އެމްބާޕޭގެ ދެލަނޑާއެކު ޕީއެސްޖީ ދެވަނައަށް

ފްރާންސް ލީގުގައި ކައިލަން އެމްބާޕޭ ކާމިޔާބުކުރި ދެލަނޑާއެކު ޕީއެސްޖީ ތާވަލުގެ ދެވަނައަށް ކުރިޔަށް ޖެހިލައިފިއެވެ.

ރަށުންބޭރުގައި ޑިޖޯންއާ ދެކޮޅަށް ކުޅުނު މެޗުން ޕީއެސްޖީ ކުރި ހޯދީ 4-0 ލަނޑުންނެވެ. މެޗު ފަށައިގެން 6ވަނަ މިނުޓުގައި މޮއިސް ކީން ލަނޑުން ޕީއެސްޖީ ލީޑުނެގި އިރު އެމްބާޕޭ ގެ ފުރަތަމަ ލަނޑު ކާމިޔާބުކުރީ ލިބުނު ޕެނެލްޓީއަކުންނެވެ. ޕީއެސްޖީ ލީޑު އިތުރަށް ފުޅާކުރި ލަނޑު އެމްބާޕޭ ކާމިޔާބުކުރީ ދެވަނަ ހާފްގެ ކުރީކޮޅުއެވެ.

ޕީއެސްޖީގެ ހަތަރުވަނަ ލަނޑު އެޓީމަށް ކާމިޔާބުކޮއްދިނީ ޑަނިލޯ ޕެރެއިރާއެވެ. ރޭގަ އެމްބާޕޭ ޖެހި ދެލަނޑާއެކު އޭނާ ކުލަބަށް ޖަހައިދިން ލަނޑުގެ އަދަދުވަނީ 113 އަށް އަރާފައެވެ. މި ހޯދި މޮޅާއެކު ޕީއެސްޖީ ދެވަނައިގަ އޮތީ އެއްވަނައިގަވާ ލިލޭއަށް ވުރެ އެއްޕޮއިންޓް މަދުން ހޯދައިގެންނެވެ. ލީގުގައި މިހާތަނަށް ކުޅުނު 27 މެޗުން ޕީއެސްޖީ ވަނީ 57 ޕޮއިންޓް ހޯދާފައެވެ.