ގާނޫނު އަސާސީގެ 102 ވަނަ މައްދާގެ ދަށުން އެއްވެސް ފަރާތަކަށް ފޯނު އެލަވަންސެއް ހަމަޖައްސަވާ ދެއްވާކަމަށް ވާނަމަ އެފަދަ އެލަވަންސެއް އެންމެ ފުރަތަމަ ހަމަޖައްސަވާ ދެއްވަން ޖެހޭނީ ރައްޔިތުންގެ މަޖިލީހުގެ މެމްބަރުންނަށް ކަމަށް، ކުޑަހުވަދޫ ދައިރާގެ މެމްބަރު އަހުމަދު އާމިރު ވިދާޅު ވެއްޖެއެވެ.
މަޖިލިހުގެ މެމްބަރުންނަށް ފޯނު އެލަވަންސް ހަމަޖައްސަވަ ދެއްވަން ޖެހޭކަމަށް ވިދާޅުވެ އާމިރު ވާހަކަ ދައްކަވާފައިވަނީ، މެޖިސްޓްރޭޓުންނަށް ފޯނު އެލަވަންސް ފޯނު އެލަވަންސް ހަމަޖައްސަވައި ދެއްވުމަށް އެދިވަޑައިގެން ޖުޑީޝަލް ސާވިސް ކޮމިޝަނުން މާލިއްޔަތު ކޮމިޓީއަށް ހުށަހަޅުއްވާފައިވަ މައްސަލާގައި މާލިއްޔަތު ކޮމިޓީގައި ވާހަކަ ދައްކަވަމުންނެވެ.
މާލިއްޔަތު ކޮމިޓީގެ ބައްދަލުވުމުގައި ވާހަކަ ދައްކަވަމުން، އާމިރު ވިދާޅުވެފައިވަނީ، މަޖިލިސް މެމްބަރުންނަކީ އަމިއްލައަށް މުސާރަ ކަޑައަޅުއްވައިގެން ތިއްބެވި މެމްބަރުން ކަމަށާއި، ރައްޔިތުންގެ މަޖިލީހުގެ މެމްބަރުންނަށްވުރެ ގިނައިން ފޯނުކުރައްވަންޖެހޭ، އެއަށްވުރެ ގިނައިން ދާއިރާގެ މެމްބަރުންނަށް ގުޅަންޖެހޭ، އަދި އެއަށްވުރެ ގިނައިން މަސްއޫލިއްޔަތުގެ ތެރެއިން ފޯނުގެ ބޭނުން ކުރަންޖެހޭ ބަޔަކު ނުތިބޭނެ ކަމަށެވެ. އެހެންކަމުން، އެނަޒަރުން، އެއްވެސް ބަޔަކަށް ފޯނު އެލަވަންސެއް ދޭކަމަށްވާނަމަ، އެންމެ ފުރަތަމަ ފޯނު އެލަވަންސް ހައްގުވާނީ މަޖިލިސް މެމްބަރުންނަށް އާމިރު ވިދާޅުވިއެވެ.
އިތުރަށް އާމިރު ވިދާޅުވި ގޮތުގައި، ވަރިކައިވެންޏެއް އަހަރަކު އެއްފަހަރު ކުރުން ފިޔަވާ ކަމެއް ކުރާ ކޯޓުތައް ރައްޖޭގެ ރަށްތަކުގައި މަދުކަމަށާއި، އަދި ދިވެހިރާއްޖޭގެ މެޖިސްޓްރޭޓް ކޯޓުތަކުގެ މެޖޯރިޓީ މީހުންނަކީ ރަސްމީ ބޭނުންތަކަށް ފޯނުގެ ބޭނުން އަދަޔާ ޚިލާފަށް ބޭނުން ކުރަން ނުޖެހޭނެ މީހުން ކަމަށެވެ.
އާމިރު އިތުރަށް ވިދާޅުވީ، ދިމާވެގެން އުޅޭ މައްސަލައަކީ، ދަށު ކޯޓުތަކަށް ފޯނު އެލަވަންސް ހަމަޖައްސާ ނުދީ މަތީ ކޯޓުތަކަށް ފޯނުއެލަވަންސް ހަމަޖައްސާ ދިނުމެވެ. އަދި އެއީ އެންމެ ރަގަޅު ގޮތް ނޫންކަމަށް އޭނާވެސް ގަބޫލު ނުކުރައްވާ ކަމަށާއި، އަދި އެންމެ އިންސާފުވެރި ގޮތަކީ ގާނޫނު އަސާސީގެ 102 ވަނަ މާއްދާއަށް ރިއާޔަތްކޮށް، ދަށު ކޯޓުތަކުގެ ފަޑިޔާރުންނަށް އެލަވަސް ހަމަޖައްސަވާއިރު، މަޖިލިސް މެމްބަރުންނަށްވެސް ފޯނު އެލަވަންސެއް ހަމަޖައްސަވާ، އެ އެލަވަންސާއެކީ ކޯޓުތަކުގެ ފޯނު އެލަވަންސް ހަމަޖެއްސެވުންކަމުގައި ވެސް އާމިރު ވިދާޅުވިއެވެ.
މެޖިސްޓްރޭޓުންނަށް ފޯނު އެލަވަންސް ހަމަޖައްސައި ދެއްވުމަށް އެދިވަޑައިގެން ޖުޑީޝަލް ސާވިސް ކޮމިޝަނުން ހުށަހަޅުއްވާފައިވާ މައްސަލާގައި މަޝްވަރާ ކުރެއްވުމަށްފަހު، 24 ފެބްރުއަރީ 2021 ވަނަ ދުވަހު ބޭއްވި މާލިއްޔަތު ކޮމިޓީގެ މިއަހަރުގެ 7 ވަނަ ބައްދަލުވުމުގައި ކޮމިޓީއަށް އެވަގުތު ހާޒިރުވެ ވޯޓުގައި ބައިވެރިވި މެމްބަރުންގެ އަޢުލަބިއްޔަތުން ނިންމާފައިވަނީ، ޖޭއެސްސީން ހުށަހަޅުއްވާފައިވާ ގޮތަށް ކޯޓުތަކުގެ މެޖިސްޓްރޭޓުންނަށް ފޯނު އެލަވަންސްގެ ގޮތުގައި 500 ރުފިޔާ ލިބިދުނުމުގެ އިތުރުން މި ނިންމުމަށް ޢަމަލުކުރަން ފަށާ ތާރީޚަކީ 01 އެޕްރިލް 2021 ކަމުގައިވެސް ހަމަޖެއްސުމަށެވެ.
ދަށުކޯޓުތަކުގެ މެޖިސްޓްރެޓުންނަށް ފޯނު އެލަވަސް ހަމަޖެއްސުމަށް މާލިއްޔަތު ކޮމިޓީގައި ނެގުނު ވޯޓުގައި ރިޕޯޓު ފާސްކުރުމަށް އާމިރު ވޯޓު ދެއްވާފައެއް ނުވެއެވެ.
މި ރިޕޯޓަށް ވޯޓަށް އެހުމަށް މިއަދު ޖަލްސާއަށް ވަނީ އެޖެންޑާ ކުރައްވާފައެވެ.
