އައްޑޫގެ ތަރައްޤީގެ މުހިންމު ގިނަ މަޝްރޫޢުތަކެއް މިއަހަރުގެ ތެރޭގައި ފަށާނެކަމުގެ ޔަގީންކަން ސަރުކާރުން ދެއްވައިފި އެވެ.
މޯލްޑިވިއަންއިން އައްޑޫ ސިޓީގައި ސީޕްލައިން ޚިދުމަތް ފެށުމުގެ އެއްބަސްވުމުގައި ސޮއިކުރެއްވުމަށްފަހު ވާހަކަ ދައްކަވަމުން އިކޮނޮމިކް މިނިސްޓަރ ފައްޔާޒް އިސްމާއިލް ވިދާޅުވީ އައްޑޫއާއި، ދެކުނުގެ ތަރައްޤީ ޔަގީން ކުރުމަކީ ސަރުކާރުގެ އަމާޒެއްކަމަށެވެ. އައްޑޫއާއި ދެކުނުގެ ތަރައްޤީއަށް ގެންނަ ބަދަލުތަކަކީ ލާމަރުކަޒީ އުސޫލުގެ ތެރެއިން ގެނެވޭ ބަދަލުތަކެއްކަމަށް މިނިސްޓަރަ ފައްޔާޒް ވިދާޅުވި އެވެ.
"ވަރަށް ގިނަ މަސައްކަތް އެބަހުރި މިސަރަހައްދަށް. ރައީސް ޞާލިހުގެ މެނިފެސްޓޯގައި އެންމެ މުހިންމުކަމަކީ ރާއްޖެ ލާމަރުކޒީ ނިޒާމުގެ ތެރެއިން ހިންހުގުން. އެކަންކމިޔާބް ކުރުމަށް ޕްލައިން ކުރެވިފައިވަނީ ލާމަރުކަޒީ ކުރުމަކީ ހިދުމަތް ލިބުން އެކަނި ފިޔަވަވައި އިޤްތިޞާދު ލާމަރުކަޒު ކުރުން" މިނިސްޓަރ ފައްޔާޒް ވިދާޅުވި އެވެ.
މިނިސްޓަރ ވިދާޅުވީ އައްޑޫގެ ތަރައްޤީއާއި ގުޅިގެން ވަރަށްގިނަ ވާހަތަކެއް ދެކެވެމުންދާކަމަށެވެ. ޚާއްސަކޮށް ނިމިދިޔަ ވެރިކަން ތަކުގައި އައްޑޫއާއިމެދު ވެފައިވާ އިހުމާލުވުމަކީ މިކަން ރައްޔިތުންނަށް ގަބޫލުކުރަން ދަތިވާކަމެއްކަމަށެވެ. އައްޑޫގެ ތަރައްޤީއާއި ދެނުކުނުގެ ރައްތަކުގެ ތަރައްޤީއަކީ ރައީސް ޞާލިހުގެ ރިޔާސީ މެނިފެސްޓޯގައި އެންމެ ޚާއްސަކަމެއް ދެއްވައިގެން އަމާޒުކަޑައަޅާފައިވާ ކަންތައްތަކެއްކަމަށްވެސް މިނިސްޓަރ ވިދާޅުވި އެވެ.
މިނިސްޓަރ ފައްޔާޒު ވިދާޅުވީ އައްޑޫގެ ތަރައްޤީއާއި ގުޅިފައިވާ މުހިންމު މަޝްރޫޢުތަކުގެ ތެރޭގައި ހިމެނޭ އައްޑޫގެ މަގު ޒަމާނީ ފެންވަރަކަށް ހެދުމާއި، އައްޑޫގެ ބިން ހިއްކުމާއި، އެއާރޕޯޓް އެންމެ ޒަމާނީ އިންޓަރނޭޝަނަލް އެއަރޕޯޓަކަށް ހެދުމަށްޓަކައި ވަރަށް އަވަހަށް މަސައްކަތް ފެށިގެންދާނެކަމަށެވެ.
"އައްޑޫ ސިޓީ އިޤްތިޞާދީ މައިހަބަކަށް ހެދުމަށް ކުރާ މަސައްކަތުގެ އަމަލީ މަސައްކަތް މަދު މަސްތަކުގެ ތެރޭގައި ފެށޭނެ. އައްޑޫގެ މަގުތައް ރަނގަޅުކުރުން، ފެންބޮޑުވުމުގެ މައްސަލަ ހައްލުރުން. ފަތުރުވެރިކަން އިތުރަށް ކުރިއެރުމަށް އިތުރު ރިސޯޓް ހިއްކުން. ދިރިއުޅުމަށް ބޭނުންވާ ބިންހިއްކުން. މިކަންކަން މިއަހަރުގެ ތެރޭގައި ފެށިގެންދާނެ" މިނިސްޓަރ ފައްޔާޒް ވިދާޅުވި އެވެ.
މިނިސްޓަރ ވިދާޅުވީ މާޒީގައި ކަންކަން ވެފައިވާގޮތުން ގިނަ ރައްޔިތުންނަށް މިކަންކަން ވެދާނެކަމާއިމެދު ސުވާލު އުފެދޭކަމަށް ވިދާޅުވެ ކުރިންވެސް ދެއްކެވި ވާހަކަ ތަކުރާރު ކުރައްވާފައެވެ. ސަރުކާރުންވެސް މިއަދު ދިމާވެފައިވާ ހާލަތާއިއެކު ކަންކަން ވަމުންދާ ސްޕީޑާއިމެދު އެންމެ ހިންހަމަ ނުޖެހޭކަމަށާއި، ނަމަވެސް ކުރިއަށް އޮތް ދުވަސްތަކުގައި އިޤްތިޞާދީ ގިނަ މަސައްކަތްތަކެއް ފެށިގެންދާނެކަމަށް މިނިސްޓަރ ވިދާޅުވި އެވެ.
"ބަޔަކު ގަބޫލެއް ނުކުރާނެ މިކަންކަން ވާނެކަމަށްވެސް. އެތައް ސަރުކާރަކުން ވައުދުވެ ނުވެ އޮތްތައް ރައްޔިތުން ފެންނަނީ. މިއީ އެއްދުވަހުން ކުރެވޭނެ ކަންކަމެއްނޫން. އައްޑޫ މަގުހެދުކުމުގެ ޕްރޮރެކްޓް ޓެންޑަ ކުރެވި، ބަޔަކާއި ހަވާލު ކުރުމުގެ މަރުހަލާގައި މިހާރުވަނީ. ބިންހިއްކުންވެސް މިއަހަރު ނިންމުގެ ކުރިން ކޮންޓްރެކްޓަރުން އައިސް މަސައްކަތް ފެށުން އަޅުގަނޑުމެންގެ އުންމީދަކީ" މިނިސްޓރަ ފައްޔާޒު ވިދާޅުވިއެވެ.
އައްޑޫ ސިޓީގައި ތަރައްޤީގެ ގިނަ މަޝްރޫއުތަކެއް އަންނަނީ މިހާރުވެސް ހިގަމުންނެވެ. މިގޮތުން 65 މަޝްރޫއެއްގެ މަސައްކަތް އެ ސިޓީގައި ކުރިއަށްއެބަދެއެވެ. މީގެއިތުރުން އައްޑޫގައި 25 ކިލޯމީޓަރުގެ މަގު ހެދުމާއި 228 ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ.
