ޝީޢީންގެ އެންމެ އިސް އިމާމް، ޝެއިޚް ސިސްތާނީއާއި ޕޯޕު އިރާގުގައި ބައްދަލު ކުރައްވައިފި

އިރާގުގެ ޝީޢީންގެ އެންމެ އިސް އިމާމު ކަމުގައިވާ ޝޭއިޚް އަލީ އަލް-ސިސްތާނީ އާއި، ކުރިސްޓިއަނުންގެ އެންމެ އިސް ފާދިރީ ޕޯޕު ފުރާންސިސް، އިރާގުގެ ނަޖަފްގައި މިއަދު ބައްދަލު ކުރައްވައިފިއެވެ.

އިރާގަށް ޕޯޕު މިހާރު ކުރައްވަމުން ގެންދަވާ ދަތުރުފުޅުގައި، މިއަދު އޮތް މިބައްދަލުވުން ބޭއްވިގެން މިދިޔައީ، ހަގުރާމައާއި އަދި ނަސްލީ ތަޅާފޮޅުމުގައި ސުންނާފަތިވެފައިވާ އިރާގުގައި، އެއްބައިވަންތަކަމާއެކީ ދިރިއުޅުމަށް ހިތްވަރުދޭ ރަމްޒެއްގެ ގޮތުންނެވެ.

ތާރީޚީ ގޮތުންނާއި އަދި ދީނީ ގޮތުންވެސް މުހިންމު ސިޓީއެއްކަމުގައިވާ އިރާގުގެ ނަޖަފުގައި މިބޭއްވުނު ބައްދަލުވުމަކީ، ޝީއީންގެ އިސް ދަންނަ ބޭކަލާކާ ޕޯޕު ބާއްދަލު ކުރެއްވި ފުރަތަމަ ފަހަރެވެ.

ޝޭއިޚް އަލީ އަލް-ސިސްތާނީއާއި ބައްދަލު ކުރައްވަން ޕޯޕު ވަޑައިގެންނެވި އިރު، ޕޯޕު ދަތުރުކުރެއްވި މަގުތަކުގައި ކުޑަކުދިން އިރާގުގެ ދިދައާއި އަދި، އިޓަލީގައި ހުންނަ ޕޯޕުގެ ގަޑުވަރު ކަމުގައިވާ ވެޓިކަންގެ ދިޔަ ހޫރުވަމުން، ކްރިސްޓިއަނުންގެ އެންމެ އިސް ފާދިރީ، ޕޯޕަށް މަރުހަބާ ކިޔާފައި ވެއެވެ.

2013 ވަނަ އަހަރު ކްރިސްޓިއަން ދީނުގެ އެންމެ އިސް ފާދިރީކަމާ ހަވާލުވެ ވަޑައިގަތުމަށްފަހު، ޕޯޕް ފުރާންސިން މިހާތަނަށް ވަނީ، މުސްލިމް މެޖޯރިޓީ އޮންނަ ގިނަ ގައުމުތަކަކަށް ވަޑައިގެންފައެވެ. މީގެތޭރެގައި ތުރުކީ، އުރުދުން، މިސްރު، ބަންގލަދޭޝް، އާޒަރުބައިޖާން، ޔުނައިޓެޑް އަރަބް އެމިރޭޓްސް އަދި ފަލަސްތީނުގެ ސަރަހައްދުތައް ހިމެނެއެވެ. މި ދަތުރުފުޅުތަކުގައި އޭނާވަނީ، ތަފާތު ދީންތަކުގެ މީހުން ގުޅިގެން އުޅުމަށް މަޝްވަރާއަށް އިސްކަން ދިނުމަށް ގޮވާލައްވާފައެވެ.

ސިސްތާނީއަކީ، އިރާގުގެ އިތުރުން ދުނިޔޭގެ އެތައްގައުމެއްގައި ދިރިއުޅޭ ޝީޢީ މަޒުހަބުގެ މުސްލިމުންގެ އެންމެ އިސް އިމާމެވެ.

އަދި އޭނާއަކީ އިރާގުގެ ސިޔާސީ މަސްރަހުގައިވެސް ނުފޫޒުގަދަ ބޭފުޅެކެވެ. މިގޮތުން އޭނާއަށް ތާއީދުކުރާ އެތައް ހާސްބަޔަކު، 2014 ވަނަ އަހަރު އައިސިސްއާއި ހަގުރާމަ ކޮށްފައިވާއިރު، 2019 ވަނަ އަހަރު އިރާގުގެ އޭރުގެ ސަރުކާރު އިސްތިއުފާ ދީފައިވަނީވެސް، އޭނާއަށް ތާއީދުކުރާ މީހުން މެދުނުކެޑި ކުރަމުންދިޔަ މުޒާހިރާތަކުގެ ނަތީޖާއެއްގެ ގޮތުންނެވެ.

އުމުރުފުޅުން 90 އަހަރުގެ، ސިސްތާނީގެ ގާތް މީހުން މައުލޫމާތު ދޭގޮތުގައި، މެހުމާނުންނާ ބައްދަލުކުރުމުގެ ގޮތުން ބައްދަލުވުތައް ބޭއްވުމަކީ ވަރަށް މަދުން ނޫނީ އޭނާ ނުކުރައްވާ ކަމެކެވެ. އަދި، އިރާގުގެ ކުރީގެވެސް އަދި މިހާރުގެ ބޮޑުވަޒީރާވެސް ބައްދަލުކޮށް ވާހަކަ ދެއްކެވުމަށް އޭނާ ވަނީ ދެކޮޅު ހައްދަވާފައެވެ.

އިރާގުގެ ރައީސް އޮފީހުގެ ފަރާތުން މައުލޫމާތު ދީފައިވާ ގޮތުގައި ސިސްތާނީ ޕޯޕާ ބައްދަލުކުރުމަށް އެއްބަސްވެ ވަޑައިގެންފައިވަނީ، މި ބައްދަލުވުމުގައި އިރާގުގެ އެއްވެސް އޮފިޝަލަކު ބައިވެރި ނުވުމަށް ޝަރުތު ކުރުމަށްފަހުގައެވެ. އަދި ޕޯޕާ ސިސްތާނީ ބައްދަލު ކުރައްވާފައިވަނީ، ނަޖަފް ސިޓީގެ ހަނި މަގެއްގައި ހުންނަ، އެތައް ޒަމާނެއް ކުރިން ކުއްޔަށް ހިފައިގެން އޭނާ ދިރިއުޅުއްވަމުން ގެންދަވާ އަމިއްލަ ގޭގައެވެ.

ސިސްތާނީއާއެކު ބޭވުނު 55 މިނިޓްގެ ބައްދަލުވުމަށްފަހު ޕޯޕު ވަޑައިގަތުމަށް ހަމަޖެހިފައިވަނީ، އިރާގުގެ ދެކުނުގައި އޮންނަ، ތާރީޚީ އޫރު ސަހަރު ބައްލަވާލެއްވުމަށެވެ. މިއީ ސަލާމާއި ސަލަވާތްލެއްވި އިބްރާހިމްގެ ފާނު އުފަންވެ ވަޑައިގެންނެވި ކަމަށް ބުނާ ސަހަރެވެ.

އިރާގަށް ކުރައްވަމުން ގެންދަވާ މި ދަތުރުފުޅުގައި، ތަފާތު ދީންތަކުގެ މީހުން ބައިވެރިވާ ޚާއްސަ އެއްވުމެއްގައި ޕޯޕު ތަގުރީރު ކުރެއްވުމަށްވެސް ވަނީ ހަމަޖެހިފައެވެ.