އާންމުކޮށް އަހަރެމެން ގަޔާވާ އެއްޗެހި އަދި ދިރިއުޅޭތަންތަން ބަހައްޓަން ބޭނުންވަނީ ގަޔާވާ ކުލައެއްގައެވެ. އެހެންނަމަވެސް ރަށެއް ނުވަތަ ސަރަހައްދެއް އެއްކުލައެއްގައި ތަރައްގީކޮށްފައިވާކަން އެނގޭ ހެއްޔެވެ؟
ސައުތު ކޮރެއާގެ އިރު އިތުރުގައި އޮންނަ ސަރަހައްދެއްކަމުގައިވާ ބަންވޮލް އައިލަންޑް ނުވަތަ "ދަ ޕާރޕަލް އައިލެންޑު"ގެ ގާތްގަނޑަކަށް ހުރިހާތަނެއްވެސް ހުންނަނީ ދަނބު ކުލައިގައެވެ. މި ސަރަހައްދުގެ 400 އަށްވުރެ ގިނަ ގޭގޭގެ ފުރާޅު، ފޯނު ބޫތުތައް އަދި ބްރިޖްވެސް ފަރުމާކޮށްފައިވަނީ ދަނބު ކުލައިގެ ޝޭޑުތަކުންނެވެ. އަދި މީގެ އިތުރުން ލެވެންޑާރ ދަނޑުތައްވެސް ހައްދާފައިވެއެވެ.
ކޮވިޑް 19 އާއި ގުޅީގެން ހުރިހާ ގައުމެއްގެ ވެސް ފަތުރުވެރިކަމަށްވަނީ ވަރަށް ބޮޑު ހީނަރުކަމެއް އައިސް ފައެވެ. އެހެންނަމަވެސް ބަންވޮލް ގެ ފަތުރުވެރިކަން ވަނީ 20 އިންސައްތައިން ކުރިއަރާފައެވެ. އެގޮތުން ޖޫން 2020 އިން ފެށީގެން އޮގަސްޓު 2020 ގެ ނިޔަލަށް ބަންވޮލްއަށް ވަނީ 1 ލައްކައަށް ވުރެ ގިނަ މީހުން ޒިޔާރާތްކޮށްފަ އެވެ. އަދި 2018 ވަނަ އަހަރުން ފެށިގެން ހަތަރު ލައްކަ ނުވަދިހަ ހާސް މީހުން ވަނީ މި ކުޑަ ބަންވޮލްއަށް ޒިޔާރާތްކޮށްފަ އެވެ.
މިސަރަހައްދުގެ މަލަމަތި ފެންނަ ވީޑިއޯއެއް ވަނީ ފޭސްބުކްގައި އާންމުވެފައެވެ. މި ސަރަހައްދު އެއްކޮށް ޕާޕަލް ކޮށްލާފައިވަނީ ފަތުރުވެރިންގެ ޝައުގެވެރިކަން ހޯދުމަށެވެ.
ބަންވޮލް އަށް ޒިޔާރަތް ކުރާ ގިނަ ފަތުރުވެރިންވެސް ދަނބު ކުލައިން ހެދުން އަޅައިގެން ފޮޓޯނެގުމަށް އިސްކަންދެ އެވެ. އަދި ގިނަ މީހުން މި ފަދަ ފޮޓޯތައް މީސްމީޑިއާގައި އާންމުކުރެއެވެ.
ސައުތު ކޮރެއާގެ ވެރިރަށް ސޯލްއިން ބަންވޮލްއަށް ދިޔުމަށް އެއްގަމުމަގުން 6 ގަޑީރުގެ ދަތުރެއް ކުރަންޖެހެއެވެ. މި ރަށް ފަތުރުވެރިންގެ މަންޒިލަކަށް ހެދުމަށް މިގޮތަށް ބަދަލުކޮށްލުމުގެ ޕްރޮޖެކްޓް ފެށީ 2015 ވަނަ އަހަރުއެވެ.
