ފާއިތުވެެދިޔަ ޖެނުއަރީމަހު، އެމެރިކާގެ ކުރީގެ ރައީސް ޑޮނަލްޑް ޓްރަމްޕަށް ތާޢީދުކުރާ ސަޕޯޓަރުން އެގައުމުގެ ގާނޫނު ހަދާ މަޖިލިސްކުރާގެ، ކެޕިޓަލް ހިލްއަށް ދިން ހަމަލާ ތަހުގީގު ކުރުމަށް، 9/11ގައި އެމެރިކާއަށް ދިން ޓެރަރިސްޓް ހަމަލާއަށްފަހު އުފެއްދި ބާވަތުގެ ކޮމިޝަނެއް އެކުލަވާލައްވާނެ ކަމަށް، ކޮންގެސްގެ ރައީސާ ނާންސީ ޕެލޯސީ ވިދާޅުވެއްޖެއެވެ.
މެމްބަރުންނަށް ފޮނުއްވި ސިޓީއެއްގައި، ގާނޫނު ހަދާ މަޖިލިހުގެ ރައީސާ ޕެލޯސީ ވިދާޅުވެފެއިވަނީ، މި ކޮމިޝަންއަކީ، 2001 ވަނަ އަހަރުގެ ސެޕްޓެމްބަރު މަހުގެ 11 ވަނަ ދުވަހު އެމެރިކާއަށް ދިން ޓެރަރިސްޓް ހަމަލާއަށްފަހު، "އެ ހާދިސާ ހިންގަން މެދުވެރިވީ ސަބަބުތަކާ އަދި ހަމަލާގެ ހަގީގަތް ދެނެގަތުމަށް" އުފެއްދި ޒާތުގެ ކޮމިޝަނެއް ކަމުގައެވެ.
"އަހަރެމެންގެ ރައްކާތެރިކަން ހިމާޔަތްކުރުމަށް، ދެން އަޅަން އޮތް ފިޔަވަޅަކީ، ކެޕިޓަލް ހިލްއަށް ދިން ޓެރަރިސްޓު ހަމަލާ ހިގަން މެދުވެރިވީ ސަބަބުތަކާ އަދި އެފަދަ ދެވަނަ ހާދިސާއެއް ތަކުރާރުވެގެންދިޔަ ނުދިނުމަށް ކުރެވެން ހުރި މަަސައްކަތްތައް ދެނެގަތުމަށްޓަކާ ސެޕްޓެމްބަރ 11ގައި އުފެއްދި ބާވަތުގެ ކޮމިޝަނެއް އުފެއްދުން…އަދި މީގެއިތުރުން، ސުލްހަވެރިކަމާއެކު ވެރިކަން ބަދަލުވެދިއުމުގައި، އެމެރިކާގެ ކެޕިޓަކް ޕޮލިސްއާއި، އަދި ސަރުކާރުގެ އެހެން މުވައްސަސާތަކުގެ އިތުރުން، މުޅި ދައުލަތާއި، މަރުކަޒީ ސަލާމަތީ ބާރުތަކުންވެސް، ތައްޔާރުވެފައި ތިބި މިންވަރާއި ހަރަކާތަތެރިވިގޮތް ދެނެގަތން،" ގާނޫނު ހަދާ މަޖިލިހުގެ މެމްބަރުންނަށް ފޮނުއްވި ސިޓީގައި ޕެލޯސީ ވިދާޅުވެފައި ވެއެވެ.
އެމެރިކާގެ ސެނެޓްގެ ތިންބައިކުޅަ ދެބައިގެ ވޯޓު ހަމަ ނުކުރެވުމުގެ ސަބަބުން، 5 މީހުން މަރުވެދިޔަ، އެމެރިކާގެ ކެޕިޓަކް ހިލްއަށް ޓްރަމްޕްގެ ސަޕޯޓަރުން ދިން ހަމަލާގައި އޭނާ ކުއްވެރި ނުވާކަމަށް ނިންމާ، ސެނެޓްގެ ޝަރީއަތުން ޓްރަމްޕްވަނީ ސަލާމަތް ވެފައެވެ.
ޖެނުއަރީ 6 ވަނަ ދުވަހު، ޓްރަމްޕްވަނީ، ޖޯ ބައިޑްންގެ އިންތިޚާބީ ކާމިޔާބީއަށް ރުހުން ދިނުމުގެ ޖަލްސާ ކެޕިޓަލް ހިލްގައި ކުރިޔަށްދަނިކޮށް، އެސަރަހައްދަށް އޭނާގެ ސަޕޯޓަރުން ދިއުމަށް ހިތްވަރުދީ އެކަމަށް ގޮވާލައްވާފައެވެ. އަދި ސަޕޯޓަރުންނާއެކީ އެސަރަހަށްދަށް ވަޑައިގަންނަވާނެކަމަށް ވިދާޅުވިނަމަވެސް، ޓްރަމްޕް ސަޕޯޓަރުންނާއެކީ ކެޕިޓަލް ހިލް ހިމެނޭ ސަރަހައްދަށް ވަޑައިގެންފައެއް ނުވެއެވެ. "ބާރު ގަދަކަން ދައްކައިގެން މެނުވީ، ކަލޭމެންނަށް ގައުމު އަބުރާ ނުލިބޭނެ،" އެދުވަހު، ތާއީދުކުރާ ފަރާތްތަކާ މުޚާތަބުކޮށް ވާހަކަ ދައްކަވަމުން ޓްރަމްޕް ވިދާޅުވެފައި ވެއެވެ.
އަދި އޭގެ ކުރިން އެތަކެއް ހަފްތާއެއް ވަންދެން ޓްރަމްޕްވަނީ، "ވައްކަން ކުރުން ހުއްޓުވާ" މި ޝިއާރު ބޭނުންކޮށްގެން، އިންތިޚާބާއި ގުޅޭގޮތުން ސާބިތު ނުހިފޭ އެތައްކެއް ވާހަކަތަކެއް ދައްކާ، އޭނާއަށް ތާއީދުކުރާ ފަރާތްތަކުގެ ލޭ ކައްކުވާލުމަށް އެތަކެއް މަސައްކަތްތަކެއް ކޮށްފައެވެ.
ސެނެޓުގައި ކުރިޔަށް ދިޔަ ޝަރީއަތުގައި، ޓްރަމްޕް ދިފާއުކުރި ގާނޫނީ ވަކީލުންވަނީ، އޭނާ ގާނޫނާ ޚިލާފު އެއްވެސް ކަމެއް ކުރައްވާފައި ނުވާކަމަށް ވިދާޅުވެ ވަކާލާތު ކުރައްވާފައެވެ. އަދި އޭނާ ކުއްވެރި ނުވާކަމަށް ސެނެޓުން ނިންމުމަށްފަހު ނެރުނު ބަޔާނުގައިވެސް، ޓްރަމްޕަ ވަނީ އޭނާ އެއްވެސް ގޯހެއް ހައްދަވާފައި ނުވާނެ ކަމަށް ވިދާޅުވެފައެވެ.
