ރިސޯޓުތަކުގައި މަސައްކަތްކުރާ 10،000އަށް ވުރެގިނަ މުވައްޒަފުންނަށް މިހާތަނަށް ވެކްސިން ދީފައި ވާކަމަށް ޓޫރިޒަމް މިނިސްޓްރީން ހާމަކޮށްފިއެވެ.
ޓޫރިޒަމް މިނިސްޓްރީން ކޮންމެ ހަފަތާއަކު ހާމަކުރާ ތަފާސް ހިސާބު ދައްކާގޮތުން މިދިޔަ ބުދަ ދުވަހާއި ހަމައަށް ރިސޯޓްތަކުގައި މަސައްކަތްކުރާ 10،586 މުވައްޒަފަކަށް ކޯވިޑް އިން ރައްކާތެރިވުމަށް ވެކްސިން ދީފައި ވެއެވެ. މީގެ އިތުރުން ގެސްޓް ހައުސްތަކުގައި މަސައްކަތްކުރާ 306 ފަރާތަކަށާއި ސަފާރީތަކުގައި މަސައްކަތްކުރާ 214 ފަރާތަކަށާއި، ޓޫރިސްޓް ހޮޓެލް ތަކުގައި މަސައްކަތްކުރާ 70 ފަރާތަކަށް މިހާތަނަށް ވެކްސިންގެ ފުރަތަަމަ ޑޯޒް ވަނީ ދީފައެވެ.
މީގެ އިތުރުން ޓުއަރ އޮޕަރޭޓަރުންނަށް ނިސްބަތްވާ މުވައްޒަފުންނާއި މިނިސްޓްރީގެ މުވައްޒަފުންގެ އިތުރުން، ފަތުރުވެރިކަމުގެ ދާއިރާގައި މަސައްކަތްކުރާ މުނިފޫހިފިލުވައިދޭ ފަންނާނުން ހިމަނައިގެން ޖުމްލަ 11،322 މީހަކަށް މިހާތަނަށް ވެކްސިން ދީފައިވެއެވެ.
ޓޫރިޒަމް ސިނާއަތުގައި ފްރަންޓްލައިންގައި މަސައްކަތްކުރާ މުވައްޒަފުންނަށް 10،000 ވެކްސިން ޑޯޒް ހާއްސަކޮށް ވެކްސިން ރަޖިސްޓްރޭޝަންއަށް ފުރުސަތު ހުޅުވާލީ މިދިޔަ މަހުގެ 4 ވަނަ ދުވަހުއެވެ.
ރާއްޖޭގައި މިހާރުވަނީ ވެކްސިންޖަހަންޖެހޭ ހުރިހާ އުމުރުފުރާތަކަށް ވެކްސިން ޖެހުމުގެ ފުރުޞަތު ހުޅުވާލާފައެވެ. އަދި ވެކްސިންގެ ފުރަތަމަ ޑޯޒް މާލޭގައި އާންމުކޮށް ހުޅުވާލައިގެން ޖެހުން މި މަހުގެ 15 އާއި ހަމައަށް ކުރިއަށް ގެންދިއުމަށް އެޗްޕީއޭއިން ވަނީ ނިންމާފައެވެ. ވެކްސިންގެ ދެވަނަ ޑޯޒް ޖަހަންޖެހެނީ 8 ހަފްތާ ފަހުންނެވެ.
ރާއްޖޭގައި މިހާތަނަށް ކޯވިޑް-19ގެ ވެކްސިން 188،436 މީހުންނަށް ވަނީ ދީފައެވެ.
