލަފަޅު ތަރައްގީ ކުރުމަށް ދިވެހި ސަރުކާރުން އިންޑިއާ ސަރުކރާއެކީ ސޮއިކުރި އެއްބަސްވުމަކީ، ދެސަރުކާރުގެ ދެމެދުގައި ވެވުނު އެއްބަސްވުމަކަށް ވާއިރު، މި އެއްބަސްވުމުގެ މައިގަޑު އަމާޒަކަށް ދިވެހި އަސްކަރިއްޔާގެ ޔުނީފޯމު އެޅި ބޭފުޅުން ވާންޖެހުނު ސަބަބު މިއީ މިއަދު ޖަވާބު ހޯދަން ޖެހިފައިވާ ސުވާލެކެވެ.

ހަމަ އެއާއިއެކު އިންޑިއާ ސަރުކާރާ އެކީ ވެފައިވާ އެއްބަސްވުމަކީ ސިއްރު އެއްބަސް ވުމެއްގެ ގޮތުގައި ސަރުކާރުން ކަޑައަޅާފައިވާއިރު، މި އެއްބަސްވުން ދިފާއުކުރުމަށް ދިވެހި އަސްކަރިއްޔާގެ ޔުނީފޯމް އެޅި ސިފައިން ކުރިޔަށް ނިކުންނަންވީ ކޮން ސަބަބަކާ ހެދިތޯ، މިއީވެސް ޖަވާބު ހޯދަންޖެހިފައިވާ ސުވާލެކެވެ.

ތެދުފުޅެކެވެ. މިފަދަ ކޮންމެ މުއާމަލާތަކާ ގުޅިގެން، ސިޔާސީ މަސްރަހުގައި ތަފާތު ގިނަ ވާހަކަތައް ދެކެވެއެވެ. ކޮރަޕްޝަންގެ ތުހުމަތުވެސް ކުރެވެއެވެ. އަދި އެނޫން އެއަށްވުރެ ބޮޑެތި ތުހުމަތުތައްވެސް ކުރެވެއެވެ. މިގޮތުން ދެކެވޭ ގިނަ ވާހަކަތަކަކީ އެއްވެސް އަސްލެއް ނެތް ވާހަކަތަކެވެ.

ގަބޫލު ކުރެވޭގޮތުގައި، އުތުރު ތިލަފަޅުގެ އެއްބަސްވުމުގެ މައްސަލާގައި ދިވެހި އަސްކަރިއްޔާގެ ލީޑަރޝިޕުން، ސިޔާސީ މަސްރަހުގައި ދެކެވެމުންދާ ވާހަކަތަކަށް ޖަވާބުދާރީ ވާންޖަހުނީ މިބީދައިން އިސްބައެއް ޖެނެރަލުންގެ މައްޗަށް ކޮރަޕްޝަންގެ ތުހުމަތު ބައެއް ފަރާތްތަކުން ކުރަން ފެށުމުންނެވެ. އަދި ނުހައްގުން މިފަދަ ތުހުމަތުތަކެއް ކުރާކަމަށް ވާނަމަ، އެތުހުމަތު އަމާޒުވާ މީހާގެ ޖަޒުބާތުތައް އުތުރި އެރުމަކީވެސް އެކަށީގެންވާ ކަމެކެވެ. އެހެންނަމަވެސް، ހަމަޔާއި އުސޫލު ގެއްލިފައިވާ ސިޔާސީ މަސްރަހެއް އޮތް ތަނެއްގައި ޖަވާބުދާރީ ވާންޖެހޭނެ މައްސަލަތަކާއި، ޖަވާބު ދާރީވާން ނުޖެހޭނެ މައްސަލަތައް ވަކިކޮށް ދެނެގަތުމަކީވެސް މުހިންމު ކަމެކެވެ.

މިގޮތުން، މިމައްސަލައާއި ގުޅިގެން އަސްކަރިއްޔާއަށް އަމާޒުކޮށް، ތަފާތު އެކިއެކި ތުހުމަތުތައް ކުރަމުންދާ ފަރާތްތަކަށް، އެތުހުމަތުތަކުގެ މަތީގައި، ޕަބްލިސިޓީ ހޯދުމުގެ ބޭނުމުގައި، ތުހުމަތަކަށްފަހު ތުހުމަތެއް ކޮށްލަ ކޮށްލާ ތިބުމުގެ ފުރުސަތުވެސް މިއަދު އެބައޮތެވެ. މިފުރުސަތު މިބީދައިން ލިބިދީފައި އޮތުމަކީ، މިއީވެސް އަދި އާވައްތަރެއްގެ މިނިވަންކަމެކެވެ. މިނިވަންކަން "އެންޖޯއި" ކުރުމުގެ ފުރުސަތު އޭގެ ކޮޅު ނެތްކޮޅަށް ލިބިދީފައި އޮތުމަކީ، ޒިންމާދާރު އެއްވެސް ގައުމެއްގައި ކަން ހިގާނޭ އުސޫލެއްކަމުގައި ނުދެންނެވޭނެއެވެ.

އެއްބަސްވުން އާންމު ކުރެވިދާނެތަ؟

އުތުރު ތިލަފަޅުގައި އެމްއެންޑިއެފްއަށް ބޭނުންވާ ޚިދުމަތްތައް ގާއިމް ކުރުމަށް ފާއިތުވެދިޔަ ފެބްރުއަރީ މަހުގެ 21 ވަނަ ދުވަހު ދިވެހި ސަރުކާރާ އިންޑިއާ ސަރުކާރާ ދެމެދު ސޮއި ކުރެވިފައިވާ އެއްބަސްވުމަކީ ސިއްރު އެއްބަސްވުމެއް ކަމުގައި ސަރުކާރުން ވަނީ ކަޑައަޅާފައެވެ.

އަދި މި އެއްބަސްވުން، ރައްޔިތުންގެ މަޖިލީހަށްވެސް ހާމަ ނުކުރެވޭނެކަމަށް ސަރުކާރުން ވަނީ ބުނެފައެވެ. އެހެންނަމަވެސް، ދިވެހި އަސްކަރިއްޔާއަަށް ބޭނުންވާ ފަންނީ އެހީތެރިކަން ހޯދުމަށް ގާއިމްކުރެވޭ އެތަކެއް ޚިދުމަތްތަކަކަށް އިންޑިއާ ސަރުކާރުގެ އެހީތެރިކަން ހޯދުމުގެ ބޭނުމުގައި ސޮއިކޮށްފައިވާ މިއެއްބަސްވުން އާންމު ކުރުމަށް ސަރުކާރުން ދެކޮޅު ހަދަމުންދާ ސަބަބެއް ސަރުކާރުން މިހާތަނަށް ސީދާ ގޮތެއްގައި ހާމަކޮށްފައެއް ނުވެއެވެ.

ރާއްޖޭގެ ސިޔާސީ މަސްރަހުގައި ހޫނުވެގެން ގޮސްފައިވާ މިމައްސަލައިގެ ތާރީޚަށް ބަލާއިރު، މާލެ އަތޮޅު އުތުރު ތިލަފަޅުގެ “ސިފަވަރު”ގައި ތަރައްޤީކުރާ މޯލްޑިވްސް ނޭޝަނަލް ޑިފެންސް ފޯސް (އެމް.އެން.ޑީ.އެފް)ގެ ކޯސްޓްގާޑް ބަނދަރާއި ޑޮކްޔާޑަކީ، 2016 ވަނަ އަހަރުގެ އެޕްރީލްމަހު، ކުރީގެ ރައީސް ޢަބްދުﷲ ޔާމީން ޢަބްދުލްޤައްޔޫމް އިންޑިއާއަށް ކުރެއްވި ފުރަމާނަ ދަތުރުފުޅުގައި ދިވެހި ސަރުކާރާއެކު ސޮއިކުރެވުނު “ޑިފެންސް އެކްޝަން ޕްލޭން އޮން ޑިފެންސް ކޯޕަރޭޝަން”ގެ ޢުމްރާނީ ތަރައްޤީގެ މަސައްކަތުގެ ދަށުން އެކުލަވާލި އެއްބަސްވުމެކެވެ.

މި މަސައްކަތުގެ ދަށުން އުތުރު ތިލަފަޅުގައި ޖެޓީއަކާއި، ހާބަރ ރިޕެއަރ ފެސިލިޓީ (އެޗް.އާރް.އެފް)، ސްލިޕްވޭ، އަދި ބަނދަރަށް ބޭނުންވާ އެހެނިހެން ޢުމްރާނީ ވަސީލަތްތައް ތަރައްޤީކުރުމާއި، މުއާޞަލާތީ ވަސީލާތްތަކާއި ރާޑަރުގެ ޚިދުމަތްތައް ތަރައްޤީ ކުރުމުގައި އިންޑިއާ ސަރުކާރުން ދިވެހި ސަރުކާރަށް އެހީތެރިކަން ފޯރުކޮށްދޭނެއެވެ.

މައުލޫމާތު ލިބިފައިވާ ގޮތުގައި، މިއެއްބަސްވުމުގައިވާ ގޮތުގެ މަތިން، އިންޑިއާގެ ފަންނީ މާހިރުން، ދިވެހި މުވައްޒަފުން ތަމްރީނު ކުރުމާއި، ޑޮކްޔާޑް އަދި ބަނދަރުގައި ޤާއިމުކޮށްފައިވާ އެކިއެކި ވަސީލަތްތައް މަރާމާތުކޮށް ބެލެހެއްޓުމުގައި 15 އަހަރު ދުވަހުގެ މުއްދަތަކަށް އިންޑިއާއިން އެހީތެރި ވެދޭނެއެވެ.

މި މައްސަލާގެ އަސްލަށް ބަލާއިރު، އުތުރު ތިފަޅުގައި، ދިވެހި ސިފައިންނަށް ބޭނުންވާ ޚިދުމަތްތައް ގާއިމް ކުރުމުގެ އަސްލު މަސައްކަތް ފެށިފައިވަނީ، ފާއިތުވެދިޔަ ވެރިކަމުގައެވެ. ރައީސް ޔާމިންގެ ސަރުކާރުން ހަމަ މިތަނުގައި ޚިދުމަތްތައް ގާއިމް ކުރުމަށް އިންޑިއާ ސަރުކާރާ މަޝްވަރާ ކޮށްފައިވެއެވެ.

އެހެންނަމަވެސް ރައީސް ޔާމިންގެ ވެރިކަމުގައި އިންޑިއާއަށް ކަޑައަޅުއްވާފަ ހުންނެވި ސަފީރު، އަހުމަދު މުހައްމަދު، އަންޑޭ ވިދާޅުވެފައިވަނީ، އޭރު އެމަސައްކަތް ކުރިޔަށް ނުގެންދެވިފައި އޮތީ، ކުރެވުނު މަޝްވަރާތަކުން ޑޮކްޔާޑުގެ އެކްސްކުލޫސިވިޓީ ހަމަ އެކަނި އިންޑިއާ އަށް އޮންނަ ގޮތަށް އެޤައުމުން ބޭނުންވާތީ، އެ ގޮތަށް އެމަޝްރޫއު ކުރިއަށް ގެންދިއުމަށް ދިވެހި ސަރުކާރުން ބޭނުން ނުވާތީ ކަމުގައެވެ.

އެހެންކަމުން، އިންޑިއާއިން ދިވެހި އަސްކަރިއްޔާއަށް ފޯރުކޮށްދޭ މިފަދަ ބޮޑު އެހީތެރިކަމެއްގެ ބަދަަލެއްގެ ގޮތުން، މި ސަރަހައްދުން ޚިދުމަތް ހޯދުމުގައި އިންޑިއާގެ ހުއްދަ އޮވެގެން މެނުވީ އިތުރު އެއްވެސް ބަޔަކަށް ޚިދުމަތެއް ލިބި ނުދެވޭގޮތަށް މިއެއްބަސްވުން އޮތްކަމަށް ވާނަމަ، މިކަމުގެ ކަންބޮޑުވުން، ރާއްޖެއާއެކީ ޒަމާނުއްސުރެ ގާތް ގުޅުން ބާއްްވަމުން ގޮސްފައިވާ ދުނިޔޭގެ އެހެން ބައެއް ގައުމުތަކައް އޮވެދާނެއެވެ. ސަބަބަކީ، ދޭދޭ ގައުމުތަކާއެކީ އޮންނަ އަސްކަރީ ގުޅުންތަކަކީ، އަބަދުވެސް ދުނިޔޭގެ ތަފާތު ގައުމުތަކުން އެއްގައުމު އަނެއްގައުމަށް ފާރަލާ ބަލަން އޮންނަ، އަދި މިފަދަ އެއްބަސްވުންތަކުގެ މައްޗަށް އެގުޅުންތައް ގިނަފަހަރަށް ބައްޓަންވެގެންދާ ގުޅުންތަކަކަށް ވާތީއެވެ.

އެހެންކަމުން މި ނަޒަރިއްޔާތުން ވިސްނާލާއިރު، މިއެއްބަސްވުމުގައި، ދުނިޔޭގެ އެހެން ގައުމަކުން، ނުވަތަ ރާއްޖެއިން ދަމަހައްޓަމުންދާ ބައިނަލް އަގުވާމީ ގުޅުންތަކަށް "ސެންސިޓިވް" އެއްބަސްވުމަކަށް މިއެއްބަސްވުން ވާކަމަށް ވާނަމަ، މިއެއްބަސްވުން އެއްވެސް ހިފެހެއްޓުމެއް ނެތި ހާމަކުރުމުގައި ސަރުކާރުން ދެވަނަ ވިސްނުމަކަށް ދާންޖެހިދާނެއެވެ. ސަރުކާރުތަކުން ބޭރުގެ ގައުމުތަކާ އެކީ ވާ އެއްބަސްވުންތަކަކީ އެއްވެސް ގައުމުގެއްގައި އެއްވެސް ހިފެހެއްޓުމެއްނެތި އާންމު ކުރާ އެއްބަސްވުންތަކެއް ނޫނެވެ.

އެހެންނަމަވެސް، ގައުމީ ސަލާމަތާ ގުޅުންހުރި މިފަދަ އެއްބަސްވުންތައް ވާއިރު، ކަޑައްތު ކޮށްފައި ހުންނަ މަރުހަލާތަކެއް ހުރެއެވެ. ގާނޫނު ހަދާ މަޖިލީހުން އެއްބަސްވުންތައް ފާސްކުރުން ފަދަ، ނުވަތަ ގާނޫނު ހަދާ މަޖިލިހުގެ ގާނޫނީ ލަފާ ހޯދުންފަދަ މަރުހަލާތައް ކަޑައްތު ކޮށްފައި ހުރެއެވެ.

އެހެންނަމަވެސް، ގަބޫލުކުރަން ޖެހޭ ހަގީގަތަކީ، މިއަދު ރައްޔިތުންގެ މަޖިލިހުގެ ހާލަތު އޮތީ، މިފަދަ އެއްބަސްވުމެއް އެމަޖިލީހަށް ގެންގޮސްގެން ސިއްރު ހިފެހެއްޓޭނޭ ފަދަ ހާލަތެއްގައި ނޫންކަމެވެ. އިއްޔެވެސް މިއަދުވެސް އެހާލަތު މަޖިލިހުގެ ތެރޭގައި އޮތީ މިފަދައިންނެވެ. އެހެންކަމަށް ވާނަމަ، ސިއްރު ކޮށްފައި ބޭއްވުމަށް ބޭނުންވާ އެއްބަސްވުމެއް އެމަޖިލީހަށް ގެންގޮސްގެން، މަޖިލީހުގެ އެންޑޯސްމަންޓް ހޯދައިގެން، ސަރުކާރަށް މިއެއްބަސްވުމުގައި ބޭރުގެ ދައުލަތަކާ އެކީ ސޮއިކުރުމުގެ ފުރުސަތެއް އޮވެދާނެކަމަށް ގަބޫލުކުރަން ދައްޗެވެ. އެހެންނަމަވެސް، ހަމަ އެފަދައިން، މި އެއްބަސްވުމާއި ގުޅުވައިގެން، އާންމު ރައްޔިތުންގެ ތެރޭގައި އިންތިހާއަށް ކަންބޮޑުވުންތައް އުުފެދިގެންދާނަމަ، މިފަދަ މުހިންމު އެއްބަސްވުމަކާއި ގުޅޭގޮތުން އާންމު ހޭލުންތެރިކަން އިތުރުކުރުމަށް، ނުވަތަ އެމަޢުލޫމާތު އެކަށީގެންވާ މިންވަރަކަށް އާންމު ރައްޔިތުންނާ ހަމައަށް ފޯރުކޮށްނުދީ ބޭއްވުމަކީ، ސަރުކާރަށް އެޅޭ ޅައެއްޗަކަށް ނޫނީ ނުވާނެއެވެ. ސަބަބަކީ އިދިކޮޅު ސިޔާސީ ފަތާރްތަކުން، ރައްޔިތުން މަގުތަކަށް ނެރުމަށް އަބަދުވެސް ފާރަލާ ބަލަން ތިވޭނީ، ގައުމިއްޔަތާ ގުޅުންހުރި މިފަދަ ސަބަބުތަކަށް ކަމަށް ވާތިއެވެ. އަދި، އާންމު އުސޫލަކުން، މައުލުމާތު ހިފެހެއްޓުމަކީ، ގިނަބަޔަކު މަރުހަބާ ކިޔާނޭ ސިޔާސަތަކަށްވެސް ވެގެން ނުދާނެތީއެވެ.

މިސްރާބު ސާފެއް ނުން!

ކޮންމެއަކަސް، ފެންނާން އޮތް ހަގީގަތަކީ، މިމައްސަލާގައި، މިހާރު އާދެވިފައި މިއޮތް ހިސާބަށް ބަލާއިރު، ރަގަޅު އެއްގޮތެއްވެސް އަދި ފެންނާން ނެތްތަނެވެ. އާންމު ރައްޔިތުންނަށް މިއެއްބަސްވުން ހާމަކުރަން ސަރުކާރުން ދެކޮޅު ހަދާއިރު، ރައްޔިތުންގެ މަޖިލިހަކީ ސިއްރު ހިފެހެއްޓޭ ތަނަކަށް ނުވާތީ އެމަޖިލހަކަށްވެސް މިއެއްބަސްވުން ހާމަކުރެވޭކަށް ނެތެވެ. އަދި މިއެއްބަސްވުމާއި ގުޅުވައިގެން ގައުމީ ދިފާއީ ބާރަށް އަމާޒު ކޮށްފައިވާ ތުހުމަތުތަކަށް އެބޭފުޅުން މިވަނީ ފާޅުގައި ރައްދުވެސް ދެއްވާފައެވެ. މިއީ މަދުން ނޫނީ ޔުނިފޯމްއެޅި ޖެނެރަލުން މިހާތަނަށް ކުރައްވާފައިވާ ކަމެއް ނޫނެވެ.

އަދި، މިއީ ގައުމުގެ ދިފާއީބާރަށް ބޭނުންވާ ވަސީލަތްތަކެއް ފުރިހަމަ ކުރުމުމަށް ދެ ދައުލަތެއް ދެމެދުގައި ސޮއިކޮށްފައިވާ އެއެއްބަސްވުމަކަށް ވާއިރު، މިއެއްބަސްވުމާއި ގައުމުގެ ދިފާއީ ބާރާ ގުޅުވަން ބަޔަކު މީހުން މަސަކަތް ކުރަމުންދާ ސަބަބުތަކެއްވެސް އަދި އެގޭކަށް ނެތެވެ.

އެހެންނަމަވެސް ގަބޫލުކުރަން ޖެހޭ ހަގީގަތަކީ، މިއީ އެއްވެސް ކަމެއް ސިއްރު ވެފައި އޮންނާނޭ ޒަމާނެއް ނޫންކަމެވެ. މިއެއްބަސްވުން އޭގެ ޒާތުގައި އާންމުވެގެން ދާނޭ ކަމެވެ. އެހާތަނުން ވަރަށް ގިނަކަން ސާފވެގެން ދާނެއެވެ. ސަރުކާރުން ދައްކާ ވާކަތަކާއި، ބަޔަކުމީހުން ސަރުކާރާމެދު ކުރަމުންދާ ބޮޑެތި ތުހުމަތުތަކުގެ ހަގީގަތް ސާފުވެގެން އަންނާނެއެވެ.

މިހާހިސާބަށް ދަންދެން، މިހައްސާސީ މައްސަލަ ދަތުރުކުރަމުންދާ މިސްރާބު ވަރަށްރަގަޅަށް ގިނަބަޔަކު ތިބީ ޝައުގުވެރިކަމާއެކު ބަލާށެވެ.