އީރާނާއެކު 2015 ވަނަ އަހަރު ވެފައިވާ ނިއުކުލިއަރ އެއްބަސްވުމަށް އެމެރިކާއިން އަބުރާ ރުޖޫޢަވެއްޖެ ނަމަ، އިރާނުގެ ނިއުކުލިއަރ އެއްބަސްވުމާ ގުޅޭގޮތުން އެމެރިކާގެ ރައީސް ޖޯ ބައިޑްންއާއެކު އެއްވެސް މަޝްވަރާއަކަށް ނުދާނެކަމުގެ އިޝާރާތެއް އިސްރާއީލުން ދީފިއެވެ.
އިސްރާއީލުން އެމެރިކާގެ ވޮޝިންގޓަނަށް ކަޑައަޅާފައި ނުންނަވާ ޚާއްސަ މަންދޫބުގެ ފަރާތުން މިފަދަ އިޝާރާތެއް އައިސްފައި މިވަނީ، އިސްރާއިލުގެ ބޮޑުވަޒީ ބެންޖަމިން ނަތަންޔާއަށް ވަރަށް ނާޒުކު ދަޑިވަޅެއްގައެވެ. މިގޮތުން، އަންނަ މަހުގެ އިންތިޚާބަށް ވަމުންދާ ތައްޔާރީތަކުގައި، ނަތަންޔާހޫވަނީ، އިރާނާ ދެކޮޅަށް ދައްކަވަމުން ގެންދަވާ ވާހަކަތައް އިތުތަށް ހަރުކަށި ކޮށްފައެވެ.
އެމެރިކާގެ ރައީސް ޖޯބައިޑްން ފާއިތުވެދިޔަ މަހު އެމެރިކާގެ ރައީސްކަމުގެ ހުވާ ކުރެއްވުމަށްފަހު، އަދި މިހާތަނަށް އިސްރާއީލުގެ ބޮޑުވަޒީރާ ސީދާ މުޢާމަލާތު ކުރައްވާފައެއް ނުވެއެވެ.
އެމެރިކާގެ އާސަރުކާރުންވަނީ، 2015 ވަނަ އަހަރު ދުނިޔޭގެ އެންމެ މުއްސަދި ގައުމުތަކާއިއެކު އިރާނުން ހަދާފައިވާ ނިއުކުލިއަރ އެއްބަސްވުމަށް އެބުރި ދިއުމަށް ބޭނުންވާކަމަށް ބުނެފައެވެ. އަދި އެއްބަސްވުމަށް އެބުރި ރުޖޫޢަވާއިރު، އެއްބަސްވުމުގައިވާ ހުރިހާ ޝަރުތުތަކަށް އިރާނުން ބޯލަބައިފިނަމަ، އެގައުމާ ދެކޮޅަށް އަޅާފައިވާ ދަތުކުރުމުގެ ފިޔަވަޅުތަަކަށް ވަރަށް ބޮޑުތަނުން ލުއިލިބިގެން ދާނެއެވެ.
އެމެރިކާގެ ކުރީގެ ރައީސް ޑޮނަލްޑް ޓްރަމްޕްވަނީ، 2018 ވަނަ އަހަރު އިރާނުގެ ނިއުކުލިއަރ އެއްބަސްވުމުން އަމިއްލައަށް ބޭރުވެފައެވެ. އަދި އެއަށްފަހު އެމެރިކާއިންވަނީ، އިރާނާ ދެކޮޅަށް ދަތިކުރުމުގެ ވަރުގަދަ ފިޔަވަޅުތަކެއްވެސް އަޅާފައެވެ.
"އެމެރިކާގެ ސަރުކާރުން 2015ގެ އެއްބަސްވުމަށް ރުޖޫޢަ ވެއްޖެނަމަ، އަހަރުމެންނަށް އެކަމާ ގުޅޭގޮތުން އެމެރިކާގެ މިހާރުގެ ސަރުކާރާ އިތުރަށް މަޝްވަރާތަކެއް ނުކުރެވޭނެ،" އިސްރާއީލުން އެމެރިކާއަށް ކަޑައަޅާފައި ހުންނަވާ ސަފީރު ގިލާޑް އެރްދާން އިސްރާއީލުގެ އާރމީ ރޭޑިއޯގައި ވާހަކަ ދައްކަވަމުން ވިދާޅުވެފައި ވެއެވެ.
އިސްރާއީލުގެ ބޮޑުވަޒީރު، ނަތަންޔާހޫގެ އަރިސްބޭފުޅުން ވަނީ، އިރާނުގެ ނިއުކުލިއަރ އެއްބަސްވުމާ ގުޅޭގޮތުން އެމެރިކާއާއި މަޝްވަރާ ކޮށްފިނަމަ، މިހާރުވެސް އިސްރާއީލުން ދެކޮޅު ހަދަމުންދާ އެއްބަސްވުމަކަށް އެގައުމުން ރުހުން ދިންކަމުގެ ސިގްނަލެއް ލިބިގެން ހިގައިދާނެތީ ކަންބޮޑުވުން ފާޅު ކުރައްވާފައެވެ.
އިސްރާއީލަކީ ރަސްމީގޮތުން އިރާން ނިއުކުލިއަރ އެއްބަސްވުމުގެ ބައިވެރިއެއް ނޫނެވެ. އެހެންނަމަވެސް، އެމެރިކާގެ ކޮންގްރެސްގައި ތިއްބަވާ އިސްރާއީލަށް ތާއީކުރާ ފަތާތްތަކުގެ ލޮބީ ކުރުންތަކާ އަދި، މީގެ އިތުރުން، އިރާނުގެ ނިއުކުލިއަރ އެއްބަވުމާ ގުޅޭގޮތުން ކުރެވޭ މަޝްވަރަތައް ފެއިލް ވެއްޖެނަމަ، އިރާނާ ދެކޮޅަށް ބާރުގެ ބޭނުންކުރުމުގެ އިންޒާރު ނަތަންޔާހީ ދެމުންދާ ދިއުން ވެގެންދަނީ، ބޮޑެތި ބާރުތަކުން އިރާނާއެކީ ކުރާ މަޝްވަރާތަކަށް ނުފޫ ފޯރަމުންދާ ކަންކަމުގެ ގޮތުގައެވެ.
"އަހަރެމެން ގަބޫލުކުރާ ގޮތުގައި، އެމެރިކާއިން އަމިއްލައަށް ބޭރުވެފައިވާ މިއެއްބަސްވުމަށް އެގައުމުން އެބުރި ރުޖޫޢަ ވެއްޖެނަމަ، އިރާނުގެ ނިއުކުލިއަރ ހަތިޔާރުގެ ޕްރޮގްރާމާ ގުޅޭގޮތުން، އެގައުމަށް ލިބިފައިވާ ބާރުތައް އަތުން ދޫވެގެން ދާނެ،" އިސްރާއީލުގެ ސަފީރު އެރެދާން ވިދާޅުވެފައި ވެއެވެ.
"އިރާނާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލާ ވަގުތުން ފެށިގެން، އިރާނުން މަޝްވަރާގެ މޭޒަށް ދާންޖެހޭނެ އެއްވެސް ސަބަބެއް ނޯންނާނެ، ނަތީޖާއަކަށް ވެގެންދާނީ، ނިއުކުލިއަރ ގާބިލްކަން ނެތިކޮށްލުމަށް ބޭނުންވާ އެންމެ ފަހުގެ އެއްބަސްވުމަކާ ހަމައަށް ދާން އިރާނަށް އެއްވެސް ޕްރެޝަރެއް ނޯންނާނެ."
ޖޯ ބައިޑްންގެ ސަރުކާރުން ބުނެފައިވަނީ، އެމެރިކާއިން ބޭނުންވަނީ، އިރާނުގެ ނިއުކުލިއަރ މަޝްރޫޢާ ދެކޮޅަށް އަޅާފައިވާ ފިޔަވަޅުތައް ވަރުގަދަކޮށް އިދި އިތުރަށް ދިގު ދަންމާލުމަށް ކަމަށެވެ. އެހެންނަމަވެސް، އިރާނުން ބުނެފައުވަނީ ނިއުކުލިއަރ ހަތިޔާރު ހޯދުމުގެ އެއްވެސް ޝައުގުވެރިކަމެއް އެގައުމުން ނުގެންގުޅޭކަމަށެވެ.
