ފަަހަތުން އަރައި ބާޔާންއިން ޑޯޓްމަންޑް ބަލިކޮށްފި

ޖަރުމަނު ލީގުގައި ރޭ ބަޔާން މިއުނިކުން ފަހަތުން އަރައި 4-2 އިން ޑޯޓްމަންޑް ބަލިކޮށްފި އެވެ.

ރޭގެ މެޗު ފަށައިގެން ފުރަތަމަ 10 މިނިޓް ތެރޭ ޑޯޓްމަންޑްގެ ހުނަރުވެރި ފޯވާޑް އާލިން ބްރައުޓް ހާލަންޑް ވަނީ ދެ ގޯލު ޖަހައިފައެވެ. ފުރަތަމަ ހާފު ނިމުމުގެ ކުރިން ލެވަންޑޯސްކީ ވަނީ ދެ ވަނަ ގޯލު ޖަހައި ބަޔާނަށް އެއްވަރުކޮށްދީފައެވެ. ލެވަންޑޯސްކީގެ ދެ ވަނަ ގޯލަކީ އޭރިއާތެރެއިން ކިންގްސްލީ ކޯމަން އަށް ކުރި ފައުލަކަށް ދިން ޕެނަލްޓީ އަކުން ކާމިޔާބުކުރި ގޯލެކެވެ.

ބަޔާން މޮޅުވި ގޯލުތައް ޖެހީ މެޗުގެ ފަހު ވަގުތުގަ އެވެ. މެޗުގެ 88 ވަނަ މިނިޓްގައި ބަޔާނަށް ފުރަތަމަ ފަހަރަށް ލީޑުނަގައިދިން ގޯލު ޖެހީ ހުނަރުވެރި މިޑްފީލްޑަރު ލެއޯން ގޮރެޓްޒްކާއެވެ. އިތުރު ވަގުތުގައި މެޗުގެ ތިން ޕޮއިންޓް ބަޔާނަށް ކަށަވަރުކޮށްދިން ގޯލު ޖަހައި ލެވަންޑޯސްކީ އޭނާގެ ހެޓްރިކް ފުރިހަމަކުރި އެވެ. ރޭގެ ހެޓްރިކާ އެކު ލެވަންޑޯސްކީ މި ފަހަރު ލީގުގައި ޖެހި ގޯލުގެ އަދަދު ވަނީ 31 އަށް އަރައިފައެވެ. ލީގުގައި ބާކީ 10 މެޗު އޮތްއިރު، ކުރީގެ ކުޅުންތެރިޔާ ގާޑް މުލާ އެއް ލީގު ސީޒަނެއްގައި 40 ގޯލު ޖަހައިގެން ހަދާފައިވާ ރެކޯޑް މުގުރާލުމުގެ ފުރުސަތު ލެވަންޑޯސްކީ އަށް އޮތީ ހުޅުވިފައެވެ.

މި ނަތީޖާއާ އެކު ބަޔާނުން ވަނީ އަލުން ލީގުގެ އެއް ވަނަ އަށް ޖެހިލައިފައެވެ. ރޭގެ މެޗަށް ބަޔާން ނުކުތްއިރު އެއް ވަނައިގައި އޮތީ ކުރިން ކުޅުނު މެޗުން މޮޅުވި އާރްބީ ލައިޕްޒިގުއެވެ. ބަޔާން އަލުން އެއް ވަނަ އަށް އެރީ 24 މެޗުން 55 ޕޮއިންޓް ހަމަކޮށްގެންނެވެ. ދެ ވަނައިގައި އޮތް ލައިޕްޒިގަށް ވަނީ 24 މެޗުން 53 ޕޮއިންޓް ލިބިފައެވެ. ޑޯޓްމަންޑް ހަ ވަނައިގައި އޮތީ 24 މެޗުން 39 ޕޮއިންޓް ހޯދައިގެންނެވެ.