އެތުލެޓިކޯ ބަލިކޮށް ޗެލްސީ ކުއާޓާއަށް

ޔުއެފާ ޗެމްޕިއަންސް ލީގުގެ ދެވަނަ ބުރުން އެތުލެޓިކޯ މެޑްރިޑް ކަޓުވާލުމަށްފަހު މުބާރާތުގެ ކުއާޓާ ފައިނަލަށް ޗެލްސީ ދަތުރުކޮށްފިއެވެ.

އަމިއްލަ ދަނޑުގައި ކުޅުނު ދެވަނަ ލެގުގެ މެޗުން 2-0 ގެ ނަތީޖާއަކުން ޗެލްސީ މޮޅުވިއިރު، އެތުލެޓިކޯގެ ދަނޑުގައި ކުޅުނު ފުރަތަމަ ލެގުން ޗެލްސީ ވަނީ 1-0 ގެ ނަތީޖާއަކުން މޮޅުވެފައެވެ. އެހެންކަމުން 3-0 ގެ އެގްރިގޭޓް ނަތީޖާއަކުން މޮޅުވެ، ޗެލްސީ ވަނީ ކުއާޓާއަށް ދަތުރުކޮށްފައެވެ. މެޗުގައި ދެ ޓީމުގެ ފަރާތުންވެސް ހަމަހަމަ ކުޅުމެއް ފެނިގެންދިޔައިރު، ފުރަތަމަ ހާފުގައި ޗެލްސީން ވަނީ ލީޑު ނަގާފައެވެ. އެގޮތުން މެޗުގެ 34 ވަނަ މިނެޓުގައި ޓިމޯ ވާނާ ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ ހަކީމް ޒިޔެކެވެ.

މި މެޗުގައި އެތުލެޓިކޯއިންވެސް ގިނަ ހަމަލާތަކެއް އުފެއްދިއިރު، އެ ޓީމަށް މައްސަލަތަކެއް ކުރިމަތިވީ މެޗުގެ 82 ވަނަ މިނެޓުގައި ޑިފެންޑަރު ސްޓެފަން ސަވިޗަށް ސީދާ ރަތް ކާޑެއް ދެއްކުމާ ގުޅިގެންނެވެ. އޭނާއަށް ރަތް ކާޑެއް ދެއްކީ ބޯޅަ ނެތީސް ޗެލްސީގެ އެންޓޯނިއޯ ރުޑިގާއަށް އުޅަނބޮށިން ހަމަލާދިނުމާ ގުޅިގެންނެވެ. މެޗުގެ އިތުރު ވަގުތުގައި ޗެލްސީން ވަނީ ލީޑު ފުޅާކޮށްފައެވެ. ކައުންޓަ އެޓޭކެއްގައި ކްރިސްޓިއަން ޕުލިސިޗް ދިން ޕާހަކުން މި ލަނޑު އެ ޓީމަށް ކާމިޔާބުކޮށްދިނީ އެމާސަންއެވެ.

މިއީ 8 އަހަރަށް ފަހު ޗެމްޕިއަންސް ލީގުގެ ކުއާޓާއަށް ޗެލްސީ ދަތުރުކުރި ފުރަތަމަ ފަހަރެވެ.