ލ.ގަމުގައި ކަރަންޓީންގައިތިބި ސިފައިންގެ ތެރެއިން މިހާތަނަށް 62 މީހަކު ކޯވިޑް-19އަށް ޕޮޒިޓިވްވެފައިވާކަމަށް ހެލްތް އެމަރޖެންސީ އޮޕަރޭޝަން ސެންޓަރުން ވިދާޅުވެއްޖެއެވެ.
ސިފައިންގެ ތަމްރީން ޕްރޮގްރާމެއްގައި ބައިވެރިވުމަށް ސިފައިންގެ 93 މީހަކު ވަނީ އެރަށަށް ދަތުރުކޮށްފައެވެ.
އެޗްއީއޯސީގެ ތަރުޖަމާނު ޑރ. ފާތިމަތު ނަޒްލާ ރަފީޤު ވިދާޅުވީ ކަރަންޓީންގައި ތިބި ސިފައިންގެ ތެރެއިން އިއްޔެ އެކަކު ޕޮޒިޓިވްވެފައިވާކަމަށާއި މިއަދު އިތުރު 3 މީހަކު ޕޮޒިޓިވްވެފައިވާކަމަށެވެ. އަދި ޕޮޒިޓިވްވި މީހުންނާއި ކޮންޓެކްޓްވި 31 ސިފައިން އެބަތިބިކަމަށްވެސް ޑރ.ނަޒްލާ ވިދާޅުވިއެވެ.
ލ.ގަމުގައި ކުރިއަށްގެންދާ ތަމްރީން ޕްރޮގްރާމެއްގައި ބައިވެރިވުމަށް ސިފައިން ގަމަށް ދަތުރުކޮށްފައިވަނީ މިދިޔަމަހުގެ 19ވަނަ ދުވަހުއެވެ. އަދި އެތަނުން ގިނަ ބަޔަކު ޕޮސިޓިވްވެފައިވާކަން އެނގިފައިވަނީ ކަރަންޓީނުން ދޫކޮށްލުމަށް ހެދި ޓެސްޓުތަކުންނެވެ. ތަމްރީންގައި ބައިވެރިވުމަށް ދިޔަ ސިފައިން ތިބެނީ ލ.ގަމުގައި މީހުން ދިރިނޫޅޭ ސަރަހައްދުގައި ހަދާފައިވާ އެމްއެންޑީއެފް ކޭމްޕް ސައިޓެއްގައެވެ. އަދި ކޭމްޕުން ޕޮޒިޓިވްވި މީހުން ބައިތިއްބާފައިވަނީ ކޭމްޕުގެ ވަކި ސަރަޙައްދެއްގައެވެ. ބާކީތިބި ސިފައިންގެތެރެއިން ޢަލާމާތްތައް ހުރި މީހުންނާއި، ޢަލާމާތްތައް ނެތް މީހުންވެސް ތިބީ ކޭމްޕްސައިޓްގައި ވަކިންނެވެ.
ގަމު ހޮސްޕިޓަލުން ވަނީ މިކޭމްޕްގައި ތިބި މީހުންނަށް ބޭނުންވާ ސިއްޙީ އެހީތެރިކަން ފޯރުކޮށްދެމުންދާކަމަށް ވިދާޅުވެފައެވެ. އެގޮތުން ފަރުވާ ބޭނުންވާ މީހުންނަށް ހޮސްޕިޓަލަށް ގެންގޮސް ފަރުވާ ދިނުމުގެ ކަންކަން ހަމަޖައްސަމުންދާކަމަށްވެސް އެހޮސްޕިޓަލުން ވިދާޅުވެއެވެ.
ކޮމެންޓު ފޮނުވާ