އެކްޓްރެސް ކަންގަނާ ރަނާވަތާއި ދެކޮޅަށް ޓީވީ ތަރި އަދި ލިއުންތެރިޔާ އާޝިޝް ކޯލް ކޯޓަށް މައްސަލައެއް ވައްދައިފި އެވެ.
އާޝިޝް ކޯޓަށް ވައްދާފައި ވަނީ ކޮޕީ ރައިޓްގެ މައްސަލައެކެވެ. އާޝިޝް އަކީ "ދިއްދާ: ދަ ވޯރިއާ ކުއީން އޮފް ކަޝްމީރް" ގެ ލިޔުންތެރިއާއެވެ.
މި ފޮތް ވަނީ ހިންދީ ބަހަށް ތަރުޖަމާ ކޮށްފައެވެ. އަދި ވަނީ "ކަޝްމީރު ކި ޔޯއްދާ ރާނީ ދިއްދާ"ގެ ނަމުން ނަން ދީފައެވެ. އާޝިޝް ކޯލް ބުނާ ގޮތުގައި "ދިއްދާ" މިވާހަކައަކީ އޭނާގެ ވާހަކައެއް ކަމަށާއި މި ވާހަކައިގެ ކޮޕީރައިޓްސްގެ ހައްގު އޮތީ އޭނާއަށް ކަމަށެވެ.
މި މައްސަލައާ ގުޅިގެން ބަންޑްރާ މެޓްރޮޕޮލިޓެން ކޯޓުން ހުކުރު ދުވަހު ވަނީ ކަންގަނާއާއި ދެކޮޅަށް އެފްއައިއާރް އެއް ރެޖިސްޓަރ ކުރަން ފުލުހުންނަށް އަމުރުކޮށްފައެވެ.
އާޝިޝް ކޯޓަށް ހުށައަޅާފައިވާ މައްސަލައިގައި ބުނެފައިވާ ގޮތުން އޭނާވަނީ މި ވާހަކައިގެ ފަސްމަންޒަރު ކަންގަނާއަށް އީމެއިލްގެ ޒަރިއްޔާއިން ފޮނުވާފައެވެ. އަދި ކަންގަނާ އޭނާގެ ހުއްދައާއި ނުލައި މި ވާހަގައިގެ ތަންތަން ކޮޅު ޓްވިޓާގައި ހިއްސާކޮށްފައި ވާކަމަށް އޭނާ ވަނީ ތުހުމަތުކޮށްފައެވެ. މީގެ އިތުރުން ކަންގަނާ މިހާރު ގެނެސްދިނުމަށް ތައްޔާރުވަމުންދާ ފިލްމު "މަނިކަރްނިކާ ރިޓާންސް" އަކީ އޭނާގެ ވާހަކައިގެ މައްޗަށް ބިނާކޮށް ހަދާ ފިލްމެއް ކަމަށްވެސް އާޝިޝް ވަނީ ތުހުމަތު ކޮށްފައެވެ.
މި މައްސަލަ ޖައްސާފައިވަނީ އައިޕީސީގެ ގާނޫނުގެ 405، 415، އަދި 120 ބީ، ސެކްޝަންގެ ދަށުންނެވެ. މީގެ އިތުރުން ކަންގަނާއާއި ދެކޮޅަށް ހަތަރު މައްސަލަ މިހާރުވެސް ދަނީ ކޯޓުގައި ބަލަމުންނެވެ. އޭގެ ތެރޭގައި ޖާވިދް އަޚްތާރް ޖައްސާފައިވާ ޑީފޭމޭޝަން މައްސަލަ ފާހަގަ ކޮށްލެވެއެވެ.
