އެއްގަމު އުޅަނދުތައް ދުއްވުމާއި މަގުތަކަށް ނިކުމެ އުޅޭވޭ ގަޑިއަށް އަނެއްކާވެސް ލުއިތަކެއް ދީފި

މާލެ ސަރަޙައްދުގައި ޢާންމު ތަންތަނަށް މީހުން ނުކުތުމާއި، އެއްގަމު އުޅަނދުފަހަރު ދުއްވޭ ގަޑިތަކަށް އަނެއްކާވެސް ލުއިތަކެއް ދީފިއެވެ.

ހެލްތު ޕްރޮޓެކްޝަން އެޖެންސީ އެޗްޕީއޭއިން ވަނީ މާލެ ސަރަހައްދުގައި އެއްގަމު އުޅަނދުފަހަރު ދުއްވުމާއި، މަގުމައްޗާއި ޢާންމު ތަންތަނަށް މީހުން ނުކުތުން މަނާ ގަޑިއަކީ ރޭގަނޑު 11:00 އިން ފެށިގެން ފަތިހު 04:00 ހަމައަށްކަމަށް ކަނޑައަޅާފައެވެ. އެޗްޕީއޭއިން ޢާންމުކޮށްފައިވާ މިއުސޫލުގައި މާލެ ސަރަހައްދުގައި ކެފޭ ރެސްޓޯރަންޓްތަކުގައި ޚިދުމަތްދޭ ގަޑިތަކަށްވެސް ބަދަލު ގެނެސްފައިވެއެވެ. އެގޮތުން ކެފޭ ރެސްޓޯރަންޓް ހޮޓާ ފަދަ ތަންތަނުގެ ޚިދުމަތް ރޭގަނޑު 10:30 ހާއި ހަމައަށް ދެވޭނެކަމަށް ކަމަށް ބުނެފައިވެއެވެ. އެހެންކަމުން ރޭގަނޑު 10:30 އިން ފަތިހު 04:00 ޖެހުމާއި ހަމައަށް ކެފޭ ރެސްޓޯރަންޓް އަދި ހޮޓާތަކުގައި ޚިދުމަތްދިނުން ވަނީ މަނާކޮށްފައެވެ.

މިލުއިތަކާއެކު ފިޔަވަޅުތަކަށް ފުރިހަމައަށް ޢަމަލުކުރުމަށް އެންމެހާ ފަރާތްތަކުގެ އެއްބާރުލުމަށް އެޗްޕީއޭ އިން ވަނީ އެދިފައެވެ.

ރޭގަނޑު11 ޖެހުމާއި ހަމައަށް ޢާންމުން މަގުމަށްޗަށް ނިކުމެ އުޅުމަށާއި، ދުއްވާއެއްޗެހި ދުއްވޭގޮތަށް ހަމަޖައްސާފައި މިވަނީ މާލެ ސަރަހައްދުގައި ކޯވިޑް-19އަށް ޕޮޒިޓިވްވާ މީހުންގެ އަދަދު އިތުރުވަމުން ދިޔުމާއި ގުޅިގެން، ރޭގަނޑު 8:00އިން ފަތިހު 5:00އަށް އެއްގަމު އުޅަނދުފަހަރު ދުއްވުން މަނާކޮށްފައި އޮތުމަށްފަހުއެވެ. ނަމަވެސް ބައްޔަށް ޕޮޒިޓިވްވާ މީހުންގެ ޢަދަދު ދަށްވާން ފެށުމުން ރޭގަނޑު 10 ޖެހުމާއި ހަމައަށް މަގުތަކަށް ނިކުތުމަށާއި ދުއްވާ އެއްޗެހި ދުއްވޭގޮތަށް ކަނޑައަޅަފައިވަނީ މިމަހުގެ 3 ވަނަ ދުވަހު އެވެ.

ރާއްޖޭގައި ކޯވިޑް-19 އަށް ޕޮޒިޓިވްވާ މީހުންގެ ޢަދަދު ދަށްވާން ފެށުމުން މިހާރު ވަނީ ލުއިތަކެއް ދޭން ފަށާފައެވެ. އެގޮތުން ގްރޭޑް 8 އިން ފެށިގެން ސްކޫލްތަކުގައި ކިޔަވާދޭން ނިންމާފައިވާއިރު މިމަހުގެ15 ވަނަ ދުވަހު ވަނީ ގެސްޓް ހައުސްތަކަށް ފަތުރުވެރިން ގެނައުމަށްވެސް ހުޅުވާލާފައެވެ.

އެޗްޕީއޭއިން އެންމެ ފަހުން ޢާންމުކުރި ތަފާސް ހިސާބުތައް ދައްކާގޮތުން މިއަދު ކޯވިޑް-19އަށް ޕޮޒިޓިވްވެފައިވަނީ 41 މީހެކެވެ. ބަލިން ރަނގަޅުވެފައިވަނީ 64 މީހެކެވެ.