ބްރައިޓަން ބަލިކޮށް ލެސްޓާ ދެވަނައަށް

އިނގިރޭސި ޕްރިމިއާ ލީގުގައި ރޭ ބްރައިޓަން އަތުން 2-1 އިން މޮޅުވެ ލެސްޓާ ސިޓީ ލީގުގެ ދެ ވަނަ އަށް ޖެހިލައިފިއެވެ.

ބްރައިޓަން ދަނޑުގައި ރޭ ކުޅުނު މެޗުގެ 10 ވަނަ މިނިޓްގައި އެ ޓީމަށް ލީޑުނަގައިދިނީ އެޑަމް ލަލާނާ އެވެ. ލެސްޓާ އަށް އެއްވަރުކޮށްދިން ގޯލު މެޗުގެ 62 ވަނަ މިނިޓްގައި ކާމިޔާބުކުރީ ކެލެޗީ އިހެނާޗޯއެވެ. އަދި އެ ޓީމު މޮޅުކޮށްދިން ގޯލު މެޗު ނިމެން ތިން މިނިޓަށް ވެފައި ވަނިކޮށް ކާމިޔާބުކުރީ ޑެނިއަލް އަމާޓޭ އެވެ.

ލެސްޓާ ދެ ވަނަ އަށް އެރީ 28 މެޗުން 53 ޕޮއިންޓް ހޯދައިގެންނެވެ. ތިން ވަނައިގައި އޮތް މެންޗެސްޓާ ޔުނައިޓެޑަށް 27 މެޗުން ލިބިފައިވަނީ 51 ޕޮއިންޓެވެ. ލީގުގައި މިރޭ ޔުނައިޓެޑް ރަށުންބޭރުގައި ކުޅޭނީ އެއް ވަނައިގައި އޮތް މެންޗެސްޓާ ސިޓީއާ ދެކޮޅަށެވެ. ސިޓީ އެއް ވަނައިގައި އޮތީ 27 މެޗުން 65 ޕޮއިންޓް ހޯދައިގެންނެވެ.