ގައުމީ ބެންކުގެ 2019 ވަނަ އަހަރުގެ ހިއްސާގެ ފައިދާ ބަހަން ފަށައިފި އެވެ.
ބެންކް އޮފް މޯލްޑިވްސް، ބީއެމްއެލުން ބުނީ މިދިޔަ އަހަރު ބޭއްވި އެ ބޭންކުގެ 37 ވަނަ އަހަރީ އާންމު ޖަލްސާގައި ފާސްކުރި 2019 ވަނަ އަހަރުގެ ހިއްސާގެ ފައިދާ ބެހުމުގެ ހުއްދަ މަރުކަޒީ ބެންކުން މިހާރު ދީފައި ވާކަމަށެވެ.
އެގޮތުން ހިއްސާއަކަށް 26 ރުފިޔާގެ މަގުން ޖުމްލަ 139،929920 (ސަތޭކަ ތިރީސްނުވަ މިލިއަން ނުވަލައްކަ ނަވާވީސްހާސް ނުވަސަތޭކަ ވިހި) ރުފިޔާ ހިއްސާދާރުންނަން ބެހުމަށް އަހަރީ އާންމު ޖަލްސާގައި ހިއްސާދާރުން ވަނީ ފާސްކޮށްފަ އެވެ.
ބެންކުން ބުނީ ހިއްސާދާރުންގެ ތެރެއިން ހިއްސާގެ ފައިދާ އެކައުންޓަށް ޖަމާކުރުމަށް އެދުނު ފަރާތްތަކުގެ ހިއްސާގެ ފައިދާ މިހާރު އެފަރާތްތަކުގެ އެކައުންޓަށް ޖަމާކޮށްފައި ވާކަމަށެވެ.
37 ވަނަ އަހަރީ އާންމު ޖަލްސާގައި ފާސްކުރި ގޮތަށް ހިއްސާގެ ފައިދާ ބަހަން ހަމަޖެހިފައިވަނީ އޮގަސްޓްމަހުގެ 18ވަނަ ދުވަހާއި ހަމައަށް އެ ބެންކުގެ ހިއްސާދާރުންގެ ރަޖިސްޓްރީގައި ހިމެނިފައިވާ ފަރާތްތަކަށެވެ.
ހިއްސާގެ ފައިދާ އެކައުންޓަށް ޖަމާކުރުމަށް ނުވަތަ ބޭންކް އެކައުންޓް ބަދަލުކުރުމަށް ބޭނުންވާ ހިއްސާދާރުން އަންނަމަހުގެ 30 ވަނަ ދުވަހުގެ ކުރިން މައުލޫމާތު ފޯމު ފުރިހަމަ ކުރުމަށް ބީއެމްއެލުން އެދެއެވެ. އަދި މިފޯމު ބީއެމްއެލްގެ މައި އޮފީހުގެ 6 ވަނަ ފަންގިފިލާގައި ހުންނަ ކޯޕަރޭޓް އެފެއާޒް ޔުނިޓަށް ނުވަތަ ބޭންކުގެ ބްރާންޗަކަށް ނުވަތަ އީ-މެއިލް މެދުވެރިކޮށް ހުށަހެޅޭނެކަމަށް ބެންކުން ބުނެއެވެ.
