މި ފެބްރުއަރީމަހު 1 ވަނަ ދުވަހު މިޔަންމާރ އަށް ގެނެވުނު އަސްކަރީ ބަޢާވާތަށްފަހު، ހައްޔަރުުރެވިފައިވާ އަންގސަންގ ސޫކީގެ މައްޗަށް އެގައުމުގެ އަސްކަރީ ސަރުކާރުން އިތުރު ދައުވާތަކެއް އުފުލައިފިއެވެ.
ވީޑިއޯ ލިންކު މެދުވެރިކޮށް ކޯޓަށް ހާޒިރުވި، އަންގސަންގ ސޫކީގެ މައްޗަށް މިފަހަރު އުފުލާފައިވާ ދައުވާއަކީ، އެގައުގެ ގުދުރަތީ ކާރިސާތަކާބެގޭ ގާނޫނާ ޚިލާފުވެފައިވާތީ އުފުލާފައިވާ ދައުވާއެކެވެ. އަންގސަންގ ސޫކީގެ ހައްޔަރު ކުރުމަށްފަހު، އެންމެފުރަތަމަ އެނާގެ މައްޗަށް އަސްކަރީ ސަރުކާރުން އުފުލާފައިވާ ދައުވާއަކީ، ގާނޫނާ ޚިލާފަށް ވޯކި ޓޯކިތަކެއް ގެންގުޅޭފައިވުމުގެ ދައުވާއެވެ.
މިހަފްތާގައި އަންގސަންގ ސޫކީގެ މައްޗަށް އާ ދައުވާތަކެއް އުފުލާފައިވާއިރު، މި ދައުވާތަކުގެ ތެރެއިން އޭނާގެ މައްޗަށް ކުރެވޭ ތުހުމަތުތަކުގެ ތަފްސީލުތަކެއް އަދި މީޑިއާތަކަށް ހާމަކޮށްފައެއް ނުވެއެވެ.
އަންގސަންގ ސޫކީގެ މައްޗަށް އާދައުވާތަކެއް އުފުލާފައިވާއިރު، އަދި އަސްކަރިއްޔާއިން ގެނެސްފައިވާ ބަޢާވާތާ ދެކޮޅަށް އެގައުމުގައި ބޮޑެތި މުޒާހިރާތައް ކުރިޔަށް ދާއިރު، އަސްކަރީ ސަރުކާރުން މިހަފްތާގައި ވަނީ، އިންތިޚާބު ބާއްވާއި މަދަނީ ސަރުކާރަކާ ބާރުތައް ހަވާލުކުރާނެ ކަމަށް ވައުދުވެފައެވެ. ކޮންމެ ދުވަހަކު ކަހަލަ ގޮތަކަށް ކުރިޔަށްދާ މި މުޒާހިރާތަކުގައި، މުޒާހިރާ ކުރާފަރާތްތަކުން ދަނީ، އެމީހުން އިންތިޚާބު ކޮށްގެން ހޮވާފައިވާ ލީޑަރު ދޫކޮށްލުމަށް ގޮވާލަމުންނެވެ.
ބަޢާވާތައްފަހު، ފުރަތަމަ ފަހަރަށް، އެގައުމުގެ އަސްކަރިއްޔާއިން ބޭއްވި ނިއުސް ކޮންފަރެންސެއްގައި، އަސްކަރިއްޔާގެ ތަރުޖަމާން، ބްރިގޭޑިއަރ ޖެނެރަލް ޒާއޮ މިން ތުން ވިދާޅުވެފައިވަނީ، ވެރިކަމުގައި ދެމިތިބުމުގެ އެއްވެސް ޝައުގުވެރިކަމެއް އަސްކަރިއްޔާގެ ނެތްކަމުގައެވެ. އަދި ވަރަށް އަވަހަށް އާންމު އިންތިޚާބެއް ބާއްވާ، އިންތިޚާބު ކާމިޔާބު ކުރާ ޕާޓީއަކާ ވެރިކަމުގެ ބާރުތައް އަސްކަރިއްޔާއިން ހަވާލު ކުރާނެކަމުގައި ވެސް އޭނާ ވިދާޅުވެފައި ވެއެވެ.
އެހެންނަމަވެސް، އާންމު އިންތިޚާބެއް ބާއްވާނީ ކޮންއިރަކުންކަމެއް އޭނާ ވިދާޅުވެފައެއް ނުވެއެވެ.
އަންގާރަދުވަހު ބޭއްވުނު ނޫސް ކޮންފަރެންސްގައި، ޒާއޮ މިން ތުން ވަނީ، ފާއިތުވެދިޔަ ނޮވެމްބަރުމަހު ބޭއްވުނު އިންތިޚާބުގައި މަކަރުހަދާ އޮޅުވާލާފައިވާ ކަމަށް އަސްކަރިއްޔާއިން ކުރަމުންދާ ތުހުމަތުތައް ތަކުރާރު ކުރައްވާފައެވެ. އެހެންނަމަވެސް، މިތުހުމަތުތަކާ ގުޅޭ އެއްވެސް ހެއްކެއް އޭނާ ދައްކަވާފައެއް ނުވެއެވެ.
ފާއިތުވެދިޔަ ނޮވެމްބަރު މަހު ބޭއްވުނު އިންތިޚާބުގައި ސޫކީގެ ނޭޝަނަލް ލީގު ފޮރ ޑިމޮކްރަސީއިން ވަނީ، ބޮޑު އަޢުލަބިއަޔަތަކުން މިއިންތިޚާބު ކާމިޔާބު ކޮށްފައެވެ. އެހެންނަމަވެސް، ބަޢާވާތަކުން އިންތިޚާބީ ސަރުކާރު ބަދަލު ކޮށްލުމަށް އަސްކަރިއްޔާއިން ދައްކާފައިވާ ހުއްޖަތަކީ މިއިންތިޚާބު އޮޅުވާލައިގެން އަންގސަންގ ސޫކީގެ ޕާޓީއިން ކާމިޔާބު ކޮށްފައިވާކަމުގެ އުޒުރުތަކެވެ.
ހުޅަނގުގެ ގައުމުތަކުން، ވަކިން ޚާއްސަކޮށް އެމެރިކާއައި އިގިރޭސިވިލާތުންވަނީ، މިޔަންމާއަށް ގެނެވުނު ބަޢާވާތް ކުއްވެރި ކޮށްފައެވެ. އިގިރޭސި ބޮޑުވަޒީރު ބޮރިސް ޖޯންސަން ވިދާޅުވެފައިވަނީ، މިޔަންމާރގެ އަސްކަރިއްޔާއިން ދައްކަމުންދަނީ އަމިއްލައަށް ހަދަހަދައިގެން ދައްކާ ވާހަކަތަކެއް ކަމަށާއި، އަދި އަސްކަރީ ސަރުކާރުންވަނީ އެތައްބައެއްގެ އިންސާނީ ހައްގުތަކަށް އަރައިގެންފައި ކަމުގައެވެ. އެމެރިކާގެ ސްޓޭޓް ޑިޕާޓްމަންޓުގެ ތަރުޖަމާނު ވިދާޅުވެފައިވަނީ، މިޔަންމާގެ ހާލަތާއިމެދު އެގައުމުން ކަންބޮޑުވާ ކަމުގައެވެ. އަދި އެމެރިކާއިންވަނީ މިޔަންމާއާ ދެކޮޅަށް އަޅާނެ ދަތިކުރުމުގެ ފިޔަވަޅުތައް އިއުލާން ކޮށްފައެވެ.
