އިސްރާއީލުން ހިފާފައިވާ ފަލަސްތީނުގެ ބިންތަކުގައި ހިންގާފައިވާ އިންސާނިއްޔަތާ ޚިލާފު ބޮޑެތި ޖަރީމާތަކުގެ ތަހުގީގުތައް، ބައިނަލްއަގުވާމީ ޖިނާޢީ ކޯޓުން، އިސްރާއީލުގެ ދެކޮޅު ހެދުމާއެކުވެސް، ފަށާފައިވާ ކަމަށް، އެކޯޓުގެ ޗީފް ޕްރޮސެކިއުޓަރ ވިދާޅު ވެއްޖެއެވެ.
ކޯޓުގެ ޕްރޮސެކިއުޓަރ ފަޓޯއު ބެންސޫޑާ ނެރުއްވި ބަޔާނެއްގައި ވިދާޅުވެފައި ވަނީ، މިތަހުގީގުތައް ކުރިޔަށް ގެންދަވާނީ، "މިނިވަންކަމާއެކު، ވަކި ފަރާތަކަށް ބުރަ ވުމެއް ނެތި، ނަތީޖާ ހާސިލް ކުރުމަށްޓަކާ، އެއްވެސް ޖެހިލުމެއް ނެތި އަދި، އެއްވެސް ފަރާތަކަށް ފައިދާއެއް އަދި ގެއްލުމެއްވެސް ދިނުމަކާވެސް ނުލައެވެ."
"ބައިނަލް އަގުވާމީ ޖިނާއީ ކޯޓުގެ ޕްރޮސެކިއުޓަރގެ އޮފީހުން، މިއަދު، ފަލަސްތީނުގައި ހިގާފައިވާ ކަންކަމާ ގުޅޭ ތަހުގީގުތައް ކުރުމަށް ފަށާފައިވާކަން އަހަރެން ޔަގީންކޮށް އަރުވަން،" ބެންސޫޑާ ވިދާޅުވެފައި ވެއެވެ.
2019 ވަނަ އަހަރު، ބެންސޫޑާ ވިދާޅުވެފައިވަނީ، ގަޒާ ސްޓްރިޕްގައި އިސްރާއީލުން ހިންގާފައިވާ އަސްކަރީ ހަރާާތްތަކާ އަދި މީގެ އިތުރުން ހިފާފައިވާ ހުޅަގު އައްސޭރީގެ ބިންތަގުގައި ކުރިޔަށް ގެންދާ ސެޓްލްމަންޓް ހަރަކާތްތަކުގައި، އިންސާނިއްޔަތާ ޚިލާފަށް ހިންގާފައިވާ ޖަރީމާތައް ތަހުގީގު ކުރުމަށް އެކަށީގެންވާ ވަރަަށް ހެކި ހުރި ކަމުގައެވެ.
ބެންސޫޑާ ވިދާޅުވެފައިވަނީ، މި ބިންތަކުގައި ހިންގާފައިވާ އިންސާނިއްޔަތާ ޚިލާފު ޖަރީމާތަކުގެ ޒިންމާ އުފުލަން ޖެހޭނީ އިސްރާއީލުގެ އަސްކަރިއްޔާއިންނާ، އަދި އޭގެ އިތުރުން ފަލަސްތީނުގެ މިނިވަންކަމަށް ޖިހާދު ކުރަމުންދާ ހަމާސް ޖަމާއަތުން ކަމުގައެވެ.
އޭނާގެ އެންމެ ފުރަތަަމަ ދިރާސާތަކަށްފަހު އޭނާ ވަނީ، މި ހަމަނުޖެހުންތައް ހިގާފައިވާ ސަރަހައްދުތަކަށް، ކޯޓުގެ އިހުތިސާސް ހިގާނެތޯ ނުވަތަ ނޫންތޯ ކަޑައަޅާ ދިނުމަށް ކޯޓުގެ ފަނޑިޔާރުންގެ ކިބައިން އެދިފައެވެ.
މިގޮތުން، ،މިއަހަރުގެ ފެބްރުއަރީމަހު، ކޯޓުންވަނީ، 1967ގެ މެދުއިރުމަތީގެ ހަގުރާމައިގައި އިސްރާއީލުން ހިފާފާއިވާ ފަލަސްތީނުގެ ބިންތަކަށް ކޯޓުގެ އިހުތިސާސް ހިގާނެ ކަމަށް ނިންމާފައެވެ.
2014 ވަނަ އަހަރު، އިސްރާއީލާއި ފަލަސްތީނުގެ ހަގުރާމަވެރި ޖަމާއަތްތަކާ ދެމެދު 50 ދުވަސްވަންދެން ހިގި މިހަމަ ނުޖެހުންތަކުގައި، އައްސޭރިފަށުގައި އޮންނަ ގާޒާއަށް ބޮޑެތި ގެއްލުންތަކެއް ލިބި، ފަލަސްތީނުގެ 2،251 މީހުން މަރުވެފައިވާއިރު، އިސްލާއީލުގެ 74 މީހަކުވެސް މަރުވިއެވެ. އިސްރާއިލުން މަރުވެފައިވާ ގިނަ މީހުންނަކީ އެގައުމުގެ ސިފައިންނެވެ.
މިމައްސަލައާއި ގުޅޭގޮތުން ބައިނަލް އަގުވާމީ ޖިނާޢީ ކޯޓުން ތަހުގީގަށް ބޭނުންވާ ހޯދުންތައް ހޯދާ އަދި އެތަކެއް ރިޕޯޓުތަކެއް ތައްޔާރު ކުރަމުންދާތާ މިހާތަނަށް 5 އަހަރު ވަނީ ފާއިތުވެގެން ގޮސްފައެވެ.
ބައިނަލް އަގުވާމީ ކްރިމިނަލް ކޯޓުގެ ފަނޑިޔާރުން ވިދާޅުވެފައިވަނީ، އެކޯޓުގެ މިނިންމުމަކީ، އެއްވެސް ގައުމެއްގެ ގައުމީ ހައިސިއްޔަތު ބަލައި ނުގަތުމާއި ނުވަތަ ސަރަހައްދީ ރޮގާ ގުޅޭގޮތުން އުފެދޭ ޚިޔާލުތަފާތުވުންތަކާ ގުޅުން ހުރި ނިންމުމެއް ނޫން ކަމަށާއ، އަދި މި ނިންމުމަކީ، އެކޯޓު އުފެއްދުމަށް އެއްބަސްވެވިފައިވާ ލިޔެކިޔުންތަކުގެ މައްޗަށް ފަނޑިޔާރުން ނިންނަމާ ގާނޫނީ ނިންމެވުމެއް ކަމުގައެވެ.
ބައިނަލް އަގުވާމީ ކްރިމިނަލް ކޯޓުގެ މެމްބަރެއްގެ ގޮތުގައި މިހާތަނަށް ހިމެނިފައި ނުވާ އިސްރާއީލުން ވަނީ މިކޯޓުގެ ގާނޫނީ ހައިސިއްޔަތު ބަލައި ނުގަންނާނޭ ކަމަށް ބުނެފައެވެ.
އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ ވިދާޅުވެފައިވަނީ، މިއީ ޔަހޫދީ ދައުލަތާ ދެކޮޅަށް ކޯޓުން ނިންމާފައިވާ ބޭއިންސާފު ނިންމުމެއް ކަމުގައެވެ. އަދި ނިންމުމާ ދެކޮޅު ހައްދަވާނެ ކަމަށް އޭނާވަނީ ވިދާޅުވެފައެވެ.
އެހެންނަމަވެސް، ފަލަސްތީނުގެ ހަމާސް ޖަމާއަތުންވަނީ ކޯޓުގެ މިނިންމުމަށް މަރުހަބާ ކިޔާފައެވެ. އަދި ހަމާސްއިން ބުނެފައިވަނީ، ކޯޓުން ހިންގާ ތަހުގީގަށް އެ ޖަމާއަތުން ޖެހިލުން ނުވާކަމުގައެވެ.
