ކޯވިޑް-19ގެ ޙާލަތާއިގުޅިގެން ރާޢްޖެއަށް ވެންޓިލޭޓަރު ހޯދުމުގަައި މަޤާމުގެ ނުފޫޒު ބޭނުންކޮށް ދައުލަތަށް ގެއްލުންވާ ގޮތަށް އަމަލުކުރިކަމުގެ ތުހުމަތާއެކު ޙެލްތު މިނިިސްޓަރ ޢަބްދުﷲ އަމީން ހިމެނޭހެން 11 މީހެއްގެ މައްޗަށް ދައުވާކޮށްދިނުމަށް އެދި އެންޓި ކޮރަޕްޝަން ކޮމިޝަން (އޭސީސީ) އިން ޕްރޮސިކިއުޓަ ޖެނެރަލްގެ އޮފީހުގައި އެދިއްޖެއެވެ.
މި މައްސަލައާއި ގުޅިގެން އޭސީސީން ނެރުނު ބަޔާނުގައި ވިދާޅުވެފައިވަނީ މިނިސްޓްރީ އޮފް ހެލްތަށް ބޭނުންވާ 75 ވެންޓިލޭޓަރ ސަޕްލައިކުރުމަށް ޑުބާއީގެ ކުންފުންޏެއްކަމަށްވާ އެގްޒެކިއުޓަރސް ޖެނެރަލް ޓްރޭޑިންގ އާ ޙަވާލުކުރުމަށް ނިންމާފައިވަނީ އެ ކުންފުނީގެ މާލީ ޤާބިލްކަމާއި ތަޖުރިބާއަށް ބެލުމެއްނެތި ޑިއުޑިލިޖެންސް ހަދާފައިނެތީސްކަން އެނގޭކަމަށެވެ. އޭސީސީން ވަނީ މިކަމުގައި މިނިސްޓްރީ އޮފް ހެލްތުގެ ބިޑް ކޮމިޓީގެ މެމްބަރުންގެ ރަސްމީ ހައިސިއްޔަތުގެ ނުފޫޒު ނަހަމަގޮތުގައި ބޭނުންކޮށްގެން އެ ކުންފުންޏަށް މަންފާއެއް ހޯދައިދިނުމުގެ މަޤްޞަދުގައި ކޮށްފައިވާ ކަމެއް ކަމަށް ކުރާ ތުޙުމަތާގުޅިގެން ކުރެވުނު ތަޙުޤީޤަށްފަހު 4 ފަރާތެއްގެ މައްޗަށް ދިވެހިރާއްޖޭގެ ޤާނޫނުލް ޢުޤޫބާތުގެ 512 ވަނަ މާއްދާގެ (ހ)ގެ 1 އާއި ދިވެހިރާއްޖޭގެ ޤާނޫނުލް ޢުޤޫބާތުގެ 513 ވަނަ މާއްދާގެ (ށ) ދަށުން ދަޢުވާ ކުރުމަށް ޕްރޮސިކިއުޓަރ ޖެނެރަލްގެ އޮފީހަށް ފޮނުވާފައެވެ.
ރާއްޖެއަށް ވެންޓިލޭޓަރު ހޯދުމުގައި ކޮރަޕްޝަންގެ އަމަލުތަކެއް ހިންގާފައިވާކަމުގެ ތުހުމަތުތަކެއް ކުރެވުމާ ގުޅިގެން މިދިޔަ މެއި މަހުން ފެށިގެން އޭސީސީން އައީ އެ މައްސަލަ ބަލަމުންނެވެ. އަދި އޮޑިޓް ރިޕޯޓުގައިވާ ކަންކަން ތަޙްޤީޤު ކުރުމަށް ރައީސް އޮފީހުން އެންގެވުމާ ގުޅިގެން ފުލުހުންނާއި ގުޅިގެން އެކަން ތަޙްޤީޤުކޮށް ވެންޓިލޭޓަރު ހޯދުމުގައި މާލިއްޔަތު ޤަވާއިދާ ޚިލާފު އެއްވެސް ކަމެއް ހިނގާފައިވޭތޯ ބެލުމުގެ މަސައްކަތްވެސް ވަނީ ކޮށްފައެވެ.
މި ތުހުމަތުތަކާއެކު ތަޙްޤީޤީ އިދާރާތަކަށް އެއްބާރުލުންދީ ތަޙްޤީޤަށް ޖާގަ ދިނުމުގެ ގޮތުން ޙެލްތު މިނިސްޓަރ ޢަބްދުﷲ އަމީން ވަނީ، ތަޙްޤީޤު ނިމެންދެން އަމިއްލަފުޅަށް މަސްޢޫލިއްޔަތުތަކުން އެކަހެރިވެވަޑައިގެންފައެވެ. ނަމަވެސް ހެލްތު މިނިސްޓްރީގެ ފައިނޭންޝަލް ކޮންޓްރޯލަރާއި ބިޑް ކޮމިޓީ ސަސްޕެންޑްކޮށްފައިވަނީ ރައީސުލްޖުމްހޫރިއްޔާގެ އޮފީހުން އެންގެވުމުންނެވެ.
ރާޢްޖެއަށް ވެންޓިލޭޓަރު ގެނައުމަށް އެއްބަސްވި މުއްދަތު ހަމަވެ ވެންޓިލޭޓަރުތައް ނުގެނެވި އެކަމުގެ ޝަކުވާ ބޮޑުވުމުން، ހެލްތު މިނިސްޓްރީން ވަނީ އެކަމުގައި މާލިއްޔަތު ޤަވާއިދާ ޚިލާފަށް އެއްވެސް ކަމެއް ހިންގާފައި ނޯންނާނެ ކަމުގެ ޔަޤީންކަންވެސް ދެއްވާފައެވެ. ނަމަވެސް އޮޑިޓް ރިޕޯޓުގައި ވަނީ އެހެން ކުންފުނިތަކަށް ފުރުސަތު ގެއްލޭ ގޮތަށް ވަކި ކުންފުނިތަކެއް ހޮވައި ވަކި ބަޔަކަށް ނާޖާއިޒު ފައިދާއެއްވާ ގޮތަށް ވެންޓިލޭޓަރ ގަތުމަށް ކުންފުންޏަކާ ހަވާލުކޮށްފައިވާ ކަމަށް ބުނެފައެވެ. އަދި 75 ވެންޓިލޭޓަރު ގަތުމަށް ދުބާއީގެ އެގްޒެކިއުޓާސް ޖެނެރަލް ޓްރޭޑިންއާ ހަވާލުކޮށްފައިވަނީ އެ ކުންފުންޏަށް މާލިއްޔަތު ގަވާއިދާ ޚިލާފަށް ޕްރޮޖެކްޓުގެ އަގުގެ 90 ޕަސެންޓަށްވާ 30 މިލިއަން ރުފިޔާ ބޭންކް ގެރެންޓީއަކާ ނުލައި ދޫކޮށްފައި ކަމަށްވެސް އޮޑިޓް ރިޕޯޓުގައި ފާހަގަކޮށްފައިވެއެވެ. އެ ކުންފުންޏާ އެކު އެއްބަސްވެފައިވަނީ 34 މިލިއަން ރުފިޔާ އަށް 10 ޕޯޓަބަލް ވެންޓިލޭޓަރާއި 65 އައިސީޔޫ ވެންޓިލޭޓަރު ގަތުމަށެވެ.
ކޮމެންޓު ފޮނުވާ