އެންމެފަހުގެ ޗެމްޕިއަން ބަޔާން މިއުނިކް ކުއާޓާއަށް

ޔުއެފާ ޗެމްޕިއަންސް ލީގުގެ ދެ ވަނަ ބުރުގެ ދެ ވަނަ ލެގުގެ އެންމެ ފަހުގެ ޗެމްޕިއަން ބަޔާން މިއުނިކް ކުއާޓައިފަނަލުގެ ފަހު ޖާގަ ކަށަވަރުކޮށްފިއެވެ.

އަމިއްލަ ދަނޑުގައި ކުޅުނު ދެ ވަނަ ލެގުން ރޭ ބަޔާން މޮޅުވީ 2-1 އިންނެވެ. މުބާރާތުގެ ތާރީހުގައި ބަޔާނުން 31 ވަނަ ފަހަރަށް ކުއާޓާގެ ފުރުސަތު ހޯދީ އެގްރިގޭޓަށް ބަލާއިރު 6-2 އިން ލާޒިއޯގެ މައްޗަށް ކުރިހޯދައިގެންނެވެ. ބަޔާނުން ރޭގެ މެޗުގެ ފުރަތަމަ ހާފުގައި ލީޑުނެގީ 33 ވަނަ މިނިޓްގައި ރޮބަޓް ލެވަންޑޯސްކީ ކާމިޔާބުކުރި ޕެނަލްޓީންނެވެ. މިއީ އޭރިއާތެރެއިން ބަޔާންގެ ލެއޯން ގޮރެޓްޒްކާ އަށް ލާޒިއޯގެ ފްރަންސެސްކޯ އަސެއަރްބީ ކުރި ފައުލަކަށް ރެފްރީ ދިން ޕެނަލްޓީއެކެވެ.  އެރިކް މެކްސިމް ޗޮޕޫ-މޯޓީން ޖެހި ގޯލުން ބަޔާނުން މެޗުގެ 73 ވަނަ މިނިޓްގައި ލީޑުފުޅާކޮށްފައިވަނިކޮށް އޭގެ ނުވަ މިނިޓް ފަހުން ލާޒިއޯގެ ހަމައެކަނި ގޯލު ޖެހީ މާކޯ ޕަރޯލޯ އެވެ.

ބަޔާނާއި ޗެލްސީގެ އިތުރުން ކުއާޓާގެ ޖާގަތައް ކަށަވަރުކޮށްފައިވަނީ ބޮރޫޝިއާ ޑޯޓްމަންޑް، ޕީއެސްޖީ، ލިވަޕޫލް، ޕޯޓޯ، ރެއާލް އަދި ސިޓީ އެވެ. ކުއާޓާ ފައިނަލްގެ ގުރުއަތުލުން އޮންނާނީ މާދަމާ އެވެ.